Views: 2
ប្រែសម្រួល : កញ្ញាដាលីស (ស៊ីនហួ) ៖ ប្រតិបត្តិករផ្លូវដែកចិនបាននិយាយថា គិតត្រឹមថ្ងៃសុក្រទី២ធ្នូ ផ្លូវដែកចិន-ឡាវបានដឹកអ្នកដំណើរជាង ៨,៥ លាននាក់ និងដឹកជញ្ជូនទំនិញចំនួន ១១,២ លានតោនចាប់តាំងពីការបើកដំណើរការកាលពីមួយឆ្នាំមុន។
យោងតាមក្រុមហ៊ុន China State Railway Group Co., Ltd បានឱ្យដឹងថា ផ្លូវរថភ្លើងនេះបានផ្តល់នូវមធ្យោបាយធ្វើដំណើរដ៏ងាយស្រួលនិងមានប្រសិទ្ធភាពសម្រាប់អ្នកស្រុកមកពីប្រទេសទាំងពីរ ហើយក៏បានជួយសម្រួលដល់ការដឹកជញ្ជូនទំនិញរវាងប្រទេសចិននិងសមាគមប្រជាជាតិអាស៊ីអាគ្នេយ៍ផងដែរ។
សម្រាប់ផ្នែកនៅក្នុងប្រទេសចិន ផ្លូវរថភ្លើងនេះបានដឹកអ្នកដំណើរចំនួន ៧,២ លាននាក់ចាប់តាំងពីការបើកដំណើរការ ដោយចំនួនអ្នកដំណើរប្រចាំថ្ងៃកើនឡើងដល់ ៥០.០០០ នាក់។ ទន្ទឹមនឹងនោះ ក្រុមហ៊ុនបាននិយាយថា ផ្នែកនៅក្នុងប្រទេសឡាវបានដឹកអ្នកដំណើរចំនួន ១,៣ លាននាក់ ជាមួយនឹងចំនួនអ្នកដំណើរប្រចាំថ្ងៃកើនឡើងដល់ ៨.២០០ នាក់។
របាយការណ៍បាននិយាយថា ក្នុងចំណោមទំនិញដែលបានដឹកជញ្ជូន បរិមាណដឹកជញ្ជូនឆ្លងកាត់ព្រំដែនបានឈានដល់ ១,៩ លានតោន ដែលរួមមានទំនិញជាង ១.២០០ ប្រភេទដូចជា ជី គ្រឿងអគ្គិសនី ផលិតផលបន្ទះស្រូបពន្លឺព្រះអាទិត្យ និងផ្លែឈើ។
ផ្លូវដែកចិន-ឡាវតភ្ជាប់ទីក្រុងគុនមីងក្នុងខេត្តយូនណានជាមួយរដ្ឋធានីវៀងចន្ទន៍របស់ឡាវ។ ផ្លូវដែកប្រវែង ១.០៣៥គីឡូម៉ែត្រដែលជាគម្រោងដ៏សំខាន់នៃកិច្ចសហប្រតិបត្តិការអំពីក្រវាត់និងផ្លូវគុណភាពខ្ពស់ បានចាប់ផ្តើមដំណើរការនៅថ្ងៃទី ៣ ខែធ្នូ ឆ្នាំ ២០២១៕
រូបភាពរថភ្លើងកំពុងរត់នៅជាយក្រុងវៀងចន្ទន៍កាលពីថ្ងៃទី២៥ វិច្ឆិកា ឆ្នាំ២០២២
