Views: 1
ដោយ: បូកគោ/កំពត: មន្ត្រីប្រចាំការនៅច្រកទ្វារទ្វេភាគីទាន់ហន់ក្នុងស្រុកកំពង់ត្រាច ខេត្តកំពតបានបញ្ជាក់ថាចាប់ពីមានការរីករាលដាលនូវជំងឺកូវីដ-១៩ បរិមាណនៃការនាំស្រូវចេញទៅប្រទេសវៀតណាមបានធ្លាក់ចុះជាលំដាប់។ ប្រភពពីមន្ទីរកសិកម្មខេត្តកំពតបានបញ្ជាក់ថារយៈពេល១១ខែនៃឆ្នាំ២០២២នេះ ស្រូវនាំចេញមានប្រមាណ៤ម៉ឺនតោន ខណៈដែលឆ្នាំ២០២១ ការនាំស្រូវចេញបានប្រហែលជាង១០ម៉ឺនតោន។
លោកវរសេនីយ៍ទោនាក់ សុវណ្ណគិរីប្រធានប៉ុស្តិ៍នគរបាលច្រកទ្វារទ្វេភាគីទាន់ហន់បានប្រាប់ឲ្យដឹងថាចាប់តាំងពីមានការរីករាលដាលនូវជំងឺកូវីដ-១៩ សកម្មភាពដោះដូរទំនិញតាមច្រកទ្វារទ្វេភាគីទាន់ហន់មានភាពស្ងប់ស្ងាត់ ពិសេសការនាំស្រូវចេញបានថយបរិមាណច្រើន។ កាលមិនទាន់មានវិបត្តិកូវីដ-១៩ រដូវកាលប្រមូលផលបែបនេះ នៅច្រកទ្វារមានរថយន្តតម្រៀបបន្តគ្នាដើម្បីដឹកស្រូវចេញទៅប្រទេសវៀតណាម។ ប៉ុន្តែបច្ចុប្បន្នមានភាពស្ងប់ស្ងាត់ដោយក្នុងមួយថ្ងៃមានរថយន្តដឹកស្រូវចេញប្រមាណជាង ១០គ្រឿងប៉ុណ្ណោះ ។
លោកចាន់ រិទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពតបានបញ្ជាក់ថាតម្លៃស្រូវឆ្នាំនេះថេរល្អ គឺស្រូវអ៊ីអ៊ែរ៨៧០រៀលក្នុងមួយគីឡូក្រាម និងស្រូវធ្ងន់តម្លៃ១.២០០រៀលក្នុងមួយគីឡូក្រាម។ តម្លៃនេះមិនទាបជាងរាល់ឆ្នាំទេប៉ុន្តែការនាំស្រូវចេញទៅប្រទេសវៀតណាមតាមច្រកទ្វារទាន់ហន់បានធ្លាក់ចុះច្រើន។ រយៈពេល១១ខែនៃឆ្នាំ២០២២ ការនាំស្រូវចេញទៅវៀតណាមតាមច្រកទ្វារទាន់ហន់បានប្រហែល៤ម៉ឺនតោន ខណៈដែលឆ្នាំ២០២១ មានប្រមាណជាង១០ម៉ឺនតោន។
អ្នកប្រមូលទិញស្រូវក្នុងស្រុកកំពង់ត្រាចម្នាក់បានរៀបរាប់ថាតម្លៃស្រូវមិនសូវប្រែប្រួលនោះទេ។ ជាធម្មតាតម្លៃមួយគីឡូក្រាមស្ថិតនៅចន្លោះពី៨០០រៀលទៅ១.២៥០រៀលតាមប្រភេទស្រូវ។
មន្ត្រីគយប្រចាំច្រកទ្វារទ្វេភាគីទាន់ហន់បានបញ្ជាក់ថា រយៈពេល១១ខែនេះ ទំហំពាណិជ្ជកម្មឆ្លងកាត់ច្រកទ្វារមានប្រមាណជាង១០លានដុល្លារ។ ក្នុងនោះការនាំទំនិញចូលមានប្រមាណ១លាន៣សែនដុល្លារ និងការនាំទំនិញចេញបានជាង៩លានដុល្លារ៕/R