Views: 4
ប្រែសម្រួលៈបំណង(ដេល្លីម៉េល)៖ ប្រធានាធិបតីអាម៉េរិកលោកចូ បៃដិន បាននិយាយកាលពីថ្ងៃព្រហស្បតិ៍ថាការដែលអាម៉េរិកចេញគោលនយោបាយគាំទ្រឧស្សាហកម្មបៃតងមិនមានបំណងប្រជែងឬចង់អោយអឺរ៉ុបខាតបង់ទេ នៅពេលលោកនិងសមភាគីបារាំង អេមម៉ានុយអែល ម៉ាក្រុង បានសន្យាពុះពារជម្នះជម្លោះពាណិជ្ជកម្មកាត់មហាសមុទ្រអាត្លង់ទិច។
ថ្លែងបន្ទាប់ពីជំនួបកំពូលនៅសេតវិមាន មេដឹកនាំទាំងពីរបានសង្កត់ធ្ងន់លើកិច្ចសហការគ្នាចំពេលសហភាពអឺរ៉ុបមានការព្រួយបារម្ភថា ច្បាប់កាត់បន្ថយអតិផរណា (IRA)របស់លោកបៃដិនមានលក្ខណៈប្រឆាំងការធ្វើជំនួញប្រកួតប្រជែង ហើយនឹងនាំអោយមនុស្សជាច្រើននៅសហភាពអឺរ៉ុបបាត់បង់ការងារធ្វើ ជាពិសេសក្នុងវិស័យថាមពលនិងរថយន្ត។
ប្រធានាធិបតីចូ បៃដិន និងសមភាគីបារាំង អេមម៉ានុយអែល ម៉ាក្រុង ចាប់ដៃគ្នាបន្ទាប់ពីការធ្វើសន្និសីទកាសែតរួមគ្នាមួយនៅសេតវិមានក្នុងទីក្រុងវ៉ាស៊ីនតោនកាលពីថ្ងៃ០១ធ្នូ
លោកបៃដិនបាននិយាយក្នុងសន្និសីទកាសែតរួមគ្នាមួយថា «យើងបានព្រមព្រៀងពិភាក្សាគ្នាលើជំហានជាក់ស្តែងដើម្បីសម្របសម្រួលនិងអោយស៊ីគ្នានឹងមធ្យោបាយរបស់យើងដើម្បីអោយពួកយើងអាចពង្រឹងនិងធានាខ្សែសង្វាក់ផ្គត់ផ្គង់ កម្មន្តសាលកម្មហើយនឹងនវានុវត្តន៍ទាំងនៅសងខាងមហាមុទ្រអាត្លង់ទិច»។
ប្រធានាធិបតីអាម៉េរិកបានបន្ថែមថា លោកនឹងមិនសុំទោសទេចំពោះគោលនយោបាយIRAតំលៃ៤៣០ពាន់លានដុល្លារដែលត្រូវបានអនុម័តកាលពីខែសីហា ដែលភាគច្រើនផ្តោតលើការវិនិយោគនិងការគាំទ្រការវិនិយោគលើការប្រយុទ្ធប្រឆាំងនឹងបំរែបំរួលអាកាសធាតុ ព្រមទាំងការចំណាយសង្គម។លោកថា ច្បាប់IRAមិនមានបំណងយកប្រៀបលើសម្ពន្ធមិត្តអាម៉េរិកណាមួយឡើយ ផ្ទុយទៅវិញវាពង្រឹងខ្សែសង្វាក់ផ្គត់ផ្គង់ជាមួយដៃគូរបស់យើង ដូចជាអឺរ៉ុបដើម្បីការពារទល់នឹងភាពងាយរងគ្រោះសេដ្ឋកិច្ច ដូចអ្វីដែលបានកើតឡើងក្នុងអំឡុងផ្ទុះជំងឺកូវីដ១៩និងសង្គ្រាមអ៊ុយក្រែន។
លោកម៉ាក្រុងបានទទួលស្គាល់ថាគោលដៅរបស់ច្បាប់ IRAគឺបង្កើតការងារនិងជំរុញអន្តរកាលឆ្ពោះទៅកាន់ថាមពលបៃតងនិងគឺជា«កម្មវុត្ថុរួម»ជាមួយអឺរ៉ុប តែថា «ឧបត្ថម្ភធនរបស់IRAសំរាប់ឧស្សាហកម្មអាម៉េរិកគំរាមធ្វើអោយប៉ះពាល់ធុរកិច្ចអឺរ៉ុប» និងថាបញ្ហាស្នូលមួយដែលលោកបានពិភាក្សាជាមួយលោកបៃដិនគឺរបៀប«ធ្វើអោយរស់ឡើងវិញ»សម្ពន្ធភាពអាម៉េរិក-បារាំងនិងធ្វើការជាមួយគ្នាជាមួយនឹងយុទ្ធសាស្ត្រស្រដៀងគ្នា៕