Views: 8
ប្រែសម្រួលៈបំណង(ដេល្លីម៉េល)៖បុរសរុស្ស៊ីក្នុងវ័យបំរើកងទ័ពបាននាំគ្នាភៀសខ្លួនចេញពីរុស្ស៊ីទាំងហ្វូងៗចាប់ពីថ្ងៃសុក្រ ទាំងតាមយន្តហោះនិងតាមជើងគោកដោយបង្កការកកស្ទះចរាចរណ៍នៅតាមច្រកព្រំដែន ដើម្បីគេចចេញពីចាប់ចូលធ្វើទាហានទៅប្រយុទ្ធនៅអ៊ុយក្រែន បន្ទាប់ពីប្រធានាធិបតីវ្ល៉ាឌីមៀ ពូទីន ប្រកាសកំណែនទ័ពមួយផ្នែក។
យានយន្តទាំងជួរលាតសន្ធឹងប្រមាណ១០គីឡូម៉ែត្រនៅតាមដងផ្លូវឆ្ពោះទៅកាន់ព្រំដែនហ្សកហ្ស៊ី(Georgia)នេះបើតាមសេវាផែនទីYandex Mapsរបស់រុស្ស៊ី។រថយន្តទាំងជួរក៏ត្រូវបានគេសង្កេតឃើញនៅព្រំដែនកាហ្សាក់ស្ថាននិងហ្វាំងឡង់ ដោយអ្នកខ្លះបានបោះបង់ចោលរថយន្តរបស់គេនិងធ្វើដំណើរដោយជើង។
រថយន្តតម្រង់ជួររង់ចាំឆ្លងកាត់ព្រំដែនរុស្ស៊ីចូលហ្វាំងឡង់កាលពីថ្ងៃសុក្រទី២៣កញ្ញា
ក្នុងពេលជាមួយគ្នា ជើងហោះហើររាប់សិបចេញពីរុស្ស៊ី ដែលសំបុត្រលក់ថ្លៃកប់ពពក បានដឹកបុរសៗទៅកាន់អាកាសយានដ្ឋានអន្តរជាតិនានាដូចជា តួកគី អាម៉េនី អាស៊ែបៃសង់និងស៊ែប៊ីកន្លែងដែលជនជាតិរុស្ស៊ីមិនចាំបាច់មានទិដ្ឋាកា។
ក្នុងចំណោមអ្នកទៅដល់តួកគី រួមមានបុរសវ័យ៤០ឆ្នាំម្នាក់ដែលបានទៅដល់ទីក្រុងអ៊ីស្តាន់ប៊ុលជាមួយនឹងវ៉ាលីសមួយនិងសាក់កាដូមួយ ហើយមានផែនការចាប់ផ្តើមជំវិតនៅអ៊ីស្រាអែល។បុរសនេះបាននិយាយថា«ខ្ញុំប្រឆាំងសង្គ្រាម ខ្ញុំនឹងនឹងមិនជាផ្នែកនៃវាទេដោយមិនចង់ក្លាយជាឃាតករ។ខ្ញុំនឹងមិនទៅសម្លាប់មនុស្សទេ»។
បុរសរុស្ស៊ីខ្លះក៏បានភៀសខ្លួនទៅកាន់ប្រទេសក្បែរខាងបេឡារូស តែនៅតែមានហានិភ័យដោយសារតែបេឡារូសជាសម្ពន្ធមិត្តរុស្ស៊ី។
ប្រធានាធិបតីរុស្ស៊ីលោក ពូទីន កាលពីថ្ងៃពុធបានប្រកាសកំណែនមួយផ្នែកគឺរើសទាហានបំរុង៣០០.០០០នាក់។
ក្នុងពេលជាមួយគ្នា អាជ្ញាធររុស្ស៊ីបានព្យាយាមរម្ងាប់ក្តីបារម្ភរបស់សារធារណជនអំពីកំណែនទ័ពនេះ ហើយក្រសួងការពារជាតិបាននិយាយថា អ្នកធ្វើការក្នុងវិស័យបច្ចេកវិទ្យា ទូរគមនាគមន៍ឬហិរញ្ញវត្ថុនិងអ្នកកាសែតនឹងត្រូវលើកលែងពីការហៅចូលទាហាន ដើម្បី«ធានាប្រតិបត្តិការ»ក្នុងវិស័យទាំងនោះ៕
ប្រជាជនរុស្ស៊ីក៏សំរុកចេញតាមយន្តហោះ
