Views: 11
ប្រែសម្រួលៈបំណង(ដេល្លីម៉េល)៖ក្រុមហ៊ុនណតថ្រប់ ហ្ក្រាន់មែន ខប( Northrop Grumman Corp)កាលពីថ្ងៃសុក្រទី២ធ្នូបានបញ្ចេញយន្តហោះទម្លាក់គ្រាប់បែកនុយក្លេអ៊ែរយុទ្ធសាស្ត្រថ្មី B-21 “Raider”សំរាប់កងយន្តហោះបំបាំងកាយចម្ងាយឆ្ងាយថ្មីរបស់កងទ័ពអាកាសអាម៉េរិក។
វាត្រូវបានបង្ហាញនៅក្នុងពិធីដ៏អ៊ឹកធឹកមួយនៅរោងចក្រPlant 42របស់ក្រុមហ៊ុនណតថ្រប់នៅក្នុងរដ្ឋកាលីហ្វ័រញ៉ា ដោយផ្តល់អោយសាធារណជនឃើញរូបរាងដ៏មានអំណាចរបស់វាជាលើកដំបូង។
B-21ដែលមានស្លាបរាងដូច យន្តហោះB-2 អាចបំពាក់សព្វាវុធធម្មតានិងនុយគ្លេអ៊ែរនិងហោះជុំវិញពិភពលោកដោយប្រើសមត្ថភាពចម្ងាយឆ្ងាយនិងការចាក់សាំងកណ្តាលអាកាស។
យន្តហោះទំនើបចុងក្រោយនេះត្រូវគេប៉ាន់ស្មានថាមានតំលៃប្រមាណ៥៥០លានដុល្លារក្នុងមួយគ្រឿងកាលពីឆ្នាំ២០១០ និងឥឡូវមានតំលៃប្រមាណ៧៥០លានដុល្លារ ដោយសារប្រាក់ដុល្លារប្រែប្រួលទៅតាមអតិផរណានាពេលបច្ចុប្បន្ន។
កងទ័ពអាកាសអាម៉េរិកមានផែនការទិញយន្តហោះប្រភេទនេះយ៉ាងតិច១០០គ្រឿងនិងចាប់ផ្តើមជំនួសដាក់វាជំនួសយន្តហោះទំនើបស៊េរីមុនB-1 និង B-2 ។
សូមបញ្ជាក់ថាក្រុមហ៊ុនណតថ្រប់ បានប្រជែងឈ្នះក្រុមហ៊ុនបូអ៊ីង ខូ(Boeing Co)និងឡក់ហ៊ីដ ម៉ាធីន ខប( Lockheed Martin Corp)និងឈ្នះកុងត្រាផលិតយន្តហោះសំរាប់កងទ័ពអាកាសអាម៉េរិក។
ក្រុមហ៊ុនណតថ្រប់ ហៅយន្តហោះនេះថាជាយន្តហោះជំនាន់ទី៦ ដែលមានលទ្ធភាពភ្ជាប់ជាមួយយន្តហោះដទៃនិងងាយស្រួលប្រើសព្វាវុធផ្សេងៗទៀតផងនៅពេលអនាគត។B-21ធន់និងអាចបំបាំងខ្លួនចេញពីប្រព័ន្ធរ៉ាដាកាន់តែខ្លាំងជាងយន្តហោះមុនៗ មិនទាមទារការថែមទាំងច្រើនដូចយន្តហោះបំបាំងកាយមុនៗនិងថ្លៃប្រតិបត្តិការក៏ទាបដែរ នេះបើតាមមន្ត្រីរបស់ក្រុមហ៊ុន៕
