Views: 2
ប្រែសម្រួលៈបំណង(ដេល្លីម៉េល)៖ ហ្វូងមនុស្សពោរពេញដោយកំហឹងបាននាំគ្នាចេញមកតាមដងវិថីក្នុងទីក្រុងសៀងហៃកាលពីដើមថ្ងៃអាទិត្យ និងវីដេអូក្នុងបណ្តាញសង្គមបានបង្ហាញការតវ៉ាប្រឆាំងនៅក្នុងទីក្រុងជាច្រើននៅទូទាំងប្រទេសចិន នៅពេលសាធារណជនកាន់តែមិនសប្បាយចិត្តនឹងគោលនយោបាយសូន្យកូវីដដ៏តឹងតែងរបស់រដ្ឋាភិបាល។
អគ្គិភ័យមួយកាលពីថ្ងៃព្រហស្បតិ៍នៅក្នុងទីក្រុងអ៊ុយរូមគីនៃតំបន់ស៊ីនជាំងរបស់ចិនបានសម្លាប់មនុស្សដប់នាក់។វាបង្កអោយមានកំហឹងនៅពេលអ្នកប្រើប្រាស់បណ្តាញសង្គមបន្ទោសលើការបិទខ្ទប់ប្រឆាំងកូវីដ១៩ ថាបានរារាំងការងារជួយសង្គ្រោះ។
ចិនជាប្រទេសមហាអំណាចចុងក្រោយគេដែលនៅអនុវត្តយុទ្ធសាស្ត្រសូន្យកូវីដ ដោយអាជ្ញាធរត្រូវធ្វើការបិទខ្ទប់ភ្លាមៗ ធ្វើចត្តាឡីស័ករយៈពេលយូរនិងធ្វើតេស្តិ៍ទ្រង់ទ្រាយធំៗដើម្បីលុបបំបាត់ការផ្ទុះជំងឺឆ្លងនេះភ្លាមៗ។ទោះជាអនុវត្តវិធានការតឹងតែងជាងគេ តែចំនួនឆ្លងនៅប៉ុន្មានថ្ងៃចុងក្រោយនេះបានហក់ឡើងខ្ពស់បំផុតដែលប្រទេសនេះមិនដែលធ្លាប់ជួបគិតចាប់តាំងពីផ្ទុះកូវីដ១៩លើកដំបូងកាលពីជិតបីឆ្នាំមុន។
ហ្វូងមនុស្សខឹងក្រេវក្រោធបាននាំគ្នាចេញមកតាមដងវិថីនៃក្រុងសៀងហៃដើម្បីប្រឆាំងនឹងការអនុវត្តវិធាការប្រឆាំងកូវីដ១៩ដ៏តឹងរ៉ឹង
សាក្សីបាននិយាយថាមានការប៉ះទង្គិចបន្តិចបន្តួចជាមួយប៉ូលីសនិងអ្នកតវ៉ាប្រឆាំងខ្លះត្រូវប៉ូលីសឃាត់ខ្លួននៅជិតភ្លឺថ្ងៃអាទិត្យតែពេលថ្ងៃទីក្រុងសៀងហៃមានសភាពស្ងាត់ធម្មតាជាមួយនឹងវត្តមានសន្តិសុខក្រាស់ក្រែល។
សកម្មភាពតវ៉ាប្រឆាំងនឹងវិធានការទប់ស្កាត់កូវីដនេះក៏ត្រូវបានរាយការណ៍នៅក្រុងប៉េកាំង ក្រុងណាន់ជីញ(Nanjing)អ៊ុយរូមគី(Urumqi)ក្វាងចូវ និងអ៊ូហាន។
ចិននៅថ្ងៃអាទិត្យនេះបានរាយការណ៍ចំនួនឆ្លងកូវីដថ្មីកើនឡើងដល់កំរិតឯតទគ្គកម្មជាថ្មី គឺ៣៩.៥០៦នាក់សំរាប់ថ្ងៃសៅរ៍ ដោយនៅពីក្រោយតែអាម៉េរិកប៉ុណ្ណោះ(៤២.០០០នាក់)៕
រូបយកចេញពីវីដេអូបង្ហាញការប្រឆាំងតវ៉ានៅក្រុងប៉េកាំងនិងអ៊ុយរូមគី