Views: 1
ប្រែសម្រួល : កញ្ញាដាលីស (ដេល្លីម៉េល) ៖ រដ្ឋាភិបាលថ្មីរបស់ប៉ាគីស្ថាន ដែលកំពុងប្រឈមនឹងការកើនឡើងនៃអតិផរណានិងចលាចលនយោបាយ បានបង្ហាញកញ្ចប់ថវិកាចំនួន ៩,៥ ទ្រីលានរូពី (៤៧ ពាន់លានដុល្លារ) កាលពីថ្ងៃសុក្រទី១០មិថុនា ដោយលៃទុកជាង៤០ ភាគរយសម្រាប់សងបំណុលបរទេសនិងក្នុងស្រុកដ៏ធំរបស់ប្រទេសនេះ។
នាយករដ្ឋមន្ត្រី សេបាស សារីហ្វ (Shehbaz Sharif)បានស្តីបន្ទោសបញ្ហាសេដ្ឋកិច្ចរបស់ប៉ាគីស្ថានទៅលើអ្នកកាន់តំណែងមុនរបស់គាត់ គឺលោក អ៊ីមរ៉ាន់ ខាន់ (Imran Khan)ដែលត្រូវបានបណ្តេញចេញតំណែងដោយការបោះឆ្នោតសម្តែងការមិនទុកចិត្តពីសភាកាលពីខែមេសា ហើយកំពុងបង្កើតយុទ្ធនាការជាតិដើម្បីជំរុញឱ្យមានការបោះឆ្នោតមុនកាលកំណត់។
ទោះយ៉ាងណា ពួកអ្នកវិភាគនិយាយថា បញ្ហាទាំងនេះកើតចេញពីការគ្រប់គ្រងសេដ្ឋកិច្ចមិនល្អជាច្រើនទសវត្សរ៍ដោយរដ្ឋាភិបាលជាបន្តបន្ទាប់ និងមេដឹកនាំយោធាដែលខកខានក្នុងការដោះស្រាយបញ្ហាអំពើពុករលួយនិងការគេចវេសពន្ធយ៉ាងទូលំទូលាយ។
ថវិកា ដែលបង្ហាញដោយរដ្ឋមន្ត្រីក្រសួងហិរញ្ញវត្ថុលោក មីហ្វតាស អ៊ីស្មាអ៊ីល (Miftah Ismail)កាលពីថ្ងៃសុក្រ គឺលៃ ៣,៩៥ ទ្រីលានរូពី ដើម្បីសងបំណុល ១២៨ ពាន់លានដុល្លាររបស់ប្រទេស។
លោកបានប្រាប់សភាជាតិថា “ដោយសារតែការខ្វះការប្រមើលមើលវែងឆ្ងាយរបស់រដ្ឋាភិបាលមុន រចនាសម្ព័ន្ធសង្គមត្រូវបានបំផ្លាញ កំណើនសេដ្ឋកិច្ចត្រូវជាប់គាំង និងសមាហរណកម្មជាតិត្រូវក្រៀមស្វិត”។
កញ្ចប់ថវិកាសង្គ្រោះចំនួន ៦ ពាន់លានដុល្លាររបស់ IMF ដែលចុះហត្ថលេខាដោយអតីតនាយករដ្ឋមន្ត្រីខាន់ក្នុងឆ្នាំ ២០១៩ មិនត្រូវបានអនុវត្តពេញលេញទេដោយសាររដ្ឋាភិបាលរបស់គាត់បានបដិសេធលើកិច្ចព្រមព្រៀងដើម្បីកាត់បន្ថយឬបញ្ចប់ការឧបត្ថម្ភធនមួយចំនួន និងដើម្បីកែលម្អប្រាក់ចំណូលនិងការប្រមូលពន្ធ។
មកទល់ពេលនេះ ទីក្រុងអ៊ីស្លាម៉ាបាដបានទទួលប្រាក់ចំនួន ៣ ពាន់លានដុល្លារ ដោយកម្មវិធីថវិកាសង្គ្រោះនេះនឹងបញ្ចប់នៅចុងឆ្នាំនេះ។
ក្រុមមន្ត្រីកំពុងស្វែងរកការពន្យារកម្មវិធីនេះរហូតដល់ខែមិថុនា ឆ្នាំ ២០២៣ ក៏ដូចជាការចេញនូវកញ្ចប់ថវិកាបន្ទាប់ចំនួនមួយពាន់លានដុល្លារ។
លោកសារីហ្វបានប្តេជ្ញាថានឹងស្តារសេដ្ឋកិច្ចដែលមានសភាពទ្រុឌទ្រោមនេះ ប៉ុន្តែអ្នកវិភាគនិយាយថា រដ្ឋាភិបាលផុយស្រួយរបស់គាត់ខកខានក្នុងការសម្រេចចិត្តដ៏មោះមុត។
ថវិកាថ្មីនេះនឹងលៃលកចំនួន ១,៥២៣ ទ្រីលានរូពីដល់កងកម្លាំងការពាររបស់ប្រទេស ដែលតែងតែលេបត្របាក់បរិមាណលុយដ៏ច្រើន ដោយសារតែភាពតានតឹងជាអចិន្ត្រៃយ៍ជាមួយប្រទេសជិតខាងឥណ្ឌា។
ទឹកប្រាក់ប្រហែល ៨០០ ពាន់លានរូពីត្រូវបានតម្រង់ទិសសម្រាប់គម្រោងអភិវឌ្ឍន៍ក្នុងគោលបំណងទទួលបានកំណើន ៥ ភាគរយក្នុងឆ្នាំសារពើពន្ធចាប់ពីថ្ងៃទី ១ ខែកក្កដា៕
កម្មករជាមួយសហជីពមួយកំពុងតវ៉ាទាមទារដំឡើងប្រាក់ខែនៅមុខសភាក្នុងទីក្រុងអ៊ីស្លាម៉ាបាដ ខណៈថវិកាជាតិត្រូវបានបង្ហាញ