Views: 8
ប្រែសម្រួលៈបំណង(ដេល្លីម៉េល)៖ ប្រព័ន្ធព្យុះធំមួយបាននាំមកខ្យល់ដ៏ខ្លាំងនិងខ្យល់កួចជាច្រើនវាយប្រហារទូទាំងតំបន់ខាងត្បូងអាម៉េរិក ដោយបានសម្លាប់មនុស្សយ៉ាងតិចប្រាំពីរនាក់នៅក្នុងរដ្ឋចចជៀ(Georgia)និងអាឡាបាម៉ា( Alabama) កន្លែងដែលខ្យល់កួចធំមួយបានបំផ្លាញអាគារនិងបក់ប៉ើងរថយន្តនៅតាមដងវិថីនៃទីក្រុងសេលម៉ា(Selma)។
អាជ្ញាធរបាននិយាយថា ទំហំនៃការខូចខាតកាន់តែច្បាស់ ព្រមទាំងការរុករកជនរងគ្រោះបន្ថែមនឹងធ្វើឡើងនៅថ្ងៃសុក្រនៅពេលអាកាសបានល្អឡើងវិញ។
បន្ទាប់ពីព្យុះថមថយកម្លាំងកាលពីយប់ថ្ងៃព្រហស្បតិ៍ មនុស្សរាប់ម៉ឺននាក់បានគ្មានចរន្តអគ្គិសនីប្រើនៅទូទាំងរដ្ឋពីរខាងលើ។
អ្នកស្លាប់ប្រាំមួយនាក់ស្ថិតនៅក្នុងខណ្ឌអ័រថរហ្កា ខោនធី(Autauga County)ក្នុងរដ្ឋអាឡាបាម៉ា កន្លែងដែលផ្ទះប្រមាណ៤០ត្រូវបំផ្លាញដោយខ្យល់កួចនៅសហគមន៍ចំនួនពីរ។មនុស្សយ៉ាងតិច១២នាក់ក៏បានរងរបួសធ្ងន់នៅទីនេះ។
នៅចចជៀ អ្នកដំណើរម្នាក់បានស្លាប់នៅពេលដើមឈើមួយបាក់សង្កត់លើរថយន្ត។
MONSTER Tornado earlier in Selma, Alabama!
Permission: Caleb LeGrone@WeatherBug #ALwx #Alabama #TORNADO #Selma #SelmaAlabama https://t.co/weJaAMYSNk pic.twitter.com/ktzpvr8GXW
— Live Storm Chasers (@LiveStormChaser) January 12, 2023
កម្មកររើមែកឈើចេញពីផ្លូវដែកក្រោយខ្យល់កួចមួយវាយប្រហារនៅក្រុងសេលម៉ា ក្នុងរដ្ឋអាឡាបាម៉ា
រថយន្តនិងផ្ទះត្រូវបំផ្លាញដោយព្យុះនៅអាឡាបាម៉ា
នៅពេលភាគខាងត្បូងរងការវាយប្រហារដោយព្យុះ បណ្តារដ្ឋភាគខាងលិចអាម៉េរិកក៏កំពុងជួបការធ្លាក់ភ្លៀងខ្លាំងចាប់ពីថ្ងៃសុក្រដល់ចុងសប្តាហ៍ ខណៈតំបន់នេះជួបការធ្លាក់ព្រិលយ៉ាងជោគជាំរួចហើយ។
រដ្ឋកាលីហ្វ័រញ៉ាបាននិងកំពុងជួបការធ្លាក់ភ្លៀងអស់ពេលរាប់សប្តាហ៍ដែលបានសម្លាប់មនុស្សយ៉ាងតិច១៩នាក់ បង្កការលិចលង់សហគមន៍ រំលំបង្គោលភ្លើងនិងគំរាមការបាក់ដីសង្កត់។
ពួកអ្នកព្យាករណ៍អាកាសធាតុឥឡូវនិយាយថា ព្យុះស៊ីក្លូនមួយដំបូងក្នុងចំណោមពីរកំពុងវិលខ្ញាល់នៅមហាសមុទ្រប៉ាស៊ីហ្វិកនិងបក់សំដៅឆ្នេរខាងលិចអាម៉េរិកដោយនាំទឹកភ្លៀងហួសទៅកាន់ភាគខាងជើងចាប់ពីកាលីហ្វ័រញ៉ា ដល់រដ្ឋអូរេហ្គឹន(Oregon)និងវ៉ាស៊ីនតោន។
ការព្រមានអំពីការបាក់ទឹកកកសង្កត់ធ្វើឡើងនៅរដ្ឋវ៉ាស៊ីនតោន ខណៈព្យុះនឹងនាំទឹកភ្លៀង និងការធ្លាក់ព្រិលខ្លាំងឡើងនៅតាមតំបន់ភ្នំ។
នៅកាលីហ្វ័រញ៉ាខាងជើង គេព្យាករណ៍ថាព្រិលកំរាស់១,៨ម៉ែត្រនឹងធ្លាក់នៅតាមតំបន់ភ្នំរវាងថ្ងៃសុក្រ និងអង្គារសប្តាហ៍ក្រោយ។
ក្រុងសាន់ ហ្វ្រានស៊ីស្កូ ក៏ជួបការធ្លាក់ភ្លៀងខ្លាំងជាងពេលណាទាំងអស់ក្នុងរយៈពេល១៥០ឆ្នាំមកនេះ ៕
យ៉ាងហោចណាស់១៩នាក់ស្លាប់ដោយព្យុះ និងទឹកជំនន់នៅភាគខាងលិចអាម៉េរិក ជាពិសេសកាលីហ្វ័រញ៉ា