Views: 1
ប្រែសម្រួលៈបំណង(ស្ត្រេតថែមស៍)៖ មន្ត្រីមន្ទីរពេទ្យនិងសាក្សីបាននិយាយថា ការផ្ទុះគ្រាប់បែកនៅក្នុងវិថីដ៏មមាញឹកមួយក្នុងទីក្រុងកាប៊ុលរបស់អាហ្វហ្គានីស្ថានកាលពីថ្ងៃសៅរ៍ទី៦សីហាបានសម្លាប់មនុស្សប្រាំបីនាក់និងរបួស២២នាក់ទៀត។
គ្រាប់បែកបានផ្ទុះនៅសង្កាត់ខាងលិចក្រុង កន្លែងដែលសមាជិកក្រុមអ៊ីស្លាមនិកាយភាគតិចស៊ីអាយតែងជួបជុំគ្នា។
ក្រុមរដ្ឋអ៊ីស្លាម ដែលជាក្រុមសកម្មប្រយុទ្ធរបស់ពួកអ៊ីស្លាមនិកាយស៊ុននី បានអះអាងទទួលខុសត្រូវចំពោះការវាយប្រហារនេះ។
មន្ត្រីមន្ទីរពេទ្យម្នាក់បានបញ្ជាក់ប្រាប់សារព័ត៌មានថា មនុស្សប្រាំបីនាក់បានស្លាប់និង២២នាក់រងរបួស នៅពេលអ្នកនាំពាក្យក្រសួងមហាផ្ទៃបាននិយាយថា ខ្លួនបញ្ជូនក្រុមស៊ើបអង្កេតមួយទៅកាន់កន្លែងកើតហេតុដើម្បីជួយអ្នរងរបួសនិងវាយតំលៃការខូចខាត។
ការវាយប្រហារនេះបានកើតឡើងមួយថ្ងៃបន្ទាប់ពីមនុស្សយ៉ាងតិចប្រាំបីនាក់ត្រូវបានសម្លាប់និង១៨នាក់រងរបួសក្នុងការផ្ទុះមួយនៅទីក្រុងកាប៊ុល ដែលក្រុមរដ្ឋអ៊ីស្លាមប្រកាសទទួលខុសត្រូវផងដែរ។
សូមបញ្ជាក់ថា ក្រុមរដ្ឋអ៊ីស្លាមអាហ្វហ្គានីស្ថានមិនកាន់កាប់គ្រប់គ្រងទឹកដីអាហ្វហ្គានីស្ថានមួយចំណែកណាទេ តែក្រុមតូចៗរបស់ខ្លួនវាយប្រហារក្រុមសាសនាភាគតិចនៅក្នុងប្រទេសព្រមទាំងក្រុមល្បាតរបស់ពួកតាលីបង់ដែលកំពុងកាន់អំណាចផងដែរ។
អាជ្ញាធរតាលីបង់ដែលគ្រប់គ្រងដោយពួកអ៊ីស្លាមនិកាយស៊ុននី បាននិយាយថាខ្លួននឹងផ្តល់ការការពារបន្ថែមដល់ព្រះវិហារនិងទីតាំងផ្សេងៗរបស់ក្រុមអ៊ីស្លាមនិកាយស៊ីអាយ៕
យុទ្ធជននិងកងសន្តិសុខតាលីបង់ នៅកន្លែងផ្ទុះគ្រាប់ក្នុងក្រុងកាប៊ុលកាលពីថ្ងៃសៅរ៍