Views: 4
ប្រែសម្រួល : កញ្ញាដាលីស (ស្ត្រេតថែមស៍) ៖ រូបភាពតាមបណ្តាញសង្គមបានបង្ហាញ មនុស្សរាប់សិបនាក់ចូលរួមក្នុងការតវ៉ាដ៏កម្រមួយនៅក្នុងមជ្ឈមណ្ឌលបច្ចេកវិជ្ជាចិនភាគខាងត្បូងគឺទីក្រុងសិនចិន បន្ទាប់ពីក្រុមមន្ត្រីបានប្រកាសពីការបិទខ្ទប់ភ្លាមៗ ជុំវិញករណីកូវីដ១៩តែមួយចំនួនតូចសោះ។
ទីក្រុងធំដែលមានមនុស្សជាង ១៨ លាននាក់នេះបានរាយការណ៍ករណីកូវីដចំនួន១០ប៉ុណ្ណោះកាលពីថ្ងៃអង្គារទី២៧កញ្ញា ប៉ុន្តែក្រុមមន្ត្រីនៅតែបញ្ជាឱ្យអ្នកស្រុកនៅក្នុងខ័ណ្ឌចំនួនបីស្នាក់នៅក្នុងផ្ទះខណៈចិនប្រកាន់ខ្ជាប់នូវគោលនយោបាយកូវីដសូន្យដ៏តឹងរ៉ឹងរបស់ខ្លួន។
ក្រុមមន្ត្រីក៏ស្ថិតនៅក្រោមសម្ពាធផងដែរដើម្បីលុបបំបាត់ការផ្ទុះកូវីដឱ្យបានឆាប់រហ័សបំផុត នៅមុនពេលកិច្ចប្រជុំនយោបាយដ៏សំខាន់នៅទីក្រុងប៉េកាំងនៅខែក្រោយ។
វីដេអូ ដែលផ្សព្វផ្សាយនៅលើវេទិកាស្រដៀង Twitter និង Instagram របស់ចិន គឺ Weibo ចាប់តាំងពីថ្ងៃចន្ទ ដែលផ្ទៀងផ្ទាត់ដោយទីភ្នាក់ងារសារព័ត៌មាន AFPបានបង្ហាញពីការស្រែកច្រៀងពាក្យស្លោកពីមនុស្សរាប់សិបនាក់អំពី “ការដកចេញការបិទខ្ទប់ទប់ស្កាត់កូវីដ” ខណៈប៉ូលិសតម្រង់ជាជួរៗនៅក្នុងឈុតវេជ្ជសាស្ត្រនាំគ្នាឈរមើល។
ក្នុងឃ្លីបមួយ ស្ត្រីម្នាក់បានស្រែកថា “ប៉ូលិសកំពុងវាយប្រជាជន”។
AFP បានបញ្ជាក់ថា ការតវ៉ាបានកើតឡើងនៅសង្កាត់សាវៃ (Shawei) នៅក្នុងខ័ណ្ឌហ្វ៊ុយធៀន (Futian) កន្លែងដែលមូលដ្ឋានរដ្ឋបាលក្រុងមានទីតាំងស្ថិតនៅ។
ប្រតិបត្តិកររថភ្លើងក្រោមដីរបស់ក្រុងនៅសង្កាត់សាវៃបាននិយាយនៅក្នុងសេចក្តីថ្លែងការណ៍មួយថា ស្ថានីយរថភ្លើងក្រោមដីរបស់សង្កាត់សាវៃត្រូវបានបិទចាប់ពីម៉ោង ១០យប់កាលពីថ្ងៃចន្ទរហូតដល់មានការជូនដំណឹងបន្ថែម “ដើម្បីជាផ្នែកមួយនៃការការពារ និងការគ្រប់គ្រងជំងឺរាតត្បាត”៕
ការតវ៉ាបានកើតឡើងនៅសង្កាត់សាវៃនៅក្នុងខ័ណ្ឌហ្វ៊ុយធៀន ក្រុងសិនចិនកាលពីយប់ថ្ងៃចន្ទ