Views: 3
ដោយ៖ សុវណ្ណកុម្ភៈ / ភ្នំពេញ៖ បន្ទាប់ពីដំណើរការ ២ថ្ងៃ គឺនៅថ្ងៃទី ៨ – ៩ ខែសីហា ឆ្នាំ២០២២ មកនោះ សិក្ខាសាលា ស្តីពីការអភិរក្សកីឡាប្រពៃណីអាស៊ាន និងហ្គេម នៅសណ្ឋាគារសុខា ភ្នំពេញ ក្រោមការរៀបចំរបស់ក្រសួងអប់រំ យុវជន និងកីឡា បានបញ្ចប់ ដោយជោគជ័យ។
ថ្លែងក្នុងឱកាសបិទ នៅល្ងាចថ្ងៃទី៩ ខែសីហា ឆ្នាំ២០២២ លោក ប៊ូ ជុំសេរី អនុរដ្ឋលេខាធិការ ក្រសួងអប់រំ យុវជន និងកីឡា បានមានប្រសាសន៍ថាៈ ក្នុងនាមជា អ្នករៀបចំសិក្ខាសាលា លោកបានសម្តែងក្តីរីករាយ ចំពោះវាគ្មិន និងអ្នកចូលរួមទាំងអស់ ដែលមកពីប្រទេសផ្សេងៗ ឬ AMS សម្រាប់គំនិត ធាតុចូល ការពិភាក្សា និងកិច្ចសហប្រតិបត្តិការ របស់សមាជិក ដែលបានអនុញ្ញាតឱ្យយើង ធ្វើសិក្ខាសាលា ប្រកបដោយផ្លែផ្កា ស្តីពីការអភិរក្សកីឡាប្រពៃណីអាស៊ាន និងហ្គេម។
រយៈពេលពីរថ្ងៃនេះ អង្គសិក្ខាសាលាទាំងមូល បាននិងពិភាក្សាលើការអភិរក្សកីឡាប្រពៃណី និងហ្គេមក្នុងតំបន់អាស៊ី និងប៉ាស៊ីហ្វិក ការធ្វើឱ្យចម្រើនឡើងវិញ នូវកីឡាប្រពៃណី និងហ្គេម ដើម្បីលើកកម្ពស់ការយល់ដឹង និងអត្តសញ្ញាណអាស៊ាន នៅក្នុងផែនការ ការងារអាស៊ាន ស្តីពីកីឡាឆ្នាំ ២០២១-២០២៥។
អាទិភាពប្រធានអាស៊ាន ឆ្នាំ២០២២ ក្នុងការពង្រឹងកិច្ចសហប្រតិបត្តិការ លើការអភិរក្ស កីឡាប្រពៃណី និងហ្គេម ការអភិរក្សកីឡាប្រពៃណី និងហ្គេម នៅក្នុងប្រទេសសមាជិក អាស៊ាន និងបញ្ហាប្រឈម ដើម្បីបង្កើនការមើលឃើញស្ថានភាព នៃការអភិរក្សកីឡា ប្រពៃណី និងហ្គេម នៅអាស៊ីអាគ្នេយ៍ និងការការពារ។ ក្នុងនោះក៏មានការពិភាក្សាលម្អិត អំពីការអភិរក្សកីឡា និងល្បែងប្រពៃណី តាមរយៈការប្រើប្រាស់បច្ចេកវិទ្យា និងធ្វើ សេចក្តីព្រាង សេចក្តីប្រកាសរួមអាស៊ាន ស្តីពីការលើកកម្ពស់អត្តសញ្ញាណអាស៊ាន តាមរយៈការការពារកីឡា និងល្បែងប្រពៃណីជាដើម។
លោក ប៊ូ ជុំសេរី បានបន្ថែមថាៈ «ការដាក់បញ្ចូល ASEAN TSG ទៅក្នុងកម្មវិធីសិក្សា របស់រដ្ឋជាសមាជិកអាស៊ាន ជាមួយនឹងសកម្មភាព ដែលបានរៀបរាប់នេះ ខ្ញុំជឿជាក់ថា យើងជាសមាជិកអាស៊ាន នឹងអាចការពារបេតិកភណ្ឌ កីឡាប្រពៃណី និងល្បែងកម្សាន្ត របស់យើង ពីការផុតពូជ។ ខ្ញុំសង្ឃឹមថា កូនចៅជំនាន់ក្រោយរបស់យើង នឹងរីករាយ ជាមួយនឹងអ្វី ដែលយើងកំពុងធ្វើសព្វថ្ងៃនេះ»។
ក្នុងនាមក្រសួងអប់រំ យុវជន និងកីឡា និងក្រុមប្រឹក្សាសហគមន៍សង្គមវប្បធម៌អាស៊ាន លោកសូមអរគុណវាគ្មិន អ្នកចូលរួម អ្នករៀបចំ ជាពិសេសលេខាធិការដ្ឋានអាស៊ាន ដែលបានធ្វើឱ្យសិក្ខាសាលានេះ ប្រព្រឹត្តទៅដោយរលូន និងមានឥទ្ធិពលយ៉ាងខ្លាំង លើការអភិរក្សបេតិកភណ្ឌកីឡា និងល្បែងប្រជាប្រិយរបស់យើង។ យើងនឹងបន្តរៀបចំ សិក្ខាសាលាមួយបន្ថែមទៀត ស្តីពីការអភិវឌ្ឍតំបន់កីឡា និងតំបន់កម្សាន្ត ក្នុងតំបន់អាស៊ាន រយៈពេល ២ ថ្ងៃទៀត នាថ្ងៃទី ១០-១១ ខែសីហា ឆ្នាំ២០២២ ។
លោក អ៊ុក ឌីវ៉ង់ អគ្គនាយករង អគ្គនាយកដ្ឋានកីឡា នៃក្រសួងអប់រំ យុវជន និងកីឡា បានបញ្ជាក់ដែរថាៈ ក្នុងនាមជាម្ចាស់ផ្ទះ កម្ពុជាក៏បានធ្វើបទបង្ហាញ ពីការអភិរក្ស និងអភិវឌ្ឍន៍ប្រភេទកីឡាប្រពៃណីរបស់ខ្លួនផងដែរ។ គោលបំណងចម្បង គឺការលើកកម្ពស់ អត្តសញ្ញាណអាស៊ាន តាមរយៈការដាក់បញ្ចូលនូវ ប្រភេទកីឡាប្រពៃណី រៀងៗខ្លួន។
គោលដៅរបស់អាស៊ាន នាពេលនេះ គឺរួមគ្នាដើម្បីអភិរក្សនូវ ប្រភេទកីឡាអត្តសញ្ញាណជាតិ ដែលបណ្តាប្រទេសអាស៊ានទាំងអស់ មានពីមុនមក ហើយរួមគ្នាអភិវឌ្ឍន៍ ឱ្យក្លាយទៅជា ប្រភេទកីឡាទំនើប ដើម្បីត្រៀមដាក់បញ្ចូល ការប្រកួតព្រឹត្តិការណ៍ធំៗ ដូចជា ស៊ីហ្គេម និងការប្រកួតផ្សេងៗទៀត៕/V
