Views: 3
ប្រែសម្រួល : កញ្ញាដាលីស (ដេល្លីម៉េល) ៖ ផ្ទះអាផាតមេនប្រណីតមួយនៅក្នុងគម្រោងអភិវឌ្ឍន៍ Mount Nicholson របស់ហុងកុង ដែលជាគម្រោងអាផាតមេនថ្លៃបំផុតមួយនៅអាស៊ីថ្មីៗនេះត្រូវបានលក់ខាត ១៣០ លានដុល្លារហុងកុង (១៦,៥៧ លានដុល្លារអាម៉េរិក) ខណៈទីផ្សារផ្ទះប្រណីតក្នុងទីក្រុងនេះកំពុងពិបាកស្ទុះងើបឡើងវិញពីតម្រូវការខ្សោយ។
អ្នកទិញបានទិញផ្ទះទំហំ ៤២៧ ម៉ែត្រការ៉េនេះក្នុងតម្លៃ ៣៩០ លានដុល្លារហុងកុង (៥០ លានដុល្លារអាម៉េរិក) នៅចុងខែមករានេះបើយោងតាមឯកសារដែលដាក់នៅការិយាល័យចុះបញ្ជីដីធ្លី។ទិន្នន័យបង្ហាញថា អ្នកលក់បានទិញផ្ទះនេះក្នុងតម្លៃ ៥២០ លានដុល្លារហុងកុង (៦៦,៥៧ លានដុល្លារអាម៉េរិក) ក្នុងឆ្នាំ ២០១៨។
ទីផ្សារផ្ទះប្រណីតរបស់ហុងកុងបានស្ថិតក្រោមសម្ពាធចំពេលមានការរឹតបន្តឹងទប់ស្កាត់កូវីដ១៩និងការកើនឡើងអត្រាការប្រាក់។
យោងតាមរបាយការណ៍ចុងក្រោយពីភ្នាក់ងារអចលនទ្រព្យ Centaline បានឱ្យដឹងថា ចំនួននៃការលក់លំនៅដ្ឋានប្រណីតក្នុងរយៈពេល ១០ ខែដំបូងក្នុងឆ្នាំ ២០២២ បានធ្លាក់ចុះ ៦០ភាគរយធៀបនឹងឆ្នាំមុន។
សមាមាត្រនៃជនជាតិចិនដីគោក ដែលជាប្រភពដ៏សំខាន់នៃអ្នកទិញនៅក្នុងទីផ្សារផ្ទះប្រណីត បានឈានដល់កម្រិតទាបថ្មីមួយក្នុងឆ្នាំ ២០២២ នេះបើយោងតាមក្រុមហ៊ុនប្រឹក្សាអចលនទ្រព្យ Savills ។
ក្រុមហ៊ុនបានបន្ថែមថា ការបិទព្រំដែនដែលអូសបន្លាយពេលយូរ ទស្សនវិស័យអាជីវកម្មអាប់អួរ និងការផ្លាស់ប្តូរគោលនយោបាយបានប៉ះពាល់ដល់ចំណង់របស់ជនជាតិចិនដីគោកដែលមានទ្រព្យសម្បត្តិសម្រាប់ផ្ទះថ្លៃៗនៅក្នុងទីក្រុងហុងកុង៕
ទីផ្សារផ្ទះប្រណីតរបស់ហុងកុងបានស្ថិតក្រោមសម្ពាធចំពេលមានការរឹតបន្តឹងទប់ស្កាត់កូវីដ១៩និងការកើនឡើងអត្រាការប្រាក់