Views: 8
ដោយៈ សុផានីតា / កោះកុង៖ អាជ្ញាធរស្រុកបូទុមសាគរ និងអង្គការដៃគូអភិវឌ្ឍន៍ រួមគ្នាគិតគូរដោះស្រាយពីតម្រូវការ ខណៈមានការខ្វះខាតរបស់ប្រជាពលរដ្ឋ រស់នៅក្នុងភូមិចំនួន២ គឺភូមិខ្មែរឥស្លាម និងភូមិសុវណ្ណាបៃតងនៅក្នុងឃុំអណ្តូងទឹក និងឃុំកណ្តោល ដើម្បីលើកកម្ពស់ជីវភាព កាន់តែរីកចម្រើន។
លោក ក្រូច បូរីសីហា អភិបាលស្រុកបូទុមសាគរ បានឱ្យដឹងនៅថ្ងៃទី២៧ កញ្ញានេះថាៈប្រជាពលរដ្ឋ ២៣ នាក់ បន្តបានទទួលកញ្ចប់ថវិកាចិញ្ចឹមសត្វគោ ចំនួន៥ក្បាល អណ្តូងទឹកស៊ីទែនចំនួន១៦ ផ្ទះចំនួន២ខ្នង ដែលសរុបថវិកា ១៤.៤០០ ដុល្លារអាមេរិក ដើម្បីជាទុនដល់ពួកគាត់សម្រាប់ការរស់នៅ ក៏ដូចជាបង្កបង្កើនផលចិញ្ចឹមជីវិត ទៅថ្ងៃអនាគត។
លោកអភិបាលស្រុកបូទុមសាគរ ក្នុងពិធីសំណេះសំណាល និងប្រគល់អំណោយជូនប្រជាពលរដ្ឋខ្មែរឥស្លាម ទាំង២ភូមិ កាលពីថ្ងៃទី២៦ ខែកញ្ញា ក៏រម្លឹកដែរថាៈ ឆ្នាំ២០២១ កន្លងទៅ អង្គការមូលនិធិអាស៊ាន និងសមាគមសម្ព័ន្ធយុវជនមុស្លីមកម្ពុជាខេត្តកោះកុង ដឹកនាំដោយលោក រ៉ូស ម៉ានហ្សះរី និងលោក សុះ ម៉ាត់លី ធ្លាប់បានផ្តល់ជាអណ្តូងបុកខ្នាតធំ ដាក់ស៊ីទែនចំនួន១ បន្ទប់ទឹកខ្នាតធំចំនួន២ អណ្តូងដាក់ស៊ីទែនតូចចំនួន៨ ចែកមេមាន់ធ្វើពូជចំនួន៥ក្បាល និងថវិកាក្នុង១គ្រួសារ ៣៥០.០០០ រៀល ដល់ ២០ គ្រួសារ ចែកសាច់គោ ជារៀងរាល់ឆ្នាំ។
ដូច្នេះលោកអភិបាលស្រុក និងអាជ្ញាធរសមត្ថកិច្ចមូលដ្ឋាន សូមកោតសរសើរដល់តំណាងអង្គការ សមាគមទាំងពីរ ដែលគិតគូរជួយឧបត្ថម្ភផ្តត់ផ្គង់នូវសម្ភារៈជាសម្ពារៈ និងថវិកាជំហានទី២ សម្រាប់ប្រជាពលរដ្ឋ ក្នុងមូលដ្ឋានរបស់លោក។
ទាក់ទងបញ្ហនេះដែរ លោក ក្រូច បូរីសីហា រំពឹងទុកថា ប្រជាពលរដ្ឋដែលទទួលបានការឧបត្ថម្ភគាំទ្រ និងលើកកម្ពស់ខាងផ្នែកជីវភាពរស់នៅ និងប្រឹងប្រែងយកចិត្តទុកដាក់ខ្ពស់ លើការបង្កបង្កើនផល ទំនាក់ទំនងប្រកបដោយសុខុមដុមរមនា រវាងគ្នានិងគ្នា ព្រមទាំងមានសុខភាពល្អ តាមការប្រើប្រាស់ទឹកស្អាត។ ទោះបីជាប្រព័ន្ធទឹកស្អាត មិនទាន់ដល់ទៅមូលដ្ឋានរបស់ពួកគាត់ យ៉ាងណាក្តី។
ទន្ទឹមនឹងប្រទេសកម្ពុជា និងខេត្តកោះកុង មានអាកាសធាតុប្រែប្រួល អាជ្ញាធរស្រុកបូទុមសាគរ ក៏ណែនាំដល់ប្រជាពលរដ្ឋថែរក្សាសុខភាពឱ្យល្អ ចៀសឆ្ងាយពីជំងឺផ្សេងៗ ករណីមានបញ្ហាគ្រោះធម្មជាតិណាមួយ សូមប្រញាប់ផ្តល់ព័ត៌មានជាបន្ទាន់ មកកាន់អាជ្ញាធរភូមិឃុំ ដើម្បីត្រៀមដោះស្រាយបានទាន់ពេលវេលា។ បើពលរដ្ឋណា មានជំងឺ ប្រញាប់ទៅកាន់មន្ទីរពេទ្យដែលនៅជិតលំនៅដ្ឋាន៕ V / N
