Views: 2
ប្រែសម្រួលៈបំណង(ដេល្លីម៉េល)៖ ប៉ូលីសបាននិយាយថាមនុស្សបីនាក់ត្រូវបានសម្លាប់និងបួននាក់រងរបួសក្នុងការបាញ់ប្រហារនៅផ្ទះជួលមួយនៅសង្កាត់អ្នកមានក្នុងក្រុងឡូសអ៊ែនជើឡេសកាលពីថ្ងៃសៅរ៍។
ការបាញ់ប្រហារបានកើតឡើងនៅម៉ោង២កន្លះជិតភ្លឺនៅក្នុងសង្កាត់ បេវើលី ក្រេស(Beverly Crest)។វាជាការបាញ់ប្រហារសម្លាប់មនុស្សលើកទីប្រាំមួយនៅកាលីហ្វ័រញ៉ានៅក្នុងខែមករានេះ។
មន្ត្រីនៅនាយកដ្ឋានប៉ូលីសឡូសអ៊ែនជើឡេស បាននិយាយថាមនុស្សបីនាក់ត្រូវបានសម្លាប់នៅក្នុងរថយន្តមួយ។ជនរងគ្រោះបួននាក់ត្រូវនាំទៅកាន់មន្ទីរពេទ្យដោយពីរនាក់តាមរថយន្តឯកជននិងពីរនាក់ទៀតត្រូវបានឡានពេទ្យ។
ពួកអ្នកស៊ើបអង្កេតកំពុងព្យាយាមកំណត់ថាតើមានភាគីពាក់ព័ន្ធណាមួយនៅក្នុងផ្ទះជួល ឬក៏មានការជួបជុំអ្វីនៅទីនោះដែរឬអត់។
ប៉ូលិសបិទតំបន់ប្លុកផ្ទុះជួល កន្លែងដែលមនុស្សបីនាក់ត្រូវបានបាញ់សម្លាប់កាលពីថ្ងៃសៅរ៍
ការបាញ់ប្រហារកាលពីព្រឹកថ្ងៃសៅរ៍បន្ថែមលើការសម្លាប់រង្គាលនៅក្លិបរាំមួយនៅជាយក្រុងឡូសអ៊ែនជើឡេសកាលពីសប្តាហ៍មុនដែលបណ្តាលអោយស្លាប់មនុស្ស១១នាក់ និងរបួសប្រាំបួននាក់ព្រមទាំងការបាញ់សម្លាប់នៅកសិដ្ឋានពីរក្នុងទីប្រជុំជនហាហ្វមូនបេក្នុងរដ្ឋកាលីហ្វ័រញ៉ា ដែលបានសម្លាប់មនុស្សប្រាំពីរនាក់។
អំពើហិង្សាដោយកាំភ្លើងក្នុងខែនេះជាការវាយសំពងដ៏ធ្ងន់មួយលើរដ្ឋកាលីហ្វ័រញ៉ាដែលមានច្បាប់កាំភ្លើងតឹងរឹងបំផុតនៅក្នុងសហរដ្ឋអាម៉េរកនិងក៏ធ្លាប់តែកន្លែងមានអត្រាស្លាប់ដោយកាំភ្លើងទាបជាងគេនៅសហរដ្ឋអាម៉េរិក។
សូមបញ្ជាក់ថា កាលពីឆ្នាំ២០២២ អាម៉េរិកបានកត់ត្រាឃើញការបាញ់ប្រហារសម្លាប់មនុស្សជាង៦០០លើកដែលក្នុងមួយលើកៗមានអ្នកស្លាប់ឬរងរបួសយ៉ាងតិចបួននាក់៕
