Views: 2
ដោយ: ភ្នំស្វាយ/បន្ទាយមានជ័យ: ខណៈវិញ្ញាសារប្រឡងគ្រប់មុខវិជ្ជាបញ្ជូនដល់ខេត្តបន្ទាយមានជ័យរួចរាល់ តំណាងក្រសួងអប់រំ យុវជននិងកីឡា រដ្ឋបាលខេត្ត មន្ទីរអប់រំ យុវជននិងកីឡា និងអង្គភាពសមត្ថកិច្ចកងកម្លាំងពាក់ព័ន្ធកាលពីថ្ងៃទី០៣ ខែធ្នូ បានបើកកិច្ចប្រជុំត្រួតពិនិត្យការងាររៀបចំផែនការការពារសន្តិសុខប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ថ្ងៃទី០៥ ខែធ្នូ ឆ្នាំ២០២២ស្អែកនេះ ។ ដោយឡែកនាថ្ងៃទី០៤ ខែធ្នូនេះ បេក្ខជន បេក្ខនារីបានបន្តទៅពិនិត្យមើលឈ្មោះរបស់ខ្លួនតាមបន្ទប់ និងមណ្ឌលប្រឡងទាំង០៧ នៅក្នុងក្រុងសិរីសោភ័ណ ។
កិច្ចប្រជុំនោះដឹកនាំដោយលោក ឱម សិទ្ធី អគ្គនាយករង នៃអគ្គនាយកដ្ឋានអប់រំ នៃក្រសួងអប់រំ យុវជននិងកីឡា-ជាប្រធានគណៈមេប្រយោគទូទាំងប្រទេស លោកហ៊ឹល រ៉ាយា អភិបាលរងខេត្ត លោកឈូ ប៊ុនរឿង ប្រធានមន្ទីរអប់រំយុវជននិងកីឡាខេត្ត លោកស្រេងសុផល អភិបាលក្រុងសិរិសោភ័ណ អស់លោកជាមេបញ្ជាការរង ស្នងការរង នៃកងរាជអាវុធហត្ថខេត្ត ប្រធាន អនុប្រធានក្រុមនៃអង្គភាពប្រឆាំងអំពើពុករលួយ។
លោក ឈូ ប៊ុនរឿង ប្រធានមន្ទីរអប់រំយុវជន និងកីឡាខេត្តបន្ទាយមានជ័យ និងជាប្រធានគណ:មេប្រយោគទូទាំងខេត្តបានមានប្រសាសន៍ថា ក្រសួងអប់រំបានធ្វើការផ្តល់ឱវាទប្រាំចំណុចដល់មន្ទីរអប់រំ និងអ្នកពាក់ព័ន្ធ រួមមាន:
ទី១-ស្នើឲ្យលោកប្រធានមន្ទីរអប់រំខេត្ត និងលោក លោកស្រី នាយក-នាយិកា ពិនិត្យ បរិស្ថានជុំវិញមណ្ឌលប្រឡង បន្ទប់ទឹក បង្គន់អនាម័យ តុ កៅអី និងអង្គភាពអគ្គិសនីត្រូវរៀបចំពិនិត្យអំពូលភ្លើង ក្នុងមណ្ឌលប្រឡងឲ្យបានល្អ។
ទី២-ស្នើលោកប្រធានមន្ទីរត្រូវធ្វើប័ណ្ណ ស្លាកសម្គាល់ ចែកជូនដល់អ្នកដែលមានភារកិច្ចចេញ ចូលក្នុងមណ្ឌលប្រឡង ។
ទី៣-ស្នើអាជ្ញាធរក្រុងសិរីសោភ័ណត្រូវសហការជាមួយស្នងការនគរបាលខេត្ត មេបញ្ជាការកងរាជអាវុធហត្ថក្រុងសិរីសោភ័ណ ពិនិត្យមើលយានដ្ឋានជុំវិញមណ្ឌលប្រឡង ផ្ទះអាជីវកម្មថតចម្លង និងត្រូវធ្វើលិខិតជូនដំណឹងឲ្យម្ចាស់អាជីវកម្មផ្អាករយៈពេលពីរថ្ងៃនេះ
ទី៤-ស្នើអាជ្ញាធរក្រុងសិរីសោភ័ណសហការជាមួយស្នងការនគរបាលខេត្ត រៀបចំកន្លែងផ្ញើរកង់ ម៉ូតូ របស់បេក្ខជន និងបិទផ្លាកមិនយកលុយពីបេក្ខជនដែលមកឡង។
