ភ្នំពេញ៖ គណៈចាត់តាំងគណៈកម្មាធិការកណ្តាលគណបក្សប្រជាជនកម្ពុជា នៅរសៀលថ្ងៃទី២ ខែធ្នូ ឆ្នាំ២០២២ បានរៀបចំពិធីបញ្ចូលសមាជិកថ្មី ចំនួន ៥រូប រួមមាន៖ ១.លោក យ៉ង សាំងកុមារ អតីតប្រធានគណៈម្មាធិការនាយកគណបក្សប្រជាធិបតេយ្យមូលដ្ឋាន ២. លោក ឡឹក សុធារ អតីតអគ្គលេខារងគណបក្សប្រជាធិបតេយ្យមូលដ្ឋាន, ៣. លោក ខាត់ សុធី អតីតសមាជិកគណៈកម្មាធិការនាយកគណបក្សប្រជាធិបតេយ្យមូលដ្ឋាន, ៤. លោក ដាំ សិទ្ធិ អតីតសមាជិកគណៈកម្មាធិការនាយកគណបក្សសង្រ្គោះជាតិ និង៥. លោក យោគ ស៊ីថុន អតីតអគ្គលេខាធិការប្រតិបត្តិរងគណបក្សហ៊្វុនស៊ិនប៉ិច។
ពិធីនេះ បានធ្វើឡើងក្រោមអធិបតីភាពលោក ទេព ងន សមាជិកគណៈអចិន្ត្រៃយ៍គណៈកម្មាធិការកណ្ដាលគណបក្សប្រជាជនកម្ពុជា ដោយមានការអញ្ជើញចូលរួមពីសមាជិក សមាជិកា ជាច្រើនរូប។
នៅក្នុងពិធីនោះ លោក យ៉ង សាំងកុមារ បានសម្តែងនូវសេចក្តីរីករាយ និងអរគុណចំពោះគណៈអធិបតី ដែលបានបង្កើតនូវពិធីនេះឡើង ដែលបានអនុញ្ញាត្តឲ្យរូបខ្លួន បានចូលជាសមាជិកផ្លូវការរបស់គណបក្សប្រជាជនកម្ពុជា។ រូបលោកផ្ទាល់ បានមើលឃើញថា មានតែគណបក្សប្រជាជនតែមួយគត់ ដែលបម្រើផងប្រយោជន៍ជាតិ និងប្រជាជនយ៉ាងពិតប្រាកដ។
លោក យ៉ង សាំងកុមារ បញ្ជាក់ថា រូបលោកបានស្នើសុំសម្តេចតេជោដោយផ្ទាល់ ដើម្បីយកថ្ងៃ ០២ធ្នូ ដែលជាថ្ងៃប្រវត្តិសាស្រ្តបង្កើតរណសិរ្សរំដោះជាតិ ជាថ្ងៃចូលបក្ស ដើម្បីជាការដឹងគុណចំពោះការលះបង់របស់វីរជន ក៏ដូចជា គណបក្សប្រជាជនកម្ពុជា ដែលបានរំដោះកម្ពុជាពីរបបប៉ុលពត។
លោក យ៉ង សាំងកុមារ ក៏ដូចជា សមាជិកថ្មី ទាំង ៤រូបទៀត បានប្តេជ្ញាចិត្ត ៣ចំណុច រួមមាន៖ ១. គោរព និងអនុវត្តតាមកម្មវិធិ និងលក្ខន្តិកៈរបស់គណបក្សដោយឥតងាករេ និងប្រែក្លាយកម្មវិធីនយោបាយរបស់គណបក្ស ឲ្យទៅជាការអនុវត្តជាក់ស្តែង។ ២. ថែរក្សា ពង្រឹង សាមគ្គីភាពផ្ទៃក្នុង រក្សាការសម្ងាត់ និងគោរពអង្គវិន័យរបស់គណបក្សឲ្យបានខ្ជាប់ខ្ជួន និងម៉ឺងម៉ាត់ជាទីបំផុត។ ៣. ប្តេជ្ញាចូលរួមប្រជុំជីវភាពបក្សឲ្យបានទៀងទាត់។
ចំណែកលោកបណ្ឌិត ទេព ងន បានសម្តែងនូវសេចក្តីសោមនស្សរីករាយបំផុត និងបាននាំនូវការផ្តាំផ្ញើសួរសុខទុក្ខពីសំណាក់សម្តេចតេជោ ហ៊ុន សែន ប្រធានគណបក្ស ជូនចំពោះសមាជិកថ្មី និងអំពាវនាវឲ្យសមាជិកទាំងថ្មី និងចាស់ទាំងអស់ ធ្វើការរួបរួមគ្នា ដើម្បីពង្រឹងគណបក្សជាបន្ត។
លោកបានសង្កត់ធ្ងន់ថា សមាជិកចាស់ និងសមាជិកថ្មី គឺជាសមាជិកដូចគ្នា មិនមានការបែងចែកផ្សេងៗឡើយ។ សមាជិកទាំងអស់ ត្រូវមានស្មារតីរួបរួមគ្នា គោរពលក្ខន្តិកបក្ស និងបទបញ្ជាផ្ទៃក្នុងរបស់គណបក្សឲ្យបានហ្មឺងម៉ាត់បំផុត។
លោកបានរំលឹកឡើងវិញពីស្នាដៃជាប្រវត្តិសាស្រ្តរបស់គណបក្ស ចាប់តាំងពីពេលកកើតគណបក្ស រហូតមកទល់នឹងបច្ចុប្បន្ន រួមមាន ការវាយរំដោះយកឯករាជ្យជាតិពីអាណានិគមនិយមបារាំង ឆ្នាំ១៩៥៣ ផ្តួលរលំរបបលន់នល់ ឆ្នាំ១៩៧៥ និងគណបក្សប្រជាជនកម្ពុជា ជាកម្លាំងនយោបាយតែមួយគត់ ដែលបានរំដោះប្រជាជនពីរបបប្រល័យពូជសាសន៍ដ៏សាហាវយង់ឃ្នង នៅឆ្នាំ១៩៧៩ និងស្នាដៃជាប្រវត្តិសាស្រ្តផ្សេងៗជាបន្តទៀត។
លោកបណ្ឌិត ទេព ងន ក៏បានបន្ថែមថា គណបក្សប្រជាជនកម្ពុជា ក៏នៅបន្តចូលរួមជាកំលាំងស្នូលក្នុងការលើកស្ទួយសេដ្ឋកិច្ចប្រទេសជាតិ ថែរក្សាសន្តិភាព និងការអភិវឌ្ឈ ក្នុងពេលបច្ចុប្បន្នផងដែរ។ គណបក្សប្រជាជនកម្ពុជា បង្កើតដោយប្រជាជន ដើម្បីប្រជាជន និងបម្រើប្រជាជន៕