Views: 6
ប្រែសម្រួល៖ បំណង(ដេល្លីម៉េល)៖ ប្រធានាធិបតីអាម៉េរិកលោក ចូ បៃដិន បាននិយាយកាលពីថ្ងៃព្រហស្បតិ៍ទី៦តុលាថា ហានិភ័យនៃការផ្ទុះសង្គ្រាមនុយក្លេអ៊ែរផ្តាច់ព្រាត់រវាងសភាវល្អនិងអាក្រក់កំពុងឈានដល់កំរិតខ្ពស់បំផុតគិតចាប់តាំងពីវិបត្តិកាំជ្រួចគុយបាឆ្នាំ១៩៦២ នៅពេលពួកមន្ត្រីរុស្ស៊ីគិតតែនិយាយអំពីលទ្ធភាពប្រើសព្វាវុធនុយក្លេអ៊ែរកលយុទ្ធក្រោយកងកម្លាំងរបស់ខ្លួនជួបបរាជ័យជាបន្តបន្ទាប់នៅសមរភូមិក្នុងសង្គ្រាមឈ្លានពានអ៊ុយក្រែនអស់ពេលប្រាំបីខែមកនេះ។
ថ្លែងនៅពិធីរៃអង្គាសប្រាក់មួយសំរាប់គណៈកម្មាធិការយុទ្ធនាការព្រឹទ្ធសភារបស់បក្សប្រជាធិបតេយ្យ លោកបៃដិន បាននិយាយថា ប្រធានាធិបតីរុស្ស៊ី«មិនលេងសើចទេនៅពេលគាត់និយាយអំពីការប្រើសព្វាវុធនុយក្លេអ៊ែរកលយុទ្ធ ឬសព្វាវុធគីមីនិងជីវសាស្ត្រ»។
លោកបៃដិនបានបន្ថែមថា «យើងមិនដែលបានប្រឈមលទ្ធភាពផ្ទុះសង្គ្រាមបែបនេះនេះចាប់តាំងពីសម័យកេណ្ឌឌីនិងវិបត្តិកាំជ្រួចគុយបា»។
ប្រធានាធិបតីអាម៉េរិកក៏ព្រមានថា ការប្រើសព្វាវុធនុយក្លេអ៊ែរកំលាំងខ្សោយណាមួយអាចរាលដាលទៅជាជម្លោះលែងអាចគ្រប់គ្រងបាននិងបង្កមហន្តរាយដល់ពិភពលោក។លោកថា«ខ្ញុំមិនមើលឃើញថាការប្រើសព្វាវុធកលយុទ្ធណាមួយវាងាយស្រួលទេ និងវាមិនបញ្ចប់ត្រឹមបាញ់នុយក្លេអ៊ែរទៅមកប៉ុណ្ណឹងទេ»។
អស់ពេលជាច្រើនខែមកហើយពួកមន្ត្រីអាម៉េរិកបានព្រមានអំពីលទ្ធភាពដែលរុស្ស៊ីអាចប្រើសព្វាវុធមហាប្រល័យនៅអ៊ុយក្រែន នៅពេលខ្លួនជួបបរាជ័យយុទ្ធសាស្ត្របន្តបន្ទាប់នៅលើសមរភូមិ។ទោះជាយ៉ាងណា នៅពេលចុងក្រោយបំផុតនៅសប្តាហ៍នេះពួកមន្ត្រីអាម៉េរិកបាននិយាយថាពួកគេមិនបានសង្កេតឃើញការចល័តកងកម្លាំងនុយក្លេអ៊ែររបស់រុស្ស៊ីនៅឡើយទេដែលជាសញ្ញាតំរូវអោយកងកម្លាំងនុយក្លេអ៊ែរអាម៉េរិកប្រុងប្រៀបខ្លួនផងដែរ៕
ប្រធានាធិបតីអាម៉េរិក ចូ បៃដិន ក្នុងពិធីមួយក្រុងញូវយ៉កកាលពីថ្ងៃ៦តុលា