Views: 1
ដោយ៖ សុវណ្ណកុម្ភៈ / ភ្នំពេញ៖ សហព័ន្ធកីឡាស្នូកឃ័រកម្ពុជា បញ្ជូនកីឡាករ ចំនួន ២ រូប ទៅចូលរួមក្នុងព្រឹត្តិការណ៍ Asian 6-Red Snooker Championship 2022 នៅប្រទេសម៉ាឡេស៊ី ដែលនឹងប្រព្រឹត្តទៅ ចាប់ពីថ្ងៃទី២៤ ដល់ថ្ងៃទី២៩ ខែកញ្ញា ឆ្នាំ២០២២។
លោក ម៉ារ៉ា សុជាតិ អគ្គលេខាធិការសហព័ន្ធ បាននិយាយឲ្យដឹងថាៈ ការប្រកួតកីឡា
ស្នូកឃ័រ Asian 6-Red Snooker Championship 2022 នៅប្រទេសម៉ាឡេស៊ី ដោយមានប្រទេសចំនួន ១១ ចូលរួម ហើយនៅថ្ងៃដដែលនោះ ក៏មានការប្រកួតកីឡា ស្នូកឃ័រជើងឯកពិភពលោកដែរ។ ចំណែកកម្ពុជា បញ្ជូនចូលរួមតែការប្រកួត ក្នុងព្រឹត្តិកាណ៍ Asian 6-Red Snooker Championship 2022 ទេ ព្រោះសព្វថ្ងៃនេះ កីឡាករ នៅមានកម្រិត ចំណែកកីឡាករស្នូកឃ័រ កម្រិតពិភពលោក ពុំទាន់មានឡើយ។
លោកបានបន្តថាៈ សហព័ន្ធ បានបញ្ជូនកីឡាករ ២ រូប លើវិញ្ញាសាស្នូកឃ័រកូនក្រហម ចំនួន៦ ដែលមានកីឡាករស្នូកឃ័រ ជួង ប៊ុនធឿន និងកីឡាករស្នូកឃ័រ ថាយ តិចហុក ។ ចំពោះ កីឡាករ ស្នូកឃ័រ ដួង ប៊ុនធឿន ជាកីឡាករមួយរូប មានបទពិសោធន៍ ក្នុងការប្រកួតកម្រិតអន្តរជាតិ ព្រមទាំងយល់ដឹងពីស្នូកឃ័រ និងហ្វឹកហាត់បានល្អប្រសើរ ដើម្បីដណ្តើមយកជើងឯក ជូនប្រទេសជាតិ ។ ចំណែកកីឡាករស្នូកឃ័រ ថាយ តិចហុក ជាកីឡាករជើងឯក នៃការប្រកួតកីឡាស្នូកឃ័រ King Snooker Cup។ កម្ពុជាសង្ឃឹមថា នឹងទទួលបានលទ្ធផលល្អ ពីការប្រកួតនេះជាមិនខាន៕ V / N
