ក្រសួងការបរទេសសហរដ្ឋអាមេរិក ប្រកាសផ្ដល់ពានអ្នកការពារសិទ្ធមនុស្សប្រចាំឆ្នាំ ដល់ថ្នាក់ដឹកនាំសហជីពក្រុមហ៊ុនណាហ្គាវើលដ៍ កញ្ញាឈឹម ស៊ីថរ ខណៈកញ្ញាកំពុងជាប់ពន្ធនាគារព្រៃស។
សេចក្តីប្រកាសព័ត៌មានរបស់ស្ថានទូតសហរដ្ឋអាមេរិកប្រចាំកម្ពុជា ចុះថ្ងៃទី២ ខែកុម្ភៈ ឆ្នាំ២០២៣ ឱ្យដឹងថា ក្នុងចំណោមម្ចាស់ពាន ១០រូប នៅជុំវិញសកលលោក ដែលទទួលពានរង្វាន់អ្នកការពារសិទ្ធមនុស្សប្រចាំឆ្នាំ ក្នុងនោះក៏មានមេដឹកនាំសហជីពក្រុមហ៊ុនណាហ្គាវើលដ៍ កញ្ញា ឈឹម ស៊ីថរ ដែរ។
ប្រភពដដែល បន្តថា ពានរង្វាន់ដ៏មានកិត្យានុភាពមួយនេះ ទទួលស្គាល់បុគ្គលក្លាហានទាំងឡាយណា ដែលបង្ហាញពីភាពក្លាហានយ៉ាងពិសេស និងភាពជាអ្នកដឹកនាំក្នុងការតស៊ូមតិដើម្បីលើកកម្ពស់ និងការពារសិទ្ធិមនុស្ស ដែលគេទទួលស្គាល់ជាសកល និងសេរីភាពជាមូលដ្ឋាន ខណៈកញ្ញាគឺជាមនុស្សទី១នៅប្រទេសកម្ពុជាដែលទទួលបានពានរង្វាន់នេះ។
ឯកអគ្គរដ្ឋទូតសហរដ្ឋអាមេរិកប្រចាំកម្ពុជាលោក Patrick Murphy បានលើកឡើងនៅក្នុងសេចក្តីប្រកាសព័ត៌មាន ដោយកោតសរសើរកញ្ញា ឈឹម ស៊ីថរ ថាជាអ្នកការពារសិទ្ធិមនុស្សឆ្នើមម្នាក់។
លោក Patrick Murphy បានគូសបញ្ជាក់ថា៖ «យើងអបអរចំពោះការទទួលស្គាល់ដល់កញ្ញា ស៊ីថរ ជាអ្នកការពារសិទ្ធិមនុស្សឆ្នាំ២០២២ម្នាក់។ កញ្ញាគឺជាថ្នាក់ដឹកនាំសហជីពការងារដ៏ក្លាហាន និងអត់ធ្មត់ ដែលតស៊ូមតិដោយសន្តិវិធីដើម្បីសិទ្ធិរបស់កម្មករកម្ពុជា»។
ជាមួយគ្នានេះ លោកថា ការការពារនិងគាំទ្រអ្នកការពារសិទ្ធិមនុស្ស គឺជាអាទិភាពចម្បងនៃគោលនយោបាយការបរទេសសហរដ្ឋអាមេរិក ហើយស្ថានទូតអាមេរិកនៅប្រទេសកម្ពុជា អបអរសាទរដល់កញ្ញា ឈឹម ស៊ីថរ និងអ្នកទទួលទាំងអស់នៃពានរង្វាន់អ្នកការពារសិទ្ធិមនុស្ស ឆ្នាំ ២០២២។
បើតាមក្រសួងការបរទេសអាមេរិក ទោះបីជាមានការបៀតបៀនរូបកាយ និងការចាប់ខ្លួន កាលពីខែមករា ឆ្នាំ២០២២ ក្នុងពេលធ្វើកូដកម្មរកដំណោះស្រាយវិវាទការងារជាមួយក្រុមហ៊ុនណាហ្គាវើលដ៍ក៏ដោយ ក៏កញ្ញា ស៊ីថរ បានបន្តចេញមុខនិយាយអំពីសិទ្ធិការងារ។
ក្រោយពីអាជ្ញាធរបានដោះលែងកញ្ញា ស៊ីថរ កាលពីខែមីនា ឆ្នាំ២០២២ ប៉ុន្តែកញ្ញាត្រូវបានអាជ្ញាធរចាប់ខ្លួន និងបញ្ជូនទៅឃុំខ្លួនជាបណ្តោះអាសន្ននៅពន្ធនាគារព្រៃស រាជធានីភ្នំពេញ ជាថ្មីទៀតនៅក្នុងខែវិច្ឆិកា ឆ្នាំ២០២២ ដោយតុលាការលើកហេតុផលថា ល្មើសបម្រាម ឬគេចវេះពីការត្រួតពិនិត្យរបស់តុលាការ ក្រោយពេលកញ្ញាបានធ្វើដំណើរត្រលប់មកពីប្រជុំនៅប្រទេសអូស្ត្រាលីវិញ កាលពីថ្ងៃទី២៦ ខែវិច្ឆិកា ឆ្នាំ២០២២។
