Views: 3
ប្រែសម្រួល : កញ្ញាដាលីស (ដេល្លីម៉េល) ៖ លោក អេឡុន ម៉ាស បានជាប់ក្នុងការប៉ះទង្គិចគ្នានៅលើ Twitter ជាមួយប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គីបន្ទាប់ពីមហាសេដ្ឋីបច្ចេកវិជ្ជារូបនេះបានបង្ហោះសំណើដ៏ចម្រូងចម្រាសដើម្បីបញ្ចប់ការឈ្លានពានរបស់រុស្ស៊ី។
នាយកប្រតិបត្តិក្រុមហ៊ុន Tesla ដែលកាលពីថ្ងៃអង្គារបានធ្វើឱ្យរស់ឡើងវិញនូវកិច្ចព្រមព្រៀងតម្លៃ ៤៤ ពាន់លានដុល្លារដើម្បីគ្រប់គ្រង Twitter បានិយាយនៅក្នុង Tweetថាដើម្បីឈានដល់សន្តិភាព រុស្ស៊ីគួរតែត្រូវបានអនុញ្ញាតឱ្យរក្សាទុកឧបទ្វីបគ្រីមេដែលខ្លួនដណ្តើមបានក្នុងឆ្នាំ ២០១៤។ គាត់ក៏បាននិយាយដែរថា អ៊ុយក្រែនគួរតែប្រកាន់យកស្ថានភាពអព្យាក្រឹតដោយទម្លាក់ចោលការសុំចូលរួមជាមួយអង្គការណាតូ បន្ទាប់ពីរុស្ស៊ីកេណ្ឌទ័ពថ្មី។
លោកម៉ាសក៏បានឆ្លងហួសបន្ទាត់ក្រហមសម្រាប់អ៊ុយក្រែននិងអ្នកគាំទ្ររបស់ខ្លួនផងដែរ ដោយលើកឡើងកាលពីថ្ងៃចន្ទថា តំបន់ចំនួនបួនដែលរុស្ស៊ីនឹងកាត់យកបន្ទាប់ពីការធ្វើប្រជាមតិរៀបចំដោយវិមានក្រឹមឡាំង ដែលថ្កោលទោសដោយលោកខាងលិចថាជាការក្លែងបន្លំនោះ គួរតែរៀបចំការបោះឆ្នោតប្រជាមតិឡើងវិញ ដែលរៀបចំដោយអង្គការសហប្រជាជាតិ។
លោកម៉ាសបានកត់សម្គាល់ថា តំបន់គ្រីមេគឺជាផ្នែកមួយនៃប្រទេសរុស្ស៊ីរហូតដល់វាត្រូវបានប្រគល់ឱ្យអ៊ុយក្រែននៅក្រោមសហភាពសូវៀតក្នុងទសវត្សរ៍ឆ្នាំ ១៩៥០ ហើយលោកបាននិយាយថាសង្គ្រាមទឹកចុងក្រោយនឹងមិនទំនងជាឈ្នះទៅខាងអ៊ុយក្រែននោះទេ។
ជំហរទាំងនេះគឺជារឿងបង្កការក្តៅក្រហាយណាស់សម្រាប់លោកហ្សេលេនស្គី ដែលចាត់ទុកជំហរទាំងនោះថាគាំទ្រវិមានក្រឹមឡាំង។ មេដឹកនាំអ៊ុយក្រែនបានសន្យាថានឹងយកដីទាំងអស់ដែលដណ្តើមបានក្នុងសង្គ្រាមមកវិញ ហើយចាត់ទុកគ្រីមេជាទឹកដីរបស់អ៊ុយក្រែនដែលត្រូវដណ្តើមយកមកវិញផងដែរ។
