Views: 5
ប្រែសម្រួលៈបំណង(ដេល្លីម៉េល)៖ អាម៉េរិកភាគឦសាននិងកាណាដាកំពុងជួបអាកាសធាតុត្រជាក់បំផុតក្នុងមួយជំនាន់មនុស្ស ដោយបណ្តាលអោយតំបន់ខ្លះចុះត្រជាក់បំផុតមិនដែលធ្លាប់ជួបក្នុងរយៈពេលប៉ុន្មានទសវត្សរ៍មកនេះ គឺដក៥០អង្សាសេ(-50C)។
អាកាសធាតុមហាត្រជាក់កំពុងវាយប្រហាររដ្ឋញូវយ៉ក និងតំបន់ញូវ អ៊ីងលឹនរបស់អាម៉េរិក ដល់កាណាដា
សេវាអាកាសធាតុជាតិអាម៉េរិក បានព្រមានថា ផ្នែកខ្លះនៃរដ្ឋមេន( Maine)អាចជួបខ្យល់ត្រជាក់ស្រេងដល់ទៅដក៥១អង្សាសេ។អាកាសធាតុត្រជាក់បែបនេះមិនដែលធ្លាប់ជួបទេចាប់តាំងពីបាតុភូតស្រដៀងគ្នាបានកើតមាននៅឆ្នាំ១៩៨២និង១៩៨៨។
សេវាអាកាសធាតុអាម៉េរិកបានបញ្ជាក់ថា ស្ថាននីយឧតុនិយមភាគច្រើនព្យាករណ៍អំពីអាកាសធាតុត្រជាក់បំផុតដូច្នេះធៀបនឹងអាកាសធាតុនៅប៉ុន្មានទសវត្សរ៍មកនេះ និងនៅកន្លែងខ្លះត្រជាក់បំផុតក្នុងប្រវត្តិអាម៉េរិក»។វាក៏បានព្រមានអំពីកំណកទឹកកកនៅលើស្បែកដែលអាចកើតឡើងតែក្នុងប្រាំនាទី។
ស្ថានភាពអាកាសធាតុអាក្រក់បំផុតនេះត្រូវបានព្យាករណ៍ថាកើតមានចាប់ពីយប់ថ្ងៃសុក្ររហូតដល់ព្រឹកថ្ងៃសៅរ៍ទី៤កុម្ភៈ ហើយការព្រមានអំពីអាកាសធាតុអាក្រក់ខ្លាំងសំរាប់ខេត្តកេបិច( Quebec)របស់កាណាដានិងកាណាដាខាងកើត។
នៅក្រុងម៉ុងត្រេអាល់ (Montreal)ខ្យល់ធ្វើអោយសីតុណ្ហភាពចុះដល់ដក៤១អង្សាសេកាលពីរសៀលថ្ងៃសុក្រ។សីតុណ្ហភាពត្រូវបានព្យាករណ៍ថានឹងចុះដល់ដក៥០អង្សាសេនៅតំបន់ខាងជើងៗនៃខេត្តកេបិចដោយសារខ្យល់ខ្លាំង។
ផ្សែងសមុទ្រអាកទិចពណ៌សហុយឡើងលើផ្នែកនៃទន្លេសេន ឡររេន រីវើ(St. Lawrence River)ដោយសារតែខ្យល់ត្រជាក់ខ្លាំងបក់កាត់ទន្លេរលាយទឹកកក។
នៅរដ្ឋធានីអូតាវ៉ារបស់កាណាដាព្យុះព្រិល គួបផ្សំនឹងខ្យល់៦០ទៅ៧០គីឡូម៉ែត្រក្នុងមួយម៉ោងកាលពីយប់ថ្ងៃព្រហស្បតិ៍ដល់ថ្ងៃសុក្រ នាំអោយគេលែងអាចមើលឃើញអ្វីៗស្ទើរទាំងអស់នៅចម្ងាយជិតៗ។នៅកណ្តាលក្រុមមានមនុស្សតិចណាស់ហ៊ានដើរគ្របភួយចេញក្រៅផ្ទះក្រៅអាគារ។
ការព្រមានអំពីខ្យល់មហាត្រជាក់ក៏ធ្វើឡើងសំរាប់ទូទាំងតំបន់ញូវ អ៊ីងលឹន(New England)នៅអាម៉េរិក។ទីក្រុងបូស្តុន(Boston)កន្លែងដែលសាលារៀនបានបិទកាលពីថ្ងៃសុក្រ និងតំបន់ជុំវិញរំពឹងថានឹងជួបខ្យល់ត្រជាក់ដក៣៤អង្សាសេនៅពេលសីតុណ្ហភាពនៅទីក្រុងញូវយ៉កចុះដល់ដក២៣អង្សា៕
ទីក្រុងម៉ុងត្រេអាល់របស់កាណាដា ជួបសីតុណ្ហភាពដក៤១(-41c)កាលពីថ្ងៃ៣កុម្ភៈ
ពួកមន្ត្រីព្រមានអ្នកស្រុកអំពីខ្យល់ត្រជាក់ខ្លាំងនៅតិចសាស់។ក្នុងរូប ផ្លូវមួយក្នុងក្រុងអូស្ទីនត្រូវបិទក្រោយមានព្យុះព្រិល
ទឹកកកជាប់រូបសំណាកនៅទីក្រុងអូស្ទីន រដ្ឋតិចសាស
