Views: 8
ដោយៈ ប.ជ័យ / បន្ទាយមានជ័យៈ កងរាជអាវុធហត្ថខេត្តបន្ទាយមានជ័យ បានបញ្ជូនក្រុម ក្មេងទំនើង ប្រាំនាក់ ទៅតុលាការ នៅរសៀលថ្ងៃទី៨ ខែសីហា ឆ្នាំ២០២២នេះ ពាក់ព័ន្ធ ករណីហិង្សាដោយចេតនា និងកាន់កាប់ ឬដឹកជញ្ជូនអាវុធ ដោយគ្មានការអនុញ្ញាត។
លោកវរសេនីយ៍ឯក ម៉ែន ភិរម្យ មេបញ្ជាការរង កងរាជអាវុធហត្ថខេត្ត ទទួលការងារស្រាវ ជ្រាវ និងបង្ក្រាបបទល្មើស បានឱ្យដឹងថាៈ កម្លាំងមូលដ្ឋានកងរាជអាវុធហត្ថស្រុកភ្នំស្រុក បានបង្ក្រាបក្មេងទំនេីង ចំនួនប្រាំនាក់នេះ ពាក់ព័ន្ធករណីហិង្សាដោយចេតនា និងកាន់កាប់ ឬដឹកជញ្ជូនអាវុធ ដោយគ្មានការអនុញ្ញាត ដែលប្រព្រឹត្តកាលពីវេលាម៉ោង ១៩និង៣០ នាទី ថ្ងៃទី៦ ខែសីហា ឆ្នាំ២០២២ នៅចំណុចលូទី២ ស្ថិតក្នុងភូមិមាត់ស្រះ ឃុំស្រះជីក ស្រុកភ្នំស្រុក ខេត្តបន្ទាយមានជ័យ។
លោកវរសេនីយ៍ត្រី ឈឹម ប៊ុនឈឿម មេបញ្ជាការមូលដ្ឋាន កងរាជអាវុធហត្ថស្រុកភ្នំស្រុក បានឱ្យដឹងថ្ងៃទី៨ សីហានេះថាៈ តាមពាក្យបណ្តឹងឈ្មោះ ខោត មុនា (ហៅជ្រូក) ភេទប្រុស អាយុ១៧ឆ្នាំ មានទីលំនៅភូមិស្រះជីក ឃុំស្រះជីក ស្រុកភ្នំស្រុក ខេត្តបន្ទាយមានជ័យ កម្លាំងរបស់លោក សហការជាមួយកម្លាំងមូលដ្ឋានកងរាជអាវុធហត្ថ ក្រុងសិរីសោភ័ណ បានចុះស្រាវជ្រាវ និងស្ទាក់ឃាត់ខ្លួនជាបន្តបន្ទាប់ បានជនបង្កចំនួន ប្រាំនាក់ ព្រមទាំងដកហូតវត្ថុតាង រួមមាន កាំបិតកែច្នៃ ដងរុំស្កុតពណ៌ខ្មៅ ចំនួន១ដើម ម៉ូតូចំនួន ៣គ្រឿង និងកាំភ្លើងហ្គាស ម៉ាក PIETRO BERETTA MOD 92 FS.9mm ចំនួន១ដើម កំប៉ុងហ្គាស ចំនួន១ និងគ្រាប់ជ័រ ចំនួន១ថង់ ហើយយកមកសួរនាំ នៅមូលដ្ឋានកងរាជអាវុធហត្ថស្រុក ។
ជនសង្ស័យ ជាក្មេងប្រុសទាំង ប្រាំនាក់នោះ រួមមានៈ ១.ឈ្មោះ អឿន វណ្ណឆេង អាយុ១៦ឆ្នាំ ទីលំនៅបច្ចុប្បន្ន ភូមិត្រពាំងថ្មខាងត្បូង ឃុំប៉ោយចារ ស្រុកភ្នំស្រុក ខេត្តបន្ទាយមានជ័យ។ ២.ឈ្មោះ យួត រ៉ាយុត អាយុ១៨ឆ្នាំ ទីលំនៅបច្ចុប្បន្ន ភូមិត្រពាំងថ្ម ខាងត្បូង ឃុំប៉ោយចារ ស្រុកភ្នំស្រុក ។ ៣.ឈ្មោះ អឿន លាបហេង (ហៅផេង) អាយុ១៩ឆ្នាំ ទីលំនៅបច្ចុប្បន្ន ភូមិត្រពាំងថ្មខាងត្បូង ឃុំប៉ោយចារ ស្រុកភ្នំស្រុក។
៤.ឈ្មោះ ណាន សំរេច អាយុ១៧ឆ្នាំ ទីលំនៅបច្ចុប្បន្ន ភូមិប៉ោយស្នួល ឃុំប៉ោយចារ ស្រុកភ្នំស្រុក ។ ៥.ឈ្មោះ ម៉ែន ជូស៊ឹង (ហៅសិញ) អាយុ១៦ឆ្នាំ ទីលំនៅបច្ចុប្បន្ន ភូមិប៉ោយចារ ឃុំប៉ោយចារ ស្រុកភ្នំស្រុក ។
ជនសង្ស័យ បានសារភាពថាៈ ពួកគេបានធ្វើសកម្មភាពជិះម៉ូតូកាន់កាំបិត កាប់ទៅលើ ជនរងគ្រោះ កំពុងជិះម៉ូតូមានគ្នា ចំនួន ពីរនាក់ ។ ជនរងគ្រោះ ឈ្មោះ ខោត មុនា ភេទប្រុស អាយុ១៧ឆ្នាំ មានទីលំនៅបច្ចុប្បន្ន ភូមិស្រះជីក ឃុំស្រះជីក ស្រុកភ្នំស្រុក ខេត្តបន្ទាយមានជ័យ បណ្តាលឲ្យរងរបួសត្រង់ក្បាល ខាងក្រោយ ផ្នែកខាងស្តាំ ចំនួន១កន្លែង និងជនរងគ្រោះម្នាក់ទៀត ឈ្មោះ ឆេង ឆាលី ភេទប្រុស អាយុ១៧ឆ្នាំ រស់នៅភូមិស្រះជីក ឃុំស្រះជីក ស្រុកភ្នំស្រុក ពុំមានរងរបួសទេ ដោយសារពួកគេ មានជម្លោះគ្នាពីមុនមក ។
លោកវរសេនីយ៍ឯក ម៉ែន ភិរម្យ មេបញ្ជាការរង កងរាជអាវុធហត្ថខេត្ត ទទួលការងារស្រាវ ជ្រាវ និងបង្ក្រាបបទល្មើស បានឱ្យដឹងដែរថាៈ ការបង្ក្រាបករណីខាងលើនេះ ក៏ទទួលបាន ការអនុញ្ញាតពីលោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្ត និងមាន ការសម្របសម្រួលនីតិវិធីពីលោក កើត វណ្ណារ៉េត ព្រះរាជអាជ្ញា អមសាលាដំបូងខេត្ត៕/V