Views: 11
ប្រែសម្រួល : កញ្ញាដាលីស (ដេល្លីម៉េល) ៖ ការិយាល័យប្រធានាធិបតីបានឱ្យដឹងកាលពីថ្ងៃអង្គារទី១៦សីហាថា ស្រីលង្កានឹងមិនបន្តស្ថានភាពអាសន្នដើម្បីគ្រប់គ្រងការតវ៉ាប្រឆាំងរដ្ឋាភិបាលនោះទេ ខណៈស្ថានការណ៍នៅក្នុងប្រទេសក្រីក្រមួយនេះ “មានស្ថិរភាព”។
លោកប្រធានាធិបតី រ៉ានីល វីកក្រេមេស៊ីង (Ranil Wickremesinghe) បានយកមកប្រើនូវច្បាប់តឹងតែងនេះនៅបួនថ្ងៃបន្ទាប់ពីអ្នកកាន់តំណែងមុនរបស់គាត់បានភៀសខ្លួនចេញពីប្រទេសហើយលាលែងពីតំណែងនៅថ្ងៃទី ១៤ ខែកក្កដា បន្ទាប់ពីការតវ៉ាជាច្រើនខែជុំវិញការខ្វះខាតស្បៀងអាហារ ប្រេងឥន្ធនៈ និងថ្នាំពេទ្យយ៉ាងរ៉ាំរ៉ៃ។
ស្ថានភាពអាសន្នដែលដាក់ចេញដោយលោកវីកក្រេមេស៊ីងនឹងត្រូវលុបចោលនៅថ្ងៃព្រហស្បតិ៍ទី១៨សីហា ហើយគាត់មានអំណាចដើម្បីបន្តវារៀងរាល់ខែបន្ទាប់ពីនោះ។
ការិយាល័យរបស់លោកវីកក្រេមេស៊ីងបានដកស្រង់សម្តីគាត់ដោយនិយាយថា “ស្ថានការណ៍នៅក្នុងប្រទេសមានស្ថិរភាព មិនចាំបាច់ដាក់ស្ថានភាពអាសន្នឡើងវិញទេនៅពេលដែលវាបញ្ចប់ក្នុងសប្តាហ៍នេះ”។
បទប្បញ្ញត្តិស្តីពីស្ថានភាពអាសន្នអនុញ្ញាតឱ្យកងទ័ពនិងប៉ូលិសចាប់ខ្លួននិងឃុំខ្លួនជនសង្ស័យរយៈពេលយូរ។
ស្ថានភាពអាសន្ននេះត្រូវបានរិះគន់យ៉ាងទូលំទូលាយដោយក្រុមសិទ្ធិមនុស្សថាជាជំហានដ៏ឃោរឃៅ ដែលអនុញ្ញាតឱ្យប្រធានាធិបតីបង្កើតបទប្បញ្ញត្តិនិងរឹតត្បិតសេរីភាពរបស់ពលរដ្ឋដោយមិនចាំបាច់មានការត្រួតពិនិត្យតាមផ្លូវតុលាការ។
លោក ហ្គោតាបាយ៉ា រ៉ាចាប៉ាក់សា (Gotabaya Rajapaksa) ជាអ្នកកាន់តំណែងមុនរបស់លោក វីកក្រេមេស៊ីង ត្រូវបានបង្ខំឱ្យភៀសខ្លួនចេញពីប្រទេស ហើយបានលាលែងពីតំណែងនៅពេលដែលក្រុមបាតុកររាប់ម៉ឺននាក់បានសម្រុកចូលលំនៅដ្ឋានផ្លូវការរបស់គាត់។
ប្រជាជនចំនួន ២២ លាននាក់របស់ប្រទេសនេះបាននិងកំពុងស៊ូទ្រាំនឹងការខ្វះខាតយ៉ាងសម្ភារៈនិងទំនិញចាំបាច់សំខាន់ៗយ៉ាងធ្ងន់ធ្ងរចាប់តាំងពីចុងឆ្នាំមុន បន្ទាប់ពីប្រទេសនេះបានអស់ទុនបំរុងបរទេសដើម្បីផ្តល់ហិរញ្ញប្បទានសូម្បីតែការនាំចូលទំនិញសំខាន់ៗបំផុត។
ប្រទេសនេះអស់លទ្ធភាពសងបំណុលបរទេសចំនួន ៥១ ពាន់លានដុល្លាររបស់ខ្លួនកាលពីពាក់កណ្តាលខែមេសាហើយកំពុងពិភាក្សាជាមួយអង្គការមូលនិធិរូបិយវត្ថុអន្តរជាតិសម្រាប់លទ្ធភាពថវិកាសង្គ្រោះ។
ស្រីលង្កាបច្ចុប្បន្នកំពុងប្រឈមមុខនឹងអតិផរណាខ្ពស់ជាមួយនឹងអត្រាសរុបគឺ ៦០,៨ ភាគរយ ខណៈអតិផរណាម្ហូបអាហារមានកម្រិតខ្ពស់ជាង ៩០ ភាគរយកាលពីខែមុន នេះបើយោងតាមទិន្នន័យផ្លូវការ៕
ស្ថានភាពអាសន្នត្រូវបានរិះគន់យ៉ាងទូលំទូលាយដោយក្រុមសិទ្ធិមនុស្សថាជាជំហានដ៏ឃោរឃៅ
