Views: 2
ប្រែសម្រួល : កញ្ញាដាលីស (ដេល្លីម៉េល) ៖ សហរដ្ឋអាម៉េរិកកាលពីថ្ងៃព្រហស្បតិ៍ទី១ធ្នូបានប្រកាសថាខ្លួនចាត់ទុកមេដឹកនាំក្រុមអាល់កៃដានៅអាស៊ីខាងត្បូងនិងក្រុមតាលីបង់ប៉ាគីស្ថានជាក្រុមភេរវករដោយប្តេជ្ញាចាត់វិធានការនានា ខណៈការព្រមានបានកើនឡើងជុំវិញប្រទេសអាហ្វហ្គានីស្ថាន។
ក្រុមជីហាដដែលត្រូវបានកំណត់គោលដៅគឺមានមេដឹកនាំបួននាក់នៃក្រុមអាល់កៃដានៅក្នុងឧបទ្វីបឥណ្ឌា (AQIS) ដែលជាសាខាក្នុងតំបន់នៃបណ្តាញជីហាដ រួមទាំង “មេដឹកនាំ” ប្រកាសខ្លួនឯង គឺលោក អូសាម៉ា មេមូដ (Osama Mehmood)។
សហរដ្ឋអាម៉េរិកក៏បានចាត់ទុកមនុស្សលេខ២របស់ក្រុមតាលីបង់ប៉ាគីស្ថានជាភេរវជនផងដែរ គឺលោក មូហ្វធី ហាស់រ៉ាត់ ដេរ៉ូជី (Mufti Hazrat Deroji) ដែលគេស្គាល់ថា ការី អាមចាដ (Qari Amjad) ដែលយុទ្ធនាការហិង្សារយៈពេល ១៥ ឆ្នាំរបស់គាត់ បានកើនឡើង ចាប់តាំងពីក្រុមតាលីបង់បានដណ្តើមការកាន់កាប់នៅអាហ្វហ្គានីស្ថានជិតខាងកាលពីឆ្នាំមុន។
ក្រុមមន្ត្រីអាម៉េរិកបាននិយាយថា លោកដេរ៉ូជីបានមើលការខុសត្រូវលើប្រតិបត្តិការនៅតំបន់ឃីបឺ ប៉ាកទុនក្វា (Khyber Pakhtunkhwa)ដែលជាតំបន់ព្រំដែនមួយក្នុងចំណោមតំបន់ព្រំដែនចំនួនពីរ ដែលរងការវាយប្រហារហិង្សាជាច្រើន។
រដ្ឋមន្ត្រីការបរទេសអាម៉េរិកលោក អានថូនី ប្លីងកិន បាននិយាយនៅក្នុងសេចក្តីថ្លែងការណ៍មួយថា ការកំណត់មុខភេរវជនបែបនេះគឺ “ជាផ្នែកមួយនៃកិច្ចខិតខំប្រឹងប្រែងឥតឈប់ឈររបស់យើងដើម្បីធានាថា ពួកភេរវករមិនប្រើប្រាស់អាហ្វហ្គានីស្ថានជាវេទិកាសម្រាប់ភេរវកម្មអន្តរជាតិ”។
លោកប្លីងកិនបាននិយាយថា “យើងនឹងបន្តប្រើប្រាស់ឧបករណ៍ពាក់ព័ន្ធទាំងអស់ដើម្បីរក្សាការប្តេជ្ញាចិត្តរបស់យើងដើម្បីមើលទៅវាថា ភេរវករអន្តរជាតិមិនអាចធ្វើប្រតិបត្តិការដោយនិទណ្ឌភាពនៅក្នុងអាហ្វហ្គានីស្ថានបានទេ”។
ក្រសួងការបរទេសនិងក្រសួងរតនាគារបានចុះបញ្ជីអ្នកទាំងបួនថាជាភេរវករសកលដែលបានកំណត់មុខយ៉ាងពិសេស ដែលធ្វើឱ្យវាក្លាយជាឧក្រិដ្ឋកម្មនៅក្នុងសហរដ្ឋអាម៉េរិកក្នុងការធ្វើប្រតិបត្តិការជាមួយពួកគេនិងបិទខ្ទប់ទ្រព្យសម្បត្តិដែលពួកគេមាននៅក្នុងប្រទេស៕
មន្ត្រីសន្តិសុខម្នាក់ឈរយាមបន្ទាប់ពីការវាយប្រហារបំផ្ទុះគ្រាប់បែកអត្តឃាតដែលអះអាងទទួលខុសត្រូវដោយក្រុមតាលីបង់ប៉ាគីស្ថានសំដៅលើរថយន្តប៉ូលិសក្នុងក្រុង Quetta ប្រទេសប៉ាគីស្ថាន កាលពីថ្ងៃទី៣០ ខែវិច្ឆិកា ឆ្នាំ២០២២