Views: 8
ប្រែសម្រួល : កញ្ញាដាលីស (ដេល្លីម៉េល) ៖ មន្ត្រីរដ្ឋបាលជាន់ខ្ពស់របស់សហរដ្ឋអាម៉េរិកបាននិយាយថា ការឈប់សំចតរំពឹងទុកនៅសហរដ្ឋអាម៉េរិកនៅប៉ុន្មានសប្តាហ៍ខាងមុខដោយប្រធានាធិបតីតៃវ៉ាន់ សៃ អ៊ីនវិន (Tsai Ing-wen) គឺជាការអនុវត្តតាមស្តង់ដារ ហើយចិនមិនគួរប្រើវាធ្វើជាលេសសម្រាប់សកម្មភាពគឃ្លើនដាក់កោះដែលគ្រប់គ្រងតាមបែបប្រជាធិបតេយ្យនោះទេ។
លោកស្រីសៃគ្រោងនឹងធ្វើដំណើរឆ្លងកាត់ទីក្រុងញូវយ៉កនិងឡូសអាន់ជេឡេស ជាផ្នែកនៃដំណើរទៅកាន់អាម៉េរិកកណ្តាល ហើយប្រភពបានប្រាប់ទីភ្នាក់ងារសារព័ត៌មានរ៉យទ័រថា ប្រធានសភាអាម៉េរិក ខេវិន ម៉ាកខាធី (Kevin McCarthy) មានបំណងជួបលោកស្រីក្នុងអំឡុងជើងហោះហើររបស់លោកស្រីឆ្លងកាត់រដ្ឋកាលីហ្វ័រញ៉ា។
ចិន ដែលអះអាងតៃវ៉ាន់ជាទឹកដីរបស់ខ្លួន បាននិយាយថា ខ្លួនមានការព្រួយបារម្ភយ៉ាងខ្លាំងចំពោះផែនការធ្វើដំណើររបស់លោកស្រីសៃ។
ប៉ុន្តែមន្ត្រីជាន់ខ្ពស់អាម៉េរិកបានប្រាប់អ្នកយកព័ត៌មាននៅយប់ថ្ងៃចន្ទថា ប្រធានាធិបតីតៃវ៉ាន់គ្រប់រូបបានឆ្លងកាត់សហរដ្ឋអាម៉េរិក ហើយថាលោកស្រីសៃបានធ្វើដូច្នេះដោយខ្លួនឯងចំនួន៦ដងចាប់តាំងពីការឡើងកាន់តំណែងឆ្នាំ ២០១៦ ដែលចុងក្រោយបំផុតគឺក្នុងឆ្នាំ ២០១៩។
មន្ត្រីនោះបានបន្ថែមថា លោកស្រីបានជួបសមាជិកសភាក្នុងអំឡុងដំណើរទាំងអស់នោះ ដោយកត់សម្គាល់ថា ជំងឺរាតត្បាតកូវីដ១៩ បានរឹតត្បិតការធ្វើដំណើររបស់លោកស្រីក្នុងប៉ុន្មានឆ្នាំថ្មីៗនេះ។
មន្ត្រីនោះនិយាយទៀតថា “ជាថ្មីម្តងទៀតយើងមើលឃើញថាគ្មានហេតុផលសម្រាប់រដ្ឋាភិបាលក្រុងប៉េកាំងបង្វែរការហោះឆ្លងកាត់ ដែលស្របតាមគោលនយោបាយរបស់សហរដ្ឋអាម៉េរិកជាយូរយារ ឱ្យប្រែទៅជារឿងអ្វីផ្សេងក្រៅពីនេះទេ។ វាមិនគួរត្រូវបានប្រើជាលេសក្នុងការបង្កើនសកម្មភាពគឃ្លើនណាមួយនៅជុំវិញច្រកសមុទ្រតៃវ៉ាន់នោះទេ”៕
លោកស្រីគ្រោងនឹងហោះឆ្លងកាត់សហរដ្ឋអាម៉េរិកនៅប៉ុន្មានសប្តាហ៍ខាងមុខ
