Views: 1
ប្រែសម្រួល : កញ្ញាដាលីស (ដេល្លីម៉េល) ៖ អគ្គលេខាធិការអង្គការសហប្រជាជាតិលោក លោក អង់តូនីញ៉ូ គូថេរ៉េសបានអំពាវនាវកាលពីថ្ងៃចន្ទទី៨សីហាឱ្យអធិការអន្តរជាតិអាចទទួលបានសិទ្ធិចូលទៅកាន់រោងចក្រនុយក្លេអ៊ែរក្នុងទីក្រុងហ្សាផូរីហ្សហ្សា (Zaporizhzhia)បន្ទាប់ពីអ៊ុយក្រែននិងរុស្ស៊ីបានចោទប្រកាន់គ្នាទៅវិញទៅមកជុំវិញការបាញ់ផ្លោងលើរោងចក្របរមាណូដ៏ធំបំផុតរបស់អឺរ៉ុបកាលពីចុងសប្តាហ៍។
លោកគូថេរ៉េសបានប្រាប់សន្និសីទសារព័ត៌មានក្នុងប្រទេសជប៉ុន ជាកន្លែងដែលលោកចូលរួមពិធីរំលឹកសន្តិភាពទីក្រុងហ៊ីរ៉ូស៊ីម៉ាកាលពីថ្ងៃសៅរ៍ ដើម្បីរំលឹកខួបលើកទី ៧៧នៃការទម្លាក់គ្រាប់បែកបរមាណូលើកដំបូងរបស់ពិភពលោក យ៉ាងដូច្នេះថា “ការវាយប្រហារណាមួយទៅលើរោងចក្រនុយក្លេអ៊ែរគឺជារឿងអត្តឃាត”។
អ៊ុយក្រែនបាននិយាយថា ការបាញ់ផ្លោងរបស់រុស្សីជាថ្មីកាលពីថ្ងៃសៅរ៍បានធ្វើឱ្យខូចឧបករណ៍ចាប់សញ្ញាវិទ្យុសកម្មចំនួនបីនិងបណ្តាលឱ្យបុគ្គលិកម្នាក់រងរបួសនៅក្នុងរោងចក្រថាមពលនៅទីក្រុងហ្សាផូរីហ្សហ្សា ដែលជាការវាយលុកលើកទីពីរក្នុងរយៈពេលប៉ុន្មានថ្ងៃជាប់ៗគ្នាទៅលើទីតាំងនេះ។
ប្រធានាធិបតីអ៊ុយក្រែនលោក វ៉ូឡូឌីមៀ ហ្សេលេនស្គី បានចោទប្រកាន់រុស្ស៊ីថាបានធ្វើ “ភេរវកម្មនុយក្លេអ៊ែរ” ដែលធានាឱ្យមានការដាក់ទណ្ឌកម្មអន្តរជាតិបន្ថែមទៀតដែលលើកនេះទៅលើវិស័យនុយក្លេអ៊ែររបស់ទីក្រុងមូស្គូ។
លោកហ្សេលេនស្គីបាននិយាយនៅក្នុងសុន្ទរកថាតាមទូរទស្សន៍កាលពីថ្ងៃអាទិត្យថា “គ្មានប្រទេសណានៅលើពិភពលោកអាចមានអារម្មណ៍សុវត្ថិភាពទេនៅពេលដែលរដ្ឋភេរវករម្នាក់បាញ់ប្រហារលើរោងចក្រនុយក្លេអ៊ែរ”។
កងកម្លាំងរុស្ស៊ីបានដណ្តើមយករោងចក្រនេះនៅភាគអាគ្នេយ៍អ៊ុយក្រែនកាលពីដើមខែមីនា ប៉ុន្តែវានៅតែដំណើរការដោយអ្នកបច្ចេកទេសអ៊ុយក្រែនដដែល។
អាជ្ញាធរដែលបន្តុបដោយរុស្ស៊ីនៃតំបន់នោះបាននិយាយថា កងកម្លាំងអ៊ុយក្រែនបានវាយប្រហារទីតាំងនោះដោយគ្រាប់រ៉ុក្កែតច្រើនគ្រាប់ ដោយបំផ្លាញអគាររដ្ឋបាលនិងតំបន់ក្បែរឃ្លាំងស្តុកទុក។ស្ថានទូតរុស្ស៊ីប្រចាំទីក្រុងវ៉ាស៊ីនតោនក៏បានចេញសេចក្តីថ្លែងការណ៍មួយ ដែលបង្ហាញពីការខូចខាតផងដែរ។
ព្រឹត្តិការណ៍ទីតាំងនុយក្លេអ៊ែរហ្សាផូរីហ្សហ្សា ដែលទីក្រុងគៀវចោទប្រកាន់ថារុស្ស៊ីជាអ្នកវាយបណ្តាលឱ្យប៉ះពាល់ខ្សែថាមពលកាលពីថ្ងៃសុក្រ បានធ្វើឱ្យពិភពលោកព្រួយបារម្ភ។
លោកគូថេរ៉េសបាននិយាយថា ទីភ្នាក់ងារថាមពលអាតូម៉ិកអន្តរជាតិ (IAEA)ត្រូវការសិទ្ធិចូលទៅកាន់រោងចក្រនេះ។
លោកគូថេរ៉េសបាននិយាយថា “យើងគាំទ្រយ៉ាងពេញទំហឹងដល់ IAEA នៅក្នុងកិច្ចខិតខំប្រឹងប្រែងរបស់ពួកគេទាំងអស់ទាក់ទងនឹងការបង្កើតលក្ខខណ្ឌដើម្បីស្ថិរភាពរោងចក្រ”។
ប្រធាន IAEA លោក រ៉ាហ្វាអែល ម៉ារីយ៉ាណូ ហ្គ្រោសស៊ី (Rafael Mariano Grossi)បានព្រមានកាលពីថ្ងៃសៅរ៍ថា ការវាយប្រហារចុងក្រោយនេះ”គូសបញ្ជាក់ពីហានិភ័យពិតប្រាកដនៃគ្រោះមហន្តរាយនុយក្លេអ៊ែរ”៕
អគ្គលេខាធិការអង្គការសហប្រជាជាតិលោក លោក អង់តូនីញ៉ូ គូថេរ៉េសបានអំពាវនាវកាលពីថ្ងៃចន្ទទី៨សីហាឱ្យអធិការអន្តរជាតិអាចទទួលបានសិទ្ធិចូលទៅកាន់រោងចក្រនុយក្លេអ៊ែរក្នុងទីក្រុងហ្សាផូរីហ្សហ្សា