Views: 2
ដោយៈ ប.ជ័យ / បន្ទាយមានជ័យៈ ដោយសារជំនន់ទឹកភ្លៀង និងទប់ស្កាត់គ្រោះថ្នាក់ ផ្សេងៗ នៅថ្ងៃទី២២-២៤ ខែកញ្ញា ឆ្នាំ២០២២ លោកវរសេនីយ៍ទោ ប៉ិក គឹមហ៊ាក អធិការនគរបាល ស្រុកភ្នំស្រុក បានដឹកនាំកម្លាំងក្រោមឱវាទ ដោយសហការជាមួយ កម្លាំងចម្រុះ និងអាជ្ញាធរមូលដ្ឋាន ចុះជួយសម្រួលការធ្វើដំណើរ ឆ្លងកាត់ផ្លូវកៅស៊ូ លេខ២៦៨ A កំពុងលិចលង់ចំនួន ២ កន្លែង (ភ្នំស្រុក- ព្រៃមាន់ និង ភ្នំស្រុក- អាងទឹកត្រពាំងថ្ម)។
កម្លាំងសរុបបានជួយច្រកដីដាក់ការុង បិទទំនប់កុំឲ្យទឹកហូរកាត់ផ្លូវលំ ប្រឈមនឹងការលិចលង់ ប្រមាណជា ៣០០ ម៉ែត្រ ក្នុងភូមិស្ពានក្មេង ឃុំភ្នំដី ទៅឃុំ ស្ពានស្រែង ស្រុកភ្នំស្រុក ។
លោកវរសេនីយ៍ទោ ប៉ិក គឹមហ៊ាក់ បានបន្តថាៈ អនុវត្តតាមការណែនាំរបស់លោក ឧត្តមសេនីយ៍ទោ សិទ្ធិ ឡោះ ស្នងការនគរបាល ខេត្តបន្ទាយមានជ័យ ក្នុងរដូវវស្សា មានទឹកជំនន់នេះ ឲ្យគ្រប់កម្លាំងអធិការដ្ឋាននគរបាល ស្រុក ក្រុង ត្រូវត្រៀមកម្លាំង ដើម្បីជម្លៀសនិងជួយសម្រួលចរាចរណ៍ ដល់ប្រជាពលរដ្ឋ សិស្សានុសិស្ស ធ្វើដំណើរឆ្លងកាត់កន្លែង ដែលមានទឹកហូរកាត់ផ្លូវ ជៀសវាងគ្រោះថ្នាក់ជាយថាហេតុ។
ជាក់ស្តែង ថ្ងៃនេះ នៅក្នុងភូមិសាស្ត្រស្រុកភ្នំស្រុក មានទឹកហូរកាត់ផ្លូវកៅស៊ូ ចំនួន ៣ កន្លែង និងទឹកហូរកាត់ផ្លូវលំ មួយកន្លែង ។
លោកអធិការ បានបញ្ជាក់ថាៈ ដើម្បីអនុវត្តតាមបទបញ្ជានេះ លោកបានដឹកនាំកម្លាំង នគរបាលនៃអធិការដ្ឋាន និងនគរបាលប៉ុស្តិ៍រដ្ឋបាល សរុបចំនួន ៤៣ នាក់ ក្នុងនោះ បានសហការជាមួយកម្លាំងចម្រុះ និងអាជ្ញាធរមូលដ្ឋាន ចុះជួយសម្រួលការធ្វើដំណើរ ឆ្លងកាត់ផ្លូវកៅស៊ូលេខ២៦៨ A ដែលទឹកកំពុងហូរកាត់ផ្លូវ ចំនួន ៣ កន្លែង (ភ្នំស្រុក ព្រៃមាន់ភ្នំស្រុក ភូមិប៉ោយស្នួល និងភ្នំស្រុក ទៅអាងទឹកត្រពាំងថ្ម) សរុបប្រមាណជា ២.០០០ ម៉ែត្រ។
កម្លាំងបានជួយច្រកដីដាក់ការុង ដើម្បីបិទទំនប់កុំឲ្យទឹកហូរកាត់ផ្លូវលំ ប្រវែងប្រមាណជា ៣០០ ម៉ែត្រ ពីភូមិស្ពានក្មេង ឃុំភ្នំដី ទៅឃុំស្ពានស្រែង ស្រុកភ្នំស្រុក ។ ជាមួយគ្នានោះដែរ ក៏មានគ្រឿងចក្រចូក (អេស្ការវ៉ាទ័រ) របស់មន្ទីរសាធារណការ និងដឹកជញ្ជូនខេត្ត បានជីកដីទប់ទំនប់ ។ មួយវិញទៀត ដោយពិនិត្យឃើញពីការខ្វះខាតការ៉ុងច្រកដីនោះ លោកក៏បានឧបត្ថម្ភ ការ៉ុងចំនួន ១០០ ដើម្បីច្រកដីទប់ជាទំនប់នេះផងដែរ ។
សូមបញ្ជាក់ថា ទឹកជំនន់ខ្ជាក់ពីប្រព័ន្ធធារាសាស្ត្រស្ពានស្រែង និង ស្ទឹងក្រឡាញ់ បង្កផលប៉ះពាល់ដល់ឃុំទាំង ៦ នៃស្រុកភ្នំស្រុក ក្នុងនោះ ប៉ះពាល់ដំណាំស្រូវ ចំនួន ១១.២១១ ហិកតា ដំឡូងមី ៦៧០ ហិកតា សាលារៀន ១៤សាលា វត្ត២ ទឹកហូរកាត់ផ្លូវ ៤០ ខ្សែ ស្មើនឹង ២៨.៣២៥ ម៉ែត្រ ក្នុងនោះ ឃុំនៅប៉ែកខាងកើត នៃស្រុកប៉ះពាល់ ច្រើនជាងគ ដូចជាឃុំស្ពានស្រែង៕/V
