Views: 2
ដោយ៖ រ៉ាម៉ន / ភ្នំពេញ៖ នៅព្រឹកថ្ងៃទី៨ ខែសីហា ឆ្នាំ២០២២ នាបរិវេណសួនកុមារ បុរីសង្ឃឹមថ្មី ភូមិតានួន សង្កាត់កំបូល ខណ្ឌកំបូល រាជធានីភ្នំពេញ សាលាខណ្ឌកំបូល បានរៀបចំវេទិកាផ្សព្វផ្សាយ និងពិគ្រោះយោបល់ របស់ក្រុមប្រឹក្សាខណ្ឌកំបូល អាណត្តិទី៣ ឆ្នាំ២០២២ ក្រោមអធិបតីភាពលោកជំទាវកិត្តិបណ្ឌិត អុឹង កន្ថាផាវី រដ្ឋមន្ត្រីក្រសួងកិច្ចការនារី និងជាប្រធានក្រុមការងារ រាជរដ្ឋាភិបាល ចុះមូលដ្ឋានខណ្ឌកំបូល លោក នៅ សារឿន ប្រធានក្រុមប្រឹក្សាខណ្ឌ លោក ឃឹម ស៊ុនសូដា អភិបាល នៃគណៈអភិបាលខណ្ឌកំបូល។
វេទិកាផ្សព្វផ្សាយ និងពិគ្រោះយោបល់ក្រុមប្រឹក្សាខណ្ឌកំបូល អាណត្តិទី៣ ឆ្នាំ២០២២ នៅព្រឹកនេះ បានប្រព្រឹត្តទៅប្រកបដោយជោគជ័យ ដូចរបៀបវារៈដែលបានគ្រោងទុក ដោយមានការអញ្ជើញចូលរួមពី លោក លោកស្រី ប្រធានក្រុមការងារថ្នាក់ជាតិ ចុះសង្កាត់ទាំង៧ លោក-លោកស្រីតំណាងមន្ទីរជំនាញ-អង្គភាពពាក់ព័ន្ធ សមាជិក សមាជិកាក្រុមប្រឹក្សាខណ្ឌ លោក-លោកស្រី ជាអភិបាលរងខណ្ឌ លោកអធិការនគរបាលខណ្ឌ លោកមេបញ្ជាការមូលដ្ឋានកងរាជអាវុធហត្ថខណ្ឌ លោកនាយក-នាយករងរដ្ឋបាលសាលាខណ្ឌ តំណាងអគ្គិសនីកម្ពុជា តំណាងរដ្ឋាករទឹក ស្វ័យតក្រុងភ្នំពេញ លោក-លោកស្រី ប្រធានការិយាល័យ ចំណុះរដ្ឋបាលខណ្ឌ លោកប្រធានការិយាល័យប្រជាពលរដ្ឋ លោកប្រធានការិយាល័យ សុខាភិបាល ស្រុកប្រតិបត្តិ ពោធិ៍សែនជ័យ ក្រុមប្រឹក្សាសង្កាត់ នាយ-នាយរងប៉ុស្តិ៍នគរបាលរដ្ឋបាល ទាំង៧ លោក លោកស្រីប្រធានភូមិទាំង៩៣ ភូមិ តំណាងគណៈកម្មការអាចារ្យវត្ត និងក្រុមសាសនា តំណាងអង្គការសង្គមស៊ីវិល តំណាងវិស័យឯកជន លោកាយក-នាយិកាសាលា គណៈកម្មការមាតាបិតាសិស្ស អ្នកទទួលបន្ទុកកិច្ចការនារី និងកុមារសង្កាត់ និងអ្នកពាក់ព័ន្ធ សរុបចំនួន ៣៥០ នាក់។
ជាលទ្ធផលនៃវេទិកាទទួលបានសំណើ សំណូមពរសរុបចំនួន ៨៣ បញ្ហា ដែលក្នុងនោះ សំណើ / សំណូមពរផ្ទាល់មាត់ ចំនួន ១៥ និងសំណើ/សំណូមពរលាយល័ក្ខអក្សរ ចំនួន ៦៨ បញ្ហា ។ ក្នុងចំណោម ៨៣ បញ្ហា មានសំណេី/សំណូមពរ ទាក់ទងបញ្ហាប្រឈម ទឹក ភ្លើង ផ្លូវ ចំនួន ៦២បញ្ហា និងការងាររដ្ឋបាល សន្តិសុខ សណ្តាប់ធ្នាប់សាធារណៈ បរិស្ថាន និងការងារភូមិបាល ចំនួន ២១។ សំណើ/សំណូមទាំងនោះ ត្រូវបានលោក ឃឹម ស៊ុនសូដា អភិបាល នៃគណៈអភិបាលខណ្ឌកំបូល បានឆ្លើយបំភ្លឺ ដោះស្រាយ នៅនឹងកន្លែង ដោយឡែកបញ្ហាដែលនៅសេសសល់តិចតួច នឹងដឹកនាំចុះពិនិត្យជាក់ស្តែង នៅពេលបន្ទាប់។
សូមបញ្ជាក់ជូនថា លទ្ធផលវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សា ខណ្ឌកំបូល អាណត្តិទី៣ ឆ្នាំ២០២០ កន្លងទៅ រដ្ឋបាលខណ្ឌ សម្រេចបានលទ្ធផល ដូចតទៅ សំណើ/សំណូមពរ អង្គវេទិកាចំនួន ៥៧ បញ្ហា ក្នុងនោះបានដោះស្រាយរួច ចំនួន ៣០ បញ្ហា កំពុងដោះស្រាយ១២ បញ្ហា បានដាក់បញ្ចូលក្នុងផែនការអភិវឌ្ឍន៍ ៥ឆ្នាំ និងកម្មវិធីវិនិយោគ ៣ឆ្នាំរំកឹល របស់ខណ្ឌ-សង្កាត់ចំនួន ១៤បញ្ហា និងស្ទួនចំនួន ១ បញ្ហា៕/V