លោកម៉ាសក៏បានធ្វើការស្ទង់មតិតាម Twitter ផងដែរ ដោយសួរថាតើ “ឆន្ទៈរបស់ប្រជាជន” គួរតែសម្រេចចិត្តថាតើតំបន់រឹបអូសទាំងនោះគួរតែនៅជាផ្នែកមួយរបស់អ៊ុយក្រែនឬក្លាយជាផ្នែករបស់រុស្ស៊ី។
ក្នុងការឆ្លើយតបបែបឌឺដងទៅវិញ លោកហ្សេលេនស្គីបានបង្ហោះសារស្ទង់មតិផ្ទាល់ខ្លួននៅលើ Twitter ដោយសួរថា “តើអេឡុន ម៉ាស មួយណាដែលអ្នកចូលចិត្តជាង?” ៖ អេឡុន ម៉ាស “ដែលគាំទ្រអ៊ុយក្រែន” ឬ អេឡុន ម៉ាស “ដែលគាំទ្ររុស្ស៊ី”។
លោកម៉ាសបានឆ្លើយតបទៅលោកហ្សេលេនស្គីថា “ខ្ញុំនៅតែគាំទ្រអ៊ុយក្រែនយ៉ាងខ្លាំង ប៉ុន្តែខ្ញុំជឿថាការកើនឡើងដ៏ធំនៃសង្គ្រាមនឹងបង្កឱ្យមានគ្រោះថ្នាក់យ៉ាងខ្លាំងដល់អ៊ុយក្រែននិងអាចពិភពលោកទាំងមូល”។
បុរសមាត់ដាចនិយាយមិនសំចៃ លោក អង់ឌ្រី មេលីន (Andrij Melnyk) ដែលជាឯកអគ្គរដ្ឋទូតអ៊ុយក្រែនប្រចាំអាល្លឺម៉ង់ បានឆ្លើយតបនឹង Tweet ដើមរបស់លោកម៉ាស ជាមួយពាក្យអាសគ្រាមជាច្រើន។
លោកម៉ាសបានសរសេរនៅក្នុង Tweetមួយទៀតថា “រុស្ស៊ីកំពុងកេណ្ឌទ័ពដោយផ្នែក។ ពួកគេនឹងកេណ្ឌទ័ពសម្រាប់សង្គ្រាមពេញទំហឹង ប្រសិនបើគ្រីមេមានហានិភ័យ។ការស្លាប់ទាំងសងខាងនឹងពិតជាមហន្តរាយណាស់។ រុស្ស៊ីមានប្រជាជនច្រើនជាងអ៊ុយក្រែនបីដង ដូច្នេះជ័យជម្នះសម្រាប់អ៊ុយក្រែនទំនងជាមិនកើតឡើងនៅក្នុងសង្គ្រាមពេញទំហឹងនោះទេ។ ប្រសិនបើអ្នកខ្វល់ពីប្រជាជនអ៊ុយក្រែន ចូរស្វែងរកសន្តិភាព”។
វិមានក្រឹមឡាំងខ្លួនឯងបានសាទរ និងកោតសរសើរលោកម៉ាសចំពោះសំណើរបស់គាត់ ប៉ុន្តែបានព្រមានថា រុស្ស៊ីនឹងមិនដកថយពីការកាត់យកតំបន់របស់អ៊ុយក្រែននោះទេ។
អ្នកនាំពាក្យវិមានក្រឹមឡាំង លោក ឌីមីទ្រី ប៉េស្កូវ បាននិយាយកាលពីថ្ងៃអង្គារថា “វាពិតជាវិជ្ជមានណាស់ដែលមនុស្សដូចជា អេឡុន ម៉ាស កំពុងព្យាយាមស្វែងរកដំណោះស្រាយសន្តិភាព។ ប៉ុន្តែចំពោះប្រជាមតិ ប្រជាពលរដ្ឋបានបញ្ចេញមតិរួចហើយ ហើយវាមិនអាចមានអ្វីផ្សេងទៀតនោះឡើយ”៕
លោកម៉ាសបង្កការក្តៅក្រហាយចំពោះការលើកឡើងថាតើតំបន់រឹបអូសទាំងនោះគួរតែនៅជាផ្នែកមួយរបស់អ៊ុយក្រែន ឬក្លាយជាផ្នែករបស់រុស្ស៊ី
