Views: 1
ដោយៈ ទេពកង្រី/កំពង់ឆ្នាំងៈ អគារសិក្សាមួយខ្នងកំពស់បីជាន់ ជាអំណោយរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ធ្វើពិធីបញ្ចុះបឋមសិលាដើម្បីសាងសង់បំពេញតម្រូវការខ្វះខាតរបស់សិស្សានុសិស្ស នៅសាលាបឋមសិក្សាអារញ្ញិការាមកាលពីព្រឹកថ្ងៃ៣០ ខែវិច្ឆិកា ឆ្នាំ២០២២ នៅក្នុងបរិវេណសាលាបឋមសិក្សានៅវត្តអារញ្ញិការាម ក្រោមអធិបតីភាព ក្រោមអធិបតីភាពលោក ស៊ុន សុវណ្ណារិទ្ធិ អភិបាលខេត្តកំពង់ឆ្នាំង លោកវ៉ែន រតនៈ សមាជិកក្រុមលេខាធិការសម្តេចតេជោហ៊ុនសែន និងជាជំនួយការ លោកឧត្តមសេនីយ៍ឯក ហ៊ុន ម៉ាណែត លោកផាន់ ច័ន្ទតារា សមាជិកក្រុមប្រឹក្សាខេត្ត ព្រមទាំងមានការចូលរួមពីសំណាក់ប្រជាពលរដ្ឋ លោកគ្រូ អ្នកគ្រូសិស្សានុសិស្ស ជាច្រើនផងដែរ ។
លោក វ៉ែន រតនៈ សមាជិកក្រុមលេខាធិការសម្តេចតេជោ និងជាជំនួយការ លោកឧត្តមសេនីយ៍ឯក ហ៊ុន ម៉ាណែត បានឱ្យដឹងថា ការផ្តល់អគារសិក្សានេះ គឺបន្ទាប់ពី លោកហ៊ុន ម៉ាណែត បានពិនិត្យឃើញដោយផ្ទាល់ ចំពោះការខ្វះខាតសាលារៀនសិក្សារបស់សិស្ស នៅសាលាបឋមសិក្សាមួយនេះ។
នៅក្នុងឱកាសនោះ លោកស៊ុន សុវណ្ណារិទ្ធិ អភិបាលខេត្តកំពង់ឆ្នាំង បានមានប្រសាសន៍ថ្លែងអំណរគុណយ៉ាងជ្រាលជ្រៅចំពោះ សម្តេច អគ្គមហាសេនាបតីតេជោហ៊ុនសែន ដែលបានផ្តល់អគារសិក្សានាពេលនេះ ដើម្បីផ្តល់ឱកាសដល់កូនចៅប្រជាពលរដ្ឋនៅតំបន់នេះទទួលបានការសិក្សាបានពេញលេញ ។ លោកបានបញ្ជាក់ទៀតថា ក្រោមការដឹកនាំរបស់រាជរដ្ឋាភិបាលដែលមានសម្តេចហ៊ុនសែនជានាយករដ្ឋមន្ត្រី ប្រទេសជាតិ មានការអភិវឌ្ឍរីកចម្រើនលើគ្រប់វិស័យដូចជា សាលារៀន មន្ទីរពេទ្យ វត្តអារាម ផ្លូវថ្នល់ និងស្ពាន ជាច្រើនផងដែរ ។
លោកអភិបាលខេត្ត ក៏បានណែនាំដល់ប្រជាពលរដ្ឋទាំងអស់ថែទាំសុខភាព ដោយឡែកសិស្សានុសិស្សទាំងអស់ត្រូវខិតខំរៀនសូត្រ ជាពិសេសត្រូវចៀសវាងឱ្យឆ្ងាយពីបញ្ហាគ្រឿងញៀន ល្បែងស៊ីសងគ្រប់ប្រភេទនាំឱ្យខូចអនាគតវែងឆ្ងាយរបស់ខ្លួន ដែលជាទំពាំងស្នងឫស្សីសម្រាប់ប្រទេសជាតិនាពេលខាងមុខ ។
នៅក្នុងឱកាសនោះ លោកបានចែកអំណោយដល់ប្រជាពលរដ្ឋដែលមកចូលរួមពីបួនសង្កាត់ ក្នុងម្នាក់ៗទទួលបានអង្ករ មី ត្រីខ និង ថវិកាមួយចំនួនផងដែរ៕
