Views: 2
ដោយ៖ រ៉ាម៉ន / ភ្នំពេញ៖ លោក ម៉ប់ សារិន ប្រធានក្រុមប្រឹក្សារាជធានីភ្នំពេញ បានសម្តែងនូវការកោតសរសើរ ចំពោះអាជ្ញាធររាជធានីភ្នំពេញ និងកម្លាំងមានសមត្ថកិច្ច របស់រាជធានីភ្នំពេញ ដែលបានគ្រប់គ្រងសភាពការណ៍ សន្តិសុខ សណ្តាប់ធ្នាប់ បានយ៉ាងល្អប្រសើរ ក្នុងកិច្ចប្រជុំរដ្ឋមន្ត្រីការបរទេសអាស៊ាន នាប៉ុន្មានថ្ងៃកន្លងមកនេះ ខណៈកម្ពុជាធ្វើជាម្ចាស់ផ្ទះ។ បន្ថែមពីនេះ រដ្ឋបាលរាជធានីភ្នំពេញ ក៏បានដោះស្រាយ បញ្ហាជាកង្វល់របស់ប្រជាពលរដ្ឋ បានល្អប្រសើរផងដែរ។
ការសម្តែងនូវការកោតសរសើរ ពីសំណាក់ប្រធានក្រុមប្រឹក្សារាជធានីភ្នំពេញបែបនេះ បានធ្វើឡើង នាព្រឹកថ្ងៃទី១១ ខែសីហា ឆ្នាំ២០២២នេះ ក្នុងកិច្ចប្រជុំសាមញ្ញ លើកទី៣៩ របស់ក្រុមប្រឹក្សារាជធានីភ្នំពេញ អាណត្តិទី៣ ។
លោក ម៉ប់ សារិន បានមានប្រសាសន៍ថាៈ រាជរដ្ឋាភិបាល នៃព្រះរាជាណាចក្រកម្ពុជា និងរដ្ឋបាលរាជធានីភ្នំពេញ បានដឹកនាំ និងគ្រប់គ្រងសភាពការណ៍សន្តិសុខ សណ្តាប់ធ្នាប់ បានល្អប្រសើរ ក្នុងកិច្ចប្រជុំរដ្ឋមន្ត្រីការបរទេសអាស៊ាន និងកិច្ចប្រជុំពាក់ព័ន្ធមួយចំនួនទៀត ក្នុងនោះ គណៈបញ្ជាការឯកភាពរដ្ឋបាលរាជធានីភ្នំពេញ និងកងកម្លាំងគ្រប់លំដាប់ថ្នាក់ បានយកចិត្តទុកដាក់ខ្ពស់ រក្សាបានសុវត្ថិភាពល្អ ក្នុងកិច្ចប្រជុំរដ្ឋមន្ត្រីការបរទេសអាស៊ាន លើកទី៥៥នេះ ។ ទន្ទឹមនេះ ការរៀបចំសណ្ដាប់ធ្នាប់ សុវត្ថិភាព ក៏មានលក្ខណៈល្អប្រសើរ ដោយសមត្ថកិច្ចគ្រប់លំដាប់ថ្នាក់ បានយកចិត្តទុកដាក់ ខិតខំបំពេញភារកិច្ច ដោយមានការចូលរួម ពីប្រជាពលរដ្ឋបានល្អ។
លោក បានបន្តថាៈ ក្នុងនាមប្រជាពលរដ្ឋកម្ពុជា យើងពិតជាមានមោទនភាពក្រៃលែង ដែលកម្ពុជា ក្នុងនាមជាប្រធានអាស៊ានប្តូរវេន បានរៀបចំកិច្ចប្រជុំរដ្ឋមន្ត្រីការបរទេស អាស៊ាន លើកទី៥៥ និងកិច្ចប្រជុំពាក់ព័ន្ធ ប្រកបដោយជោគជ័យ ធានាបានសន្តិសុខ សុវត្ថិភាព និងសណ្ដាប់ធ្នាប់ ធ្វើឱ្យកិច្ចប្រជុំដំណើរការ ដោយអនុលោមទៅតាមស្មារតី អាស៊ាន «ទស្សនៈវិស័យមួយ អត្តសញ្ញាណមួយ សហគមន៍មួយ» ក្នុងនោះ យើងសង្កេតឃើញ រដ្ឋមន្ត្រីការបរទេស នៃប្រទេសធំៗ ដូចជា សហរដ្ឋអាមេរិក សហព័ន្ធរុស្ស៊ី សាធារណរដ្ឋប្រជាមានិតចិន ។ល។ បានអញ្ជើញចូលរួមពិភាក្សា និងជួបសម្ដែងការគួរសមជាមួយ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាេជាណាចក្រកម្ពុជា ផងដែរ ។
បន្ថែមពីលើនេះ អាជ្ញាធររាជធានីភ្នំពេញ បានធ្វើការសម្របសម្រួល ដោះស្រាយ បញ្ហាជាមួយបងប្អូនអាជីវករ ផ្សារអូរឫស្សី ដោយកំណត់អាណត្តិថ្មី ២០ឆ្នាំ (២០២២-២០៤២) និងបានដោះស្រាយបញ្ចប់ នៅតំបន់អភិវឌ្ឍន៍ឫស្សីកែវ ថែមទៀត។
លោក មាន ចាន់យ៉ាដា អភិបាលរងរាជធានីភ្នំពេញ ក៏បានលើកឡើងដែរថាៈ ការទទួលបានជោគជ័យ ក្នុងកិច្ចការពារសន្តិសុខ សុវត្ថិភាព បានល្អ ក្នុងកិច្ចប្រជុំរដ្ឋមន្ត្រី ការបរទេសអាស៊ាន លើកទី៥៥នេះ គឺយើងដោះស្រាយបញ្ហាបានល្អ អាជ្ញាធររាជធានីភ្នំពេញ កងរាជអាវុធហត្ថ និងកងកម្លាំងប៉ូលិសរាជធានីភ្នំពេញ សហការគ្នាបានល្អ ។ នេះជាបទពិសោធន៍ដ៏ល្អមួយ ដែលយើងអាចទទួលបាន ភាពជោគជ័យ ជាបន្តបន្ទាប់ទៀត នៅក្នុងកិច្ចប្រជុំកំពូលៗ នៅពេលខាងមុខទៀត៕/V