Views: 2
ប្រែសម្រួល : កញ្ញាដាលីស (ដេល្លីម៉េល) ៖ អ្នកពន្លត់អគ្គិភ័យជាង ១.០០០ នាក់ ដែលគាំទ្រដោយយន្តហោះទម្លាក់ទឹក កំពុងតស៊ូពន្លត់ភ្លើងព្រៃ “បិសាច”នៅជិតកន្លែងដាំទំពាំងបាយជូរធំបំផុតរបស់បារាំងគឺទីក្រុងប័រដូ (Bordeaux) សម្រាប់ថ្ងៃទីបី កាលពីថ្ងៃព្រហស្បតិ៍ទី១១សីហា ដោយមិនមានការថយចុះសីតុណ្ហភាពក្តៅស្ទើរប្រេះក្រហែង ដែលបានឃើញមុនពេលចុងសប្តាហ៍មុននោះទេ។
ភ្លើងនៅតំបន់ជីរ៉ូដ (Gironde) ដែលជាភ្លើងឆេះព្រៃធំបំផុតមួយនៅប្រទេសបារាំង បានបង្ខំមនុស្សរាប់ពាន់នាក់ចាកចេញពីផ្ទះរបស់ពួកគេ បំផ្លាញទ្រព្យសម្បត្តិជាច្រើន និងបំផ្លាញព្រៃឈើជាង ៦.៨០០ ហិកតា។
លោក ហ្គ្រេហ្គោរី អាល់ឡូញ (Gregory Allione) មកពីអង្គភាពពន្លត់អគ្គិភ័យបារាំង FNSPF បានប្រាប់វិទ្យុ RTLថា “ភ្លើងព្រៃនេះជាសត្វចម្លែក វាជាបិសាច”។
ភ្លើងព្រៃជីរ៉ូដគឺជាភ្លើងព្រៃមួយក្នុងចំណោមភ្លើងព្រៃជាច្រើនកន្លែង ដែលបានឆាបឆេះនៅទូទាំងទ្វីបអឺរ៉ុបក្នុងរដូវក្តៅនេះ ដែលបង្កឡើងដោយរលកកម្តៅ ដែលបានដុតរោលរាលទ្វីបនេះនិងនាំមកនូវសីតុណ្ហភាពខ្ពស់បំផុត។
នាយករដ្ឋមន្ត្រី អេលីហ្សាបេត ប៊ន (Elisabeth Borne) គ្រោងចុះទៅមើលតំបន់នេះនៅពេលក្រោយ។
អាជ្ញាធរបានព្រមានថា សីតុណ្ហភាពក្នុងតំបន់នឹងឡើងដល់ ៤០ អង្សាសេនៅថ្ងៃព្រហស្បតិ៍ ហើយបន្តឡើងខ្ពស់ទៀតរហូតដល់ថ្ងៃសៅរ៍៕
ភ្លើងនៅតំបន់ជីរ៉ូដបំផ្លាញព្រៃឈើជាង ៦.៨០០ ហិកតា ។អាជ្ញាធរសង្ស័យមានអ្នកលួចដុតដែលនាំអោយមានភ្លើងឆេះព្រៃដ៏ធំនៅបារាំង
