Views: 2
ប្រែសម្រួល : កញ្ញាដាលីស (ដេល្លីម៉េល) ៖ សហរដ្ឋអាម៉េរិកនិងអូស្ត្រាលីបាននិយាយកាលពីថ្ងៃអង្គារទី៦ធ្នូថា ពួកគេនឹងស្វាគមន៍ទាហានជប៉ុនចូលទៅក្នុងការប្តូរវេនត្រីភាគីដោយប្តេជ្ញាឱ្យមានរណសិរ្សរួបរួមមួយដើម្បីប្រឈមមុខនឹងភាពជឿនលឿនខាងយោធាយ៉ាងឆាប់រហ័សរបស់ចិន។
រដ្ឋមន្ត្រីការពារជាតិនិងរដ្ឋមន្ត្រីការបរទេសរបស់អូស្ត្រាលីបាននិយាយថាពួកគេបានយល់ព្រមបង្កើនល្បឿននៃអន្តរកម្មយោធាជាមួយសហរដ្ឋអាម៉េរិកក្នុងអំឡុងការពិភាក្សាជាមួយសមភាគីរបស់ពួកគេនៅទីក្រុងវ៉ាស៊ីនតោន ដែលបន្ទាប់ពីនោះពួកគេនឹងហោះហើរទៅកាន់ទីក្រុងតូក្យូ។
រដ្ឋមន្ត្រីការពារជាតិអូស្ត្រាលីលោក រីឆាត ម៉ាឡេស (Richard Marles) បានប្រាប់នៅសន្និសីទកាសែតថា”វាពិតជាសំខាន់ណាស់ដែលយើងកំពុងធ្វើកិច្ចការនេះចេញពីទស្សនៈនៃការផ្តល់តុល្យភាពនៅក្នុងតំបន់របស់យើង និងការចូលរួមពីប្រទេសដទៃទៀតនៅក្នុងតំបន់របស់យើង ហើយយើងទន្ទឹងរង់ចាំដើម្បីអាចឱ្យមានការចូលរួមកាន់តែច្រើនជាមួយជប៉ុន”។
លោកម៉ាឡេសបាននិយាយនៅក្នុងកិច្ចពិភាក្សាបែបនេះជាលើកដំបូងចាប់តាំងពីរដ្ឋាភិបាលបក្សការងាររបស់អូស្ត្រាលីចូលកាន់តំណែងកាលពីប្រាំមួយខែមុនថា”យើងអាចទៅប្រទេសជប៉ុននៅចុងសប្តាហ៍នេះជាមួយនឹងការអញ្ជើញជប៉ុនឱ្យចូលរួមក្នុងសមយុទ្ធបន្ថែមទៀតជាមួយអូស្ត្រាលីនិងសហរដ្ឋអាម៉េរិក”។
រដ្ឋមន្ត្រីការពារជាតិអាម៉េរិក លោក ឡយ អូស្ទីន បាននិយាយថា សម្ពន្ធមិត្តនឹងស្វែងរកការចូលរួមរបស់ជប៉ុនក្នុងប្រតិបត្តិការរួមគ្នានៅក្នុងប្រទេសអូស្ត្រាលីកន្លែងដែលសហរដ្ឋអាម៉េរិកបានប្តូរវេនកងម៉ារីនតាំងពីឆ្នាំ ២០១១ តាមរយៈទីក្រុងដាវីន (Darwin)ដែលជាទីក្រុងយុទ្ធសាស្ត្រភាគខាងជើងដែលរងការវាយប្រហារពីជប៉ុនក្នុងសង្គ្រាមលោកលើកទីពីរ។
លោកអូស្ទីនបាននិយាយថា សហរដ្ឋអាម៉េរិកនិងអូស្ត្រាលីបានព្រមព្រៀងគ្នាក្នុងការបង្កើនការប្តូរវេននៃកងកម្លាំងយន្តហោះទម្លាក់គ្រាប់បែក យន្តហោះចម្បាំង និងកងទ័ពជើងគោកនិងកងទ័ពជើងទឹកអាម៉េរិក។
លោកអូស្ទីនបាននិយាយថា “យើងបានយល់ព្រមដើម្បីបង្កើនកិច្ចសហប្រតិបត្តិការលើវិស័យការពារជាតិត្រីភាគីនិងអញ្ជើញជប៉ុនឱ្យធ្វើសមាហរណកម្មទៅក្នុងគំនិតផ្តួចផ្តើមនៃកងកម្លាំងរបស់យើងនៅក្នុងប្រទេសអូស្ត្រាលី”។
ជប៉ុន ដែលជាសម្ពន្ធមិត្តជាប់សន្ធិសញ្ញារបស់សហរដ្ឋអាម៉េរិក ក្នុងប៉ុន្មានឆ្នាំថ្មីៗនេះបានស្វែងរកកិច្ចសហប្រតិបត្តិការការទូតកាន់តែច្រើនឡើងជាមួយអូស្ត្រាលីប៉ុន្តែទំនាក់ទំនងផ្នែកការពារជាតិមានភាពរសើប ដោយសារតែច្បាប់សន្តិភាពនិយមផ្លូវការរបស់រដ្ឋាភិបាលក្រុងតូក្យូ ចាប់តាំងពីបរាជ័យក្នុងសង្គ្រាមលោកលើកទី២។
ប៉ុន្តែជប៉ុនបានចូលរួមក្នុងសមយុទ្ធនានា រួមទាំងសមយុទ្ធត្រីភាគីក្នុងខែឧសភានៅឆ្នេរសមុទ្រភាគឦសានរបស់អូស្ត្រាលីដែលរួមមានទាំងការបាញ់គ្រាប់ពិតនិងការរួមបញ្ចូលរថក្រោះរបស់កងទ័ពថ្មើរជើង៕
ឧបនាយករដ្ឋមន្ត្រីនិងជារដ្ឋមន្ត្រីការពារជាតិអូស្ត្រាលី លោក រីឆាត ម៉ាឡេស (ឆ្វេង) រដ្ឋមន្ត្រីការបរទេសអូស្ត្រាលី លោក ផេននី វង់ (Penny Wong) រដ្ឋមន្ត្រីការបរទេសអាម៉េរិកលោក អានថូនី ប្លីងកិន និងរដ្ឋមន្ត្រីការពារជាតិអាម៉េរិក លោក ឡយ អូស្ទីន ធ្វើសន្និសីទកាសែតនៅទីក្រុងវ៉ាស៊ីនតោន
