Views: 3
ប្រែសម្រួលៈបំណង(ដេល្លីម៉េល)៖អគ្គលេខាអង្គការណាតូលោក ជេនស៍ ស្តូលថិនប៊ឺក កំពុងនៅជប៉ុន ជាផ្នែកនៃដំណើរទស្សនកិច្ចអាស៊ីបូព៌ារបស់លោក។នៅទីនោះ លោកបាននិយាយថា«សន្តិសុខរបស់យើងមានទំនាក់ទំនងគ្នាយ៉ាងជិតដិត»និងបានអំពាវនាវអោយពង្រឹងទំនាក់ទំនងជាមួយជប៉ុន នៅពេលសង្គ្រាមរបស់រុស្ស៊ីនៅអ៊ុយក្រែនបង្កើនគ្រោះថ្នាក់ជាសកលនិងបង្ហាញថាបណ្តាប្រទេសប្រកាន់លទ្ធិប្រជាធិបតេយ្យត្រូវការភាពជាដៃគូអោយកាន់តែរឹងមាំឡើង។
ជប៉ុនបានរួសរាន់ចូលរួមយុទ្ធនាការដាក់ទណ្ឌកម្មដឹកនាំដោយអាម៉េរិកលើរុស្ស៊ីដោយសារសង្គ្រាមឈ្លានពាននៅអ៊ុយក្រែននិងបានផ្តល់ជំនួយមនុស្សធម៌ព្រមទាំងគ្រឿងបរិក្ខារយោធាមិនមានលក្ខណៈប្រយុទ្ធទៅអោយអ៊ុយក្រែន។
នាយករដ្ឋមន្ត្រីជប៉ុនលោកហ្វ៊ុយមីអុ គីស៊ីដា បានព្រមានថា ការឈ្លានពានរបស់រុស្ស៊ីនៅអឺរ៉ុបអាចកើតឡើងនៅអាស៊ី កន្លែងដែលគេកំពុងព្រួយបារម្ភអំពីចិនដែលកាន់តែអាងយ៉ាងនិងភាពតានតឹងកាន់តែកើនឡើងនៅក្បែរកោះតៃវ៉ាន់។
ជប៉ុនក៏បានបង្កើនទំនាក់ទំនងជាមួយណាតូកាលពីពេលថ្មីៗ។
លោក ស្តូលថិនប៊ឺក បាននិយាយក្នុងអំឡុងពេលទៅទស្សនាមូលដ្ឋានទ័ពអាកាសអ៊ីរូម៉ា(Iruma)នៅខាងជើងទីក្រុងតូក្យូថា «សង្គ្រាមនៅអ៊ុយក្រែនក៏បង្ហាញថា សន្តិសុខរបស់យើងមានទំនាក់ទំនងគ្នាយ៉ាងជិតស្និទ្ធផងដែរ។បើសិនជាប្រធានាធិបតី វ្ល៉ាឌីមៀ ពូទីន ឈ្នះនៅអ៊ុយក្រែន វានឹងជាសោកនាដកម្មមួយសំរាប់ប្រជាជនអ៊ុយក្រែន តែវាក៏នឹងបញ្ជូនសារគ្រោះថ្នាក់ខ្លាំងណាស់មួយទៅកាន់ពួកមេដឹកនាំផ្តាច់ការនៅលើពិភពលោកថាមានតែប្រើកម្លាំងយោធា ទើបពួកគេអាចសំរេចគោលដៅរបស់គេ។ដូច្នេះ សង្គ្រាមនៅអ៊ុយក្រែនជាបញ្ហារបស់យើងទាំងអស់គ្នា»។
លោក ស្តូលថិនប៊ឺក បានបន្ថែមថា ដំណើរទស្សនកិច្ចរបស់លោកនៅជប៉ុនជា«ផ្លូវមួយដើម្បីពង្រឹងភាពជាដៃគូរវាងណាតូនិងដៃគូជប៉ុនដ៏មានតំលៃរបស់យើង»។
អគ្គលេខាអង្គការណាតូលោក ជេនស៍ ស្តូលថិនប៊ឺកទស្សនាមូលដ្ឋានទ័ពអាកាសអ៊ីរូម៉ានិងថ្លែងសុន្ទរកថាទៅកាន់កងកម្លាំងស្វ័យការពារជប៉ុនកាលពីថ្ងៃអង្គារទី៣១មករា
លោក ស្តូលថិនប៊ឺកឡើងអង្គុយសាកក្នុងកន្លែងបើកយន្តហោះប្រយុទ្ធ F-2របស់ជប៉ុនកាលពីថ្ងៃអង្គារ
នៅថ្ងៃយប់អង្គារលោកត្រូវជួបនាយករដ្ឋមន្ត្រីជប៉ុននិងធ្វើសន្និសីទកាសែតរួមគ្នាមួយ។
សូមបញ្ជាក់ថា ជប៉ុនជាសម្ពន្ធមិត្តជិតដិតបំផុតរបស់អាម៉េរិក និងនៅប៉ុន្មានឆ្នាំចុងក្រោយនេះបានពង្រីកទំនាក់ទំនងយោធាជាមួយបណ្តាប្រទេសក្នុងតំបន់ឥណ្ឌូប៉ាស៊ីហ្វិក ព្រមទាំងជាមួយអង់គ្លេស អឺរ៉ុបនិងណាតូ ចំពេលមានការព្រួយបារម្ភអំពីសន្តិសុខខ្លាំងឡើងដោយសារតែការគំរាមមកពីចិននិងកូរ៉េខាងជើង។
នៅកូរ៉េខាងត្បូងកាលពីថ្ងៃចន្ទ អគ្គលេខាអង្គការណាតូបានអំពាវនាវអោយកូរ៉េខាងត្បូងផ្តល់ការគាំទ្រយោធាដោយផ្ទាល់ទៅកាន់អ៊ុយក្រែនដើម្បីជួយរដ្ឋាភិបាលទីក្រុងគៀវប្រយុទ្ធទល់នឹងកងកម្លាំងឈ្លានពានរុស្ស៊ី។
តាំងពីមុនមក កូរ៉េខាងត្បូងគ្រាន់តែផ្តល់ជំនួយមនុស្សធម៌និងការគាំទ្រផ្សេងៗ ដោយសារប្រទេសមានគោលនយោបាយមិនផ្តល់សព្វាវុធទៅកាន់ប្រទេសមានជម្លោះ៕
អគ្គលេខាអង្គការណាតូលោក ស្តូលថិនប៊ឺក បានជួបប្រធានាធិបតីកូរ៉េខាងត្បូង កាលពីថ្ងៃចន្ទនិងបានពិភាក្សាអំពីការគាំទ្ររបស់កូរ៉េខាងត្បូងចំពោះអ៊ុយក្រែន