Views: 3
ប្រែសម្រួល : កញ្ញាដាលីស (ដេល្លីម៉េល) ៖ កុបកម្មបានផ្ទុះឡើងនៅក្នុងទីក្រុងជាច្រើនរបស់បែលហ្ស៊ិកនិងហូឡង់ បន្ទាប់ពីជ័យជម្នះ ២-០ដ៏ខកចិត្តរបស់ម៉ារ៉ុកលើបែលហ្ស៊ិកក្នុងព្រឹត្តិការណ៍វើលខាប់កាលពីថ្ងៃអាទិត្យទី២៧វិច្ឆិកា។
ប៉ូលិសបានឃាត់ខ្លួនមនុស្សរាប់សិបនាក់ បន្ទាប់ពីពួកគេបានបាញ់ទឹកនិងបាញ់ឧស្ម័នបង្ហូរទឹកភ្នែកដើម្បីបំបែកហ្វូងមនុស្សនៅទីក្រុងព្រុចសែល និងប្រាំបីនាក់ទៀតនៅក្នុងទីក្រុងអានវើប (Antwerp)ភាគខាងជើង។ មន្ត្រីប៉ូលិសពីរនាក់បានរងរបួសនៅក្នុងទីក្រុងកំពង់ផែរ៉ូតធឺដាម (Rotterdam) ប្រទេសហូឡង់។ គិតត្រឹមយប់ថ្ងៃអាទិត្យភាពស្ងប់ស្ងាត់មិនស្រណុកចិត្តបានវិលត្រឡប់មកទីក្រុងដែលកើតមានអំពើហិង្សាភាគច្រើន។
កុបកររាប់សិបនាក់បានលើកឡានក្រឡាប់ផ្កាប់ផ្ងារួចដុតចោល ដុតម៉ូតូអគ្គិសនី និងគប់ដុំថ្មដាក់រថយន្ត។ អ្នកនាំពាក្យប៉ូលិសក្រុងព្រុចសែល លោកស្រី អ៊ីលសេ វ៉ាន់ ដេ គីរី (Ilse Van de Keere) បាននិយាយថា ប៉ូលិសបានសម្រុកចូល បន្ទាប់ពីមនុស្សម្នាក់បានរងរបួសផ្ទៃមុខ។
អភិបាលក្រុងព្រុចសែល លោក ហ្វីលីព ក្លូស (Philippe Close) បានជំរុញឱ្យប្រជាជននៅឆ្ងាយពីកណ្តាលក្រុង ហើយនិយាយថាអាជ្ញាធរកំពុងប្រឹងប្រែងអស់ពីសមត្ថភាពដើម្បីរក្សាសណ្តាប់ធ្នាប់នៅតាមដងផ្លូវ។ សូម្បីតែផ្លូវរថភ្លើងក្រោមដីនិងរថភ្លើងលើដីគោកក៏ត្រូវរំខានដោយសារបទបញ្ជារបស់ប៉ូលិសដែរ។
លោកក្លូសបាននិយាយថា “អ្នកទាំងនោះមិនមែនជាអ្នកគាំទ្រទេ ពួកគេជាកុបករ។ អ្នកគាំទ្រម៉ារ៉ុកនៅទីនោះដើម្បីអបអរសាទរ”។ ក៏មានការរំខាននៅក្នុងទីក្រុងអានវើបនិងទីក្រុងលីច (Liege) ផងដែរ។
រដ្ឋមន្ត្រីមហាផ្ទៃបែលហ្ស៊ិក លោកស្រី អានណេលីស វើលីនដិន (Annelies Verlinden) បាននិយាយថា”សោកស្ដាយដែលឃើញរបៀបដែលបុគ្គលមួយចំនួនបំពានស្ថានភាពដើម្បីប្រព្រឹត្តរឿងកម្រោលចូល”។
ប៉ូលិសនៅក្នុងប្រទេសហូឡង់ដែលនៅជិតខាងបាននិយាយថា អំពើហិង្សាបានផ្ទុះឡើងនៅក្នុងទីក្រុងកំពង់ផែរ៉ូតធឺដាម ដោយក្រុមមន្ត្រីបង្ក្រាបកុបកម្មបានព្យាយាមបំបែកក្រុមអ្នកគាំទ្របាល់ទាត់ចំនួន ៥០០ នាក់ ដែលគប់កាំជ្រួចនិងកញ្ចក់ដាក់ប៉ូលិស។ ប្រព័ន្ធផ្សព្វផ្សាយក៏បានរាយការណ៍ពីកោលាហលនៅក្នុងរដ្ឋធានីអាំស្ទើដាំនិងទីក្រុងឡាអេផងដែរ៕
កុបកម្មផ្ទុះនៅទីក្រុងនានារបស់បែលហ្ស៊ិក ក្រោយជម្រើសជាតិពួកគេចាញ់ម៉ារ៉ុក២-០កាលពីថ្ងៃអាទិត្យ។កុបកររាប់សិបនាក់បានលើកឡានក្រឡាប់ផ្កាប់ផ្ងារួចដុតចោល ដុតម៉ូតូអគ្គិសនី និងគប់ដុំថ្មដាក់រថយន្ត
