Views: 1
ប្រែសម្រួល : កញ្ញាដាលីស (ដេល្លីម៉េល) ៖ រដ្ឋមន្ត្រីរដ្ឋាភិបាលមួយរូបបាននិយាយថា ការផ្ទុះឡើងនៃជំងឺអាសន្នរោគដ៏អាក្រក់បំផុតដែលប៉ះពាល់ដល់ប្រទេសម៉ាឡាវីក្នុងរយៈពេលពីរទសវត្សរ៍មកនេះបានឆក់យកជីវិតមនុស្សចំនួន ៧៥០ នាក់ ខណៈប្រធានអង្គការសុខភាពពិភពលោក (WHO)បានពណ៌នាប្រទេសអាហ្វ្រិកភាគអាគ្នេយ៍នេះថាជាប្រទេសរងគ្រោះខ្លាំងបំផុតចំពេលកំពុងមានការរីករាលដាលជំងឺកូវីដជាសកល ដែលកំពុងឆ្លងខ្លាំងជាងមុននិងសម្លាប់មនុស្សដូចសព្វមួយដង។
រដ្ឋមន្ត្រីសុខាភិបាលម៉ាឡាវី លោកស្រី ឃុមប៊ីហ្សេ កាន់ដូដូ ឈីប៉ុនដា (Khumbize Kandodo Chiponda) កាលពីថ្ងៃព្រហស្បតិ៍ទី១២មករាបានបញ្ជាឱ្យបិទអាជីវកម្មជាច្រើនកន្លែងដែលខ្វះទឹកស្អាត បង្គន់អនាម័យ និងកន្លែងចោលសំរាមដែលគ្មានអនាម័យ ព្រមទាំងបានប្រកាសដាក់កំហិតលើការលក់អាហារចម្អិនទុកជាមុនទៀតផង។
លោកស្រីឈីប៉ុនដាបាននិយាយនៅក្នុងសេចក្តីថ្លែងការណ៍មួយថា “យើងបន្តកត់ត្រាការកើនឡើងករណីឆ្លងនៅទូទាំងប្រទេសបើទោះបីជាមានសញ្ញានៃការថយចុះការឆ្លងនិងការស្លាប់នៅក្នុងតំបន់មួយចំនួនក៏ដោយ” និងបានជំរុញឱ្យប្រកាន់ខ្ជាប់នូវវិធានការអនាម័យ។
កាលពីថ្ងៃពុធ លោកស្រីឈីប៉ុនដាបាននិយាយថា មនុស្ស ១៧ នាក់បានស្លាប់ដោយសារករណីថ្មីចំនួន ៥៨៩ នៃជំងឺឆ្លងតាមទឹកនេះ “ក្នុងរយៈពេល ២៤ ម៉ោងចុងក្រោយ”។លោកស្រីបាននិយាយថាប្រទេសនេះបានកត់ត្រាករណីឆ្លងចំនួន ២២.៧៥៩ នាក់ ចាប់តាំងពីការផ្ទុះជំងឺអាសន្នរោគបានចាប់ផ្តើមក្នុងខែមីនាឆ្នាំមុន។
តួលេខបង្ហាញថា មនុស្សប្រហែល ១៥ នាក់បានស្លាប់ជារៀងរាល់ថ្ងៃក្នុងរយៈពេលប៉ុន្មានថ្ងៃថ្មីៗនេះ ដោយករណីស្លាប់ចំនួន ១៥៥ នាក់ត្រូវបានកត់ត្រាក្នុងរយៈពេល ១០ ថ្ងៃចុងក្រោយ។ មនុស្សជិត ១.០០០ នាក់កំពុងព្យាបាលនៅមន្ទីរពេទ្យគិតត្រឹមថ្ងៃពុធទី១១មករា។
ក្នុងសប្តាហ៍នេះ អគ្គនាយក WHO លោក តេត្រូស អាដាណុម ហ្គេប្រេយ៉េស៊ូស បាននិយាយថា ប្រទេសចំនួន ៣១ បានរាយការណ៍អំពីការផ្ទុះជំងឺអាសន្នរោគចាប់តាំងពីខែធ្នូ ដែលកើនឡើង ៥០ ភាគរយធៀបនឹងឆ្នាំមុន៕
បុគ្គលិកពេទ្យម៉ាឡាវីកំពុងព្យាបាលអ្នកជំងឺអាសន្នរោគកាលពីថ្ងៃពុធ