Views: 4
ប្រែសម្រួលៈបំណង(ST)៖ បវរកញ្ញាមីយ៉ាន់ម៉ា ដែលនិយាយប្រឆាំងនឹងក្រុមមេដឹកនាំយោធាមីយ៉ាន់ម៉ា កំពុងជាប់នៅអាកាសយានដ្ឋានអន្តរជាតិរបស់ថៃដល់ថ្ងៃទីបីកាលពីថ្ងៃសុក្រដោយសង្ឃឹមបានចូលប្រទេសថៃនៅពេលពួកសកម្មជននិងថៅកែរបស់នាងទទូចសុំអាជ្ញាធរថៃកុំអោយបញ្ជូននាងទៅកាន់ប្រទេសមីយ៉ាន់ម៉ា។
នាង ហាន ឡេយ(Han Lay)បានល្បីឈ្មោះនៅអន្តរជាតិកាលពីឆ្នាំមុនដោយសារតែបានយកវេទិកាប្រកួតបវរកញ្ញាថ្លែងថ្កោលទោសការបង្ក្រាបរបស់ក្រុមយោធាលើការតវ៉ាប្រឆាំងរដ្ឋប្រហារនៅក្នុងប្រទេសមីយ៉ាន់ម៉ារបស់នាង។នាងត្រូវអាជ្ញាធរថៃបដិសេធមិនអោយចូលក្នុងប្រទេសរបស់គេ ទោះជាបានជ្រកកោននៅក្នុងប្រទេសថៃអស់ពេលមួយឆ្នាំកន្លងទៅ។
តារាម៉ូដែលវ័យ២៣ឆ្នាំរូបនេះ ដែលមានឈ្មោះពិតថា ថរ ណាន់ដា អ៊ុង(Thaw Nandar Aung)ត្រូវបានឃាត់ខ្លួនទុកនៅអាកាសយានដ្ឋានអន្តរជាតិសុវណ្ណភូមិក្នុងក្រុងបាងកកកាលពីថ្ងៃពុធពេលនាងវិលពីការទៅទស្សនាប្រទេសវៀតណាមមួយរយៈពេលខ្លី។
ការិយាល័យអន្តោប្រវេសន៍បាននិយាយថា នាងប្រើឯកសារធ្វើដំណើរហួសសុពលភាព។
ក្នុងពេលជាមួយគ្នា ក្រុមចាត់ចែងព្រឹត្តិការណ៍របស់នាងហាន ឡេយ បាននិយាយថា ខ្លួនសង្ឃឹមថានាងអាចត្រូវបានអនុញ្ញាតអោយចូលក្នុងប្រទេសថៃឡើងវិញហើយ«រឿងតែមួយដែលពួកយើងចង់បានគឺមិនត្រូវបញ្ជូននាងទៅមីយ៉ាន់ម៉ា ដោយសារតែយើងមិនដឹងថានឹងមានអ្វីកើតឡើងបន្ទាប់ពីនាងទៅដល់ទីនោះ»។
នៅពេលត្រូវបានបានសួរអំពីករណីនាងហាន ឡេយនេះកាលពីថ្ងៃសុក្រ អ្នកនាំពាក្យក្រសួងការបរទេសថៃបាននិយាយថា អាជ្ញាធរ«មិនបានធ្វើការចាប់ខ្លួន និងក៏មានផែនការបញ្ជូននាងទៅទីណាមួយទេនៅដំណាក់កាលនេះ»។
នាង ហាន ឡេយនិងអ្នកចាត់ការរបស់នាងបាននិយាយថា នាងជាកម្មវត្ថុនៃការតាមចាប់ខ្លួនរបស់ប៉ូលិសអន្តរជាតិ តែប៉ូលិសថៃបានបដិសេធមិនបញ្ជាក់ថាតើមានការជូនដំណឹងតាមចាប់ខ្លួនដូច្នេះឬអត់។
ក្នុងសារបង្ហោះតាមហ្វេសប៊ុក នាងហាន ឡេយ បាននិយាយថា ប៉ូលិសមីយ៉ាន់ម៉ាបានស្ថិតនៅអាកាសយានដ្ឋានក្រុងបាងកកដើម្បីស្វះស្វែងជួបនាង តែនាងបដិសេធ ហើយបានទាក់ទងទៅទីភ្នាក់ងារជនភៀសខ្លួនរបស់អង្គការសហប្រជាជាតិ ៕
ហាន ឡេយ ជាបវរកញ្ញា Miss Grand International Myanmar 2000 និងបានធ្វើដំណើរមកបាងកកកាលពីឆ្នាំមុនដើម្បីចូលរួមការប្រកួតMiss Grand International 2000។នាងបានសុំការជ្រកកោននៅថៃបន្ទាប់ពីអាជ្ញាធរចេញដីកាចាប់ខ្លួនក្រោយនាងនិយាយបរិហាររបបយោធានៅឯស្រុករបស់នាង
នាង ហាន ឡេយ ធូរចិត្តបន្តិចក្រោយពីអាជ្ញាធរថៃអះអាងថានឹងមិនបញ្ជូននាងទៅមីយ៉ាន់ម៉ាវិញកាលពីថ្ងៃសុក្រ តែវាសនានាងនៅមិនច្បាស់លាស់នៅឡើយ