Views: 1
ប្រែសម្រួល : កញ្ញាដាលីស (ដេល្លីម៉េល) ៖ សហរដ្ឋអាម៉េរិកនឹងបញ្ជូនជំនួយបន្ថែមចំនួន ៥,៥ ពាន់លានដុល្លារអាម៉េរិកដល់អ៊ុយក្រែន ក្នុងនោះ ៤,៥ ពាន់លានដុល្លារជាជំនួយថវិកា និង ១ពាន់លានដុល្លារជាជំនួយយោធា ដើម្បីជួយប្រទេសនេះមកទប់ទល់នឹងភាពចលាចលបង្កឡើងពីការឈ្លានពានរបស់រុស្ស៊ីនៅឆ្នាំនេះ។
ទីភ្នាក់ងារសហរដ្ឋអាម៉េរិកសម្រាប់អភិវឌ្ឍន៍អន្តរជាតិ (USAID) បាននិយាយថា ជំនួយថវិកាចំនួន ៤,៥ពាន់លានដុល្លារនឹងផ្តល់មូលនិធិដល់តម្រូវការបន្ទាន់របស់រដ្ឋាភិបាលរួមទាំងការទូទាត់ប្រាក់សោធននិវត្តន៍ សុខុមាលភាពសង្គម និងថ្លៃថែទាំសុខភាព ដែលនាំឱ្យជំនួយសារពើពន្ធសរុបរបស់អាម៉េរិកសម្រាប់អ៊ុយក្រែនកើនដល់ ៨,៥ពាន់លានដុល្លារចាប់តាំងពីការឈ្លានពានរបស់រុស្ស៊ីកាលពីខែកុម្ភៈ។
USAID បាននិយាយថា មូលនិធិដែលត្រូវបានសម្របសម្រួលជាមួយក្រសួងរតនាគារអាម៉េរិកតាមរយៈធនាគារពិភពលោកនឹងផ្តល់ឱ្យទៅរដ្ឋាភិបាលអ៊ុយក្រែនជាលក្ខណៈបណ្តាក់ដោយចាប់ផ្តើមជាមួយនឹងការផ្តល់ប្រាក់ ៣ ពាន់លានដុល្លារនៅក្នុងខែសីហា។ USAID បាននិយាយថា ការផ្តល់ជំនួយនេះធ្វើឡើងបន្ទាប់ពីការផ្តល់ជំនួយកាលពីលើកមុនចំនួន ១,៧ ពាន់លានដុល្លារក្នុងខែកក្កដា និង ១,៣ ពាន់លានដុល្លារក្នុងខែមិថុនា។
ទីក្រុងវ៉ាស៊ីនតោនក៏បានផ្តល់ជំនួយផ្នែកយោធានិងសន្តិសុខរាប់ពាន់លានដុល្លារផងដែរ។ កញ្ចប់ជំនួយសព្វាវុធតម្លៃ ១ពាន់លានដុល្លារដែលប្រកាសដោយមន្ទីរបញ្ចកោណគឺជាកញ្ចប់ជំនួយយោធាដ៏ធំបំផុតនៅក្រោមសិទ្ធិរបស់ប្រធានាធិបតី ចូ បៃដិន រួមទាំងគ្រាប់រ៉ុក្កែតរយៈចម្ងាយឆ្ងាយនិងរថពាសដែកដឹកជញ្ជូន។
វារួមបញ្ចូលទាំងរថពាសដែកដឹកឱសថ M113 ចំនួន ៥០ គ្រឿង និងគ្រាប់សម្រាប់ជើងទម្របាញ់រ៉ុក្កែតរយៈចម្ងាយឆ្ងាយ HIMARS ដែលផ្គត់ផ្គង់ដោយអាម៉េរិក និងសម្រាប់ប្រព័ន្ធកាំជ្រួចពីដីទៅអាកាស NASAMS ។ កញ្ចប់ជំនួយសារពើពន្ធនិងយោធា ដែលរាយការណ៍ដំបូងដោយទីភ្នាក់ងារសារព័ត៌មានរ៉យទ័រកាលពីថ្ងៃចន្ទ ត្រូវបានដកចេញពីកញ្ចប់ជំនួយចំនួន៤០ពាន់លានដុល្លារសម្រាប់អ៊ុយក្រែនដែលត្រូវបានអនុម័តដោយសភាក្នុងខែឧសភា។
សរុបមក សហរដ្ឋអាម៉េរិកបានផ្តល់វិភាគទានជាង ១៨ ពាន់លានដុល្លារហើយដល់អ៊ុយក្រែនក្នុងឆ្នាំនេះ៕
សរុបមក សហរដ្ឋអាម៉េរិកបានផ្តល់វិភាគទានជាង ១៨ ពាន់លានដុល្លារហើយដល់អ៊ុយក្រែនក្នុងឆ្នាំនេះ