ក្រសួងការបរទេសសហរដ្ឋអាមេរិក បញ្ជាក់ថា បច្ចុប្បន្នកញ្ញាត្រូវបន្តឃុំខ្លួន ដោយរង់ចាំការកាត់ទោសដែលមិនទាន់កំណត់ពេល ហើយមិនអាចធ្វើដំណើរទៅចូលរួមយកពានរង្វាន់ នៅរដ្ឋធានីវ៉ាស៊ីនតុន ជាមួយអ្នកទទួលពានដទៃទៀតបានដែរ។
ចាប់តាំងពីចុងឆ្នាំ២០២១ កញ្ញា ស៊ីថរ ដែលជាថ្នាក់ដឹកនាំសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនកាស៊ីណូណាហ្គាវើលដ៍ បានដឹកនាំបុគ្គលិកកម្មករក្រុមហ៊ុននេះ ធ្វើកូដកម្មដោយសន្តិវិធី ដើម្បីទាមទារឱ្យក្រុមហ៊ុនដំឡើងប្រាក់ខែ និងទទួលយកបុគ្គលិកជាសមាជិកសហជីពរាប់រយនាក់ ដែលគេជឿថា ពួកគេត្រូវបានបណ្តេញចេញពីការងារទាំងអយុត្តិធម៌។ កាលណោះ កញ្ញា ឈឹម ស៊ីថរ ត្រូវបានអាជ្ញាធរចាប់ខ្លួន និងចោទប្រកាន់ពីបទ «ញុះញង់ឱ្យប្រព្រឹត្តបទឧក្រិដ្ឋ»។
ជុំវិញការចាប់ខ្លួនកញ្ញា ឈឹម ស៊ីថរ ជាថ្មីនេះ ទាំងមេធាវី និងកញ្ញា ឈឹម ស៊ីថរ បានបញ្ជាក់នៅក្នុងបន្ទប់សវនាការសុំនៅក្រៅឃុំ កាលពីថ្ងៃទី១៩ ខែមករា ឆ្នាំ២០២៣ថា ចាប់តាំងពីតុលាការដោះលែង កាលពីខែមីនា ឆ្នាំ២០២២ កញ្ញាមិនបានទទួលដីកាដាក់ឱ្យស្ថិតនៅក្រោមការត្រួតពិនិត្យរបស់តុលាការ ខណៈសមត្ថកិច្ចក៏មិនដែលហៅកញ្ញាទៅបង្ហាញខ្លួន និងប្រាប់ពីដីកាដាក់ឱ្យស្ថិតក្រោមការត្រួតពិនិត្យដែរ។
កញ្ញាបញ្ជាក់ថា៖ «ពួកគាត់ទទួលបាន និងផ្ដិតមេដៃ តែលិខិតដោះលែងឱ្យនៅក្រៅឃុំបណ្ដោះអាសន្នមួយសន្លឹកតែប៉ុណ្ណោះ»។
ទោះបីជាមេធាវី និងកញ្ញា ឈឹម ស៊ីថរ បង្ហាញពីឆន្ទៈ និងអះអាងបែបនេះក្ដី ប៉ុន្តែចៅក្រមជំនុំជម្រះសាលាដំបូងរាជធានីភ្នំពេញ លោកស្រី សឿង ចរិយា នៅតែមិនអនុញ្ញាតឱ្យកញ្ញា ឈឹម ស៊ីថរ នៅក្រៅឃុំ។
ប្រាប់អ្នកសារព័ត៌មានវីអូឌី បន្ទាប់ពីស្ដាប់ការប្រកាសសាលក្រមរួច កញ្ញា ឈឹម ស៊ីថរ ចាត់ទុកការកាត់ក្ដីរបស់តុលាការដែលមិនឱ្យកញ្ញាក្រៅឃុំកាលពីថ្ងៃទី១៩ ខែមករា ឆ្នាំជារឿងអយុត្តិធម៌ និងជាការបិទបាំងកំហុសខ្លួនតែប៉ុណ្ណោះ។
ក្រៅពីកញ្ញា ឈឹម ស៊ីថរ ក៏នៅមានថ្នាក់ដឹកនាំសហជីពជាង ១០រូប កំពុងប្រឈមនូវការចោទប្រកាន់ផ្នែកព្រហ្មទណ្ឌ ទាក់ទងនឹងរឿងកូដកម្មទាមទារដំណោះស្រាយវិវាទការងារនៅក្រុមហ៊ុនណាហ្គាវើលដ៏នេះផងដែរ៕