Views: 1
ប្រែសម្រួលៈបំណង(ស្ត្រេតថែមស៍)៖ ប្តីប្រពន្ធដែលជាប់ពាក់ព័ន្ធនឹងកាបូបនិងនាឡិកាប្រណិត(ប្រ៊ែន)តំលៃ៣២លានដុល្លារ ត្រូវបានចាប់ខ្លួននៅសណ្ឋាគារមួយនៅទីក្រុង ចូហ័រ បារូ(Johor Bahru )របស់ម៉ាឡេស៊ី ។
ប៉ូលិសក្នុងឯកសណ្ឋានស៊ីវិលបានចាប់ខ្លួន ភី ជាផេង(Pi Jiapeng)អាយុ២៦ឆ្នាំ និងប្រពន្ធអាយុ២៧ឆ្នាំ ជាជនជាតិថៃ នាងផានស៊ុក ស៊ីរីវីផា(Pansuk Siriwipa)នៅពេលអ្នកទាំងពីរប្រុងចុះឈ្មោះចូលស្នាក់នៅសណ្ឋាគារ BookMe Hotelកាលពីថ្ងៃពុធទី១០សីហា។
បុគ្គលិកសណ្ឋាគារបានប្រាប់សារព័ត៌មានស្ត្រេតថែមស៍ថា« ប្តីប្រពន្ធនេះមិនស្នាក់នៅក្នុងសណ្ឋាគារទេ។ពួកគេកំពុងចុះឈ្មោះស្រាប់តែប៉ូលិសមកដល់។វាកើតឡើងលឿនណាស់និងពួកគេត្រូវបាននាំចេញតែបួនប្រាំនាទី»។
កាម៉េរ៉ាសណ្ឋាគារបង្ហាញប៉ូលិសនៅក្បែរប្តីប្រពន្ធនៅពេលពួកគេអង្គុយនៅលើកៅអីមួយក្នុងបន្ទប់សណ្ឋាគារ
ភី និង ស៊ីរីវីផា ត្រូវប៉ូលិសចាប់ខ្លួននិងបញ្ជូនត្រឡប់ទៅសិង្ហបុរីវិញកាលពីថ្ងៃព្រហស្បតិ៍ដើម្បីប្រឈមការចោទប្រកាន់នៅថ្ងៃសុក្រទី១២សីហា
ក្រោយការចាប់ខ្លួន ប្តីប្រពន្ធនេះត្រូវបាននាំទៅកាន់សិង្ហបុរីវិញក្រោមការអមការពាររបស់ប៉ូលិសកាលពីថ្ងៃព្រហស្បតិ៍ដើម្បីប្រឈមការចោទប្រកាន់ពីបទសមគំនិតគ្នាប្រព្រឹត្តការបោកបន្លំនិងការចាកចេញពីសិង្ហបុរីដោយខុសច្បាប់។
គូស្នេហ័វ័យក្មេងនេះ ជាប់ពាក់ព័ន្ធនឹងរឿងអាស្រូវទំនិញប្រណិតក្រោយមានបណ្តឹងយ៉ាងតិច១៨០ចាប់តាំងពីខែមិថុនាឆ្នាំនេះថាពួកគេមិនបានផ្ញើអីវ៉ាន់អោយ ដូចជានាឡិកានិងកាបូបប្រ៊ែនៗអោយតាមការសន្យា។ជនរងគ្រោះបានអះអាងថា ពួកគេបានបង់ប្រាក់អោយប្តីប្រពន្ធនេះជាមុនសំរាប់ទំនិញបញ្ជូនអោយតាមក្រោយ។បុរសម្នាក់បានអះអាងថា ខ្លួនបានចំណាយលុយ២៨០.០០០ដុល្លារសំរាប់នាឡិកាRolexពីរគ្រឿងនិងPatek Philippeមួយ។
អ្នកទាំងពីរត្រូវប៉ូលិសសិង្ហបុរីហៅអោយចូលខ្លួន ដោយលោកភីបានបង់ប្រាក់ធានាខ្លួននៅក្រៅឃុំនិងនាងស៊ីរីវីផា ត្រូវបានដកលិខិតឆ្លងដែន។ប្តីប្រពន្ធនេះស្រាប់តែគេទាក់ទងលែងបាននិងបានភៀសខ្លួនចេញពីសិង្ហបុរីកាលពីថ្ងៃ៤កក្កដា ហើយអាជ្ញាធរបានចេញដីកាចាប់ខ្លួនពួកគេកាលពីថ្ងៃ១៦កក្កដា។
ប៉ូលិសអន្តរជាតិក៏បានចេញនិវេទន៍ក្រហមនៅពេលក្រោយមកដើម្បីតាមចាប់អ្នកទាំងពីរមុនពេលប៉ូលិសសិង្ហបុរីទទួលបានការជូនដំណឹងពីប៉ូលិសថៃកាលពីថ្ងៃពុធថា ប្តីប្រពន្ធនេះអាចស្នាក់នៅក្នុងសណ្ឋាគារមួយនៅក្រុងចូហ័រ បារូ។
បន្ទាប់ពីប៉ូលិសសិង្ហបុរីសុំជំនួយ ប៉ូលិសម៉ាឡេស៊ីបានចាត់ការចាប់ខ្លួនពួកគេបញ្ជូនទៅសិង្ហបុរីភ្លាមកាលពីថ្ងៃ១១សីហា៕