Views: 1
ប្រែសម្រួលៈបំណង(ដេល្លីម៉េល)៖ បុរសម្នាក់បានបំផ្ទុះខ្លួនឯងកាលពីថ្ងៃពុធទី៧ធ្នូ នៅស្ថានីយប៉ូលីសមួយនៅលើកោះចាវ៉ារបស់ឥណ្ឌូនេស៊ីដោយបានសម្លាប់នាយប៉ូលិសម្នាក់ និងបង្ករបួសមនុស្សប្រាំពីរនាក់ទៀត ក្នុងការវាយប្រហារដែលគេបន្ទោសលើពួកសកម្មប្រយុទ្ធអ៊ីស្លាម។
មេប៉ូលីសក្រុងបានឌុង(Bandung)លោកអាសវីន ស៊ីប៉ាយុង(Aswin Sipayung)បាននិយាយថា ជនវាយប្រហារបានបើកទោចក្រយានយន្តចូលក្នុងស្ថានីយប៉ូលីសប៉ូលីសនិងបំផ្ទុះគ្រឿងផ្ទុះជាប់នឹងខ្លួន នៅពេលប៉ូលីសកំពុងតម្រង់ជួរពេលព្រឹក។«នាយប៉ូលីសម្នាក់បានស្លាប់និងប៉ូលីសប្រាំមួយនាក់ទៀតត្រូវបានបញ្ជូនទៅកាន់មន្ទីរពេទ្យជាមួយនឹងជនស៊ីវិលម្នាក់»។
រូបចែកចាយក្នុងបណ្តាញសង្គមបង្ហាញបំណែកសាកសពនៅក្បែរបន្ទប់នៃស្ថានីយប៉ូលីសដែលខូចខាតនៅពេលទូរទស្សន៍បង្ហាញផ្សែងពណ៌សហុយចេញពីអាគារប៉ូលីសនិងមនុស្សរត់រកកន្លែងលាក់ខ្លួនទាំងភិតភ័យក្រោយការផ្ទុះដ៏ខ្លាំង។
ប៉ូលីសកំពុងស៊ើបអង្កេតថាតើជនវាយប្រហារមានជាប់ពាក់ព័ន្ធនឹងក្រុមនិយមជ្រុលណាមួយដែរឬអត់។
មេប៉ូលិសខេត្តចាវ៉ាខាងលិច បាននិយាយថា ជនវាយប្រហារបាននាំមកគ្រាប់បែកពីរ តែផ្ទុះតែមួយ។
បុរសម្នាក់ឈ្មោះ ស៊ុនតាណា(Suntana)បានប្រាប់សារព័ត៌មានថា ប៉ូលិសបានរកឃើញក្រដាសមួយបិទជាប់នឹងទោចក្រយានយន្តរបស់ជនល្មើស ជាមួយនឹងអក្សរថា« ក្រមព្រហ្មទណ្ឌជាច្បាប់ពួកអត់សាសនា ចូរនាំគ្នាប្រយុទ្ធនឹងការអនុវត្តច្បាប់អាក្រក់»។
សូមបញ្ជាក់ថា កាលពីថ្ងៃអង្គារសភាឥណ្ឌូនេស៊ីទើបអនុម័តច្បាប់ព្រហ្មទណ្ឌថ្មីមួយ ដែលហាមការរួមភេទក្រៅចំណងអាពាហ៍ពិពាហ៍និងហាមការប្រមាថប្រធានាធិបតី រួមទាំងស្ថាប័នរដ្ឋ។
ឥណ្ឌូនេស៊ីក៏កំពុងប្រឈមដោះស្រាយនឹងពួកសកម្មប្រយុទ្ធអ៊ីស្លាមចាប់តាំងពីការបំផ្ទុះគ្រាប់បែកនៅកោះបាលីកាលពីឆ្នាំ២០០២ សម្លាប់មនុស្ស២០២នាក់ភាគច្រើនជាទេសចរបរទេស។ការវាយប្រហារផ្តោតលើជនបរទេស ត្រូវបានជំនួសដោយការវាយប្រហារតូចៗនៅប៉ុន្មានឆ្នាំចុងក្រោយនេះលើគោលដៅរដ្ឋាភិបាល កងកម្លាំងប៉ូលីសនិងក្រុមប្រឆាំងភេរវកម្ម រួមទាំងមនុស្សណាដែលពួកសកម្មប្រយុទ្ធគិតថាជាជនឥតសាសនា(ទមិឡ)។
ការវាយប្រហារស្រដៀងគ្នាបានកើតឡើងនៅឆ្នាំ២០១៩នៅពេលជនវាយប្រហារដោយគ្រាប់បែកអត្តឃាតម្នាក់បំផ្ទុះខ្លួនឯងនៅស្ថានីយប៉ូលីសមួយនៅក្រុងមេដាន(Medan)ដោយបណ្តាលអោយរបួសមនុស្សប្រាំមួយនាក់។
កាលពីឆ្នាំ២០១៨ គ្រួសារពីរបានវាយប្រហារដោយគ្រាប់បែកអត្តឃាតបន្តបន្ទាប់នៅទីក្រុងស៊ូរ៉ាបាយ៉ា(Surabaya)ដោយបានសម្លាប់មនុស្សជាងដប់នាក់និងកាលពីឆ្នាំមុន ជនវាយប្រហារពីរនាក់បានបំផ្ទុះខ្លួនឯងនៅកោះស៊ូឡាវ៉េស៊ីរបស់ឥណ្ឌូនេស៊ី ដោយបណ្តាលអោយរបួសមនុស្ស២០នាក់។ជនវាយប្រហារខាងលើសុទ្ធតែមានពាក់ព័ន្ធនឹងក្រុមជ្រុលនិយមនិងក្រុមភេរវកម្ម៕
ប៉ូលីសបិទតំបន់ជុំវិញស្ថានីយប៉ូលីសដែលរងការវាយប្រហារកាលពីថ្ងៃពុធ