ទី៥-ស្នើលោកប្រធានមន្ទីរអប់រំ ពិនិត្យទីកន្លែងសម្រាប់ស្នាក់នៅរបស់បេក្ខជននៅទីតាំងឲ្យបានសមស្រប ។
ក្នុងឱកាសនោះដែរ លោក ឱម សិទ្ធី ប្រធានគណ:មេប្រយោគទូទាំងប្រទេសបានបញ្ជាក់ថា បេក្ខជនប្រឡងទាំងអស់ត្រូវគោរពតាមគោលការណ៍ប្រឡងបាក់ឌុប ព្រោះឆ្នាំនេះ មានវិន័យដ៏តឹងរឹងជាងឆ្នាំមុនៗ។
បេក្ខជន បេក្ខនារី ប្រឡង ត្រូវគោរពម៉ោង ពេល វិន័យប្រឡង ហាមយកសំណៅឯកសារ ចម្លើយ ក៏ដូចឧបករណ៍ អេឡិចត្រូនិច ពោលគឺត្រូវគោរពតាមបទបញ្ជា បទបញ្ញត្តិ ដែលក្រសួងបានដាក់ចេញ ការរឹតបន្តឹងនេះ នឹងបន្តធានាថា អ្នកចេះ គឺជាប់ ។ ក្នុងករណីរកឃើញថា បេក្ខជននិងបេក្ខនារីបានប្រព្រឹត្តសកម្មភាពផ្ទុយនឹងបទបញ្ញត្តិ និងកម្រិតវិន័យបេក្ខជន និងបេក្ខនារីនោះ ត្រូវបានកំណត់ឲ្យធ្លាក់ជាស្វ័យប្រវត្តិ។
លោក ឱម សិទ្ធីបានបញ្ជាក់ឲ្យដឹងបន្តទៀតថា ក្នុងនោះបេក្ខជនទាំងអស់ត្រូវអនុវត្តឲ្យបានខ្ជាប់ខ្ជួននូវវិធានការសុខភាព និងសុវត្ថិភាព សម្រាប់ការប្រឡងបាក់ឌុបនេះ ត្រូវរក្សាគម្លាត សុវត្ថិភាព និងពាក់ម៉ាស់ឲ្យបានត្រឹមត្រូវ ជាប្រចាំនៅក្នុងមណ្ឌលប្រឡងរហូតដល់បញ្ចប់ការប្រឡង ។
សូមបញ្ជាក់ថា កាលពីរសៀលថ្ងៃទី០២ ខែធ្នូ ប្រធានគណៈមេប្រយោគទូទាំងប្រទេស ប្រធានគណ:មេប្រយោគទូទាំងខេត្ត និងមន្ត្រីពាក់ព័ន្ធបានដឹកជញ្ជូនវិញ្ញាសារប្រឡង មកដល់ហើយប្រគល់ ទទួលដោយលោកណង វុទ្ធី នាយករដ្ឋបាលសាលាខេត្តដើម្បីរក្សាទុកនៅសាកាខេត្ត។
ការប្រឡងសញ្ញាប័ត្រមធ្យមសិក្សាទុតិយភូមិសម័យប្រឡងថ្ងៃទី០៥ខែធ្នូឆ្នាំ២០២២ នៅខេត្តបន្ទាយមានជ័យមានចំនួនប្រាំពីរមណ្ឌលសំណេរ ដែលស្ថិតនៅកណ្តាលក្រុងសិរីសោភ័ណឬទីប្រជុំជនខេត្ត មានបេក្ខជនប្រឡងក្នុងបញ្ជីដែលមកពីវិទ្យាល័យសាធារណ: វិទ្យាល័យឯកជន/បំពេញវិជ្ជាទាំងអស់ក្នុងខេត្ត មានចំនួន ៥.៨០២នាក់ (ស្រី៣.១៧៦នាក់) ក្នុងនោះមាន៖ ១/បេក្ខជនចំណេះទូទៅមានចំនួន៤.៧៥៥នាក់ (ស្រីចំនួន២.៧០៩នាក់), ២/បេក្ខជនស្វៃរិន ចំណេះទូទៅមានចំនួន៧៥៧នាក់ (ស្រី៣៩៣នាក់) និង៣/បេក្ខជនបំពេញវិជ្ជាមានចំនួន២៩០នាក់ (ស្រីមានចំនួន៧០នាក់)៕
