Views: 1
ប្រែសម្រួល : កញ្ញាដាលីស (ដេល្លីម៉េល) ៖ ប្រធានាធិបតីអាម៉េរិកលោក ចូ បៃដិន កាលពីថ្ងៃព្រហស្បតិ៍ទី២៩កញ្ញាបានប្រកាសផ្តល់មូលនិធិថ្មីចំនួន ៨១០លានដុល្លារសម្រាប់បណ្តាកោះប៉ាស៊ីហ្វិកក្នុងកិច្ចប្រជុំកំពូលលើកដំបូងជាមួយមេដឹកនាំរបស់ពួកគេនៅទីក្រុងវ៉ាស៊ីនតោន ដោយប្តេជ្ញាថាបង្កើតភាពជាដៃគូកាន់តែជិតស្និទ្ធជាមួយនឹងតំបន់យុទ្ធសាស្ត្រខ្សោះមនុស្សមួយនេះដែលចិនកំពុងសម្រុកដាក់ឥទ្ធិពលលើ។
ថ្លែងទៅកាន់មេដឹកនាំនៃរដ្ឋប៉ាស៊ីហ្វិកខាងត្បូង រួមទាំងប្រមុខរដ្ឋឬរដ្ឋាភិបាលចំនួន ១២ លោកបៃដិនបាននិយាយថា លោកចង់បង្ហាញពី “ការប្តេជ្ញាចិត្តយូរអង្វែង” ដោយបន្ថែមថា “និយាយដោយត្រង់ សន្តិសុខរបស់អាម៉េរិកនិងពិភពលោកគឺពឹងលើសន្តិសុខរបស់អ្នក”។
ដោយសំដៅលើការកើនឡើងឥទ្ធិពលចិននៅអាស៊ី លោកបៃដិនបាននិយាយថា”ប្រវត្តិសាស្ត្រអស្ចារ្យរបស់ពិភពលោកយើងនឹងត្រូវកត់ត្រានៅក្នុងតំបន់ឥណ្ឌូប៉ាស៊ីហ្វិកក្នុងរយៈពេលប៉ុន្មានឆ្នាំនិងប៉ុន្មានទសវត្សរ៍ខាងមុខនេះ ហើយកោះប៉ាស៊ីហ្វិកគឺជាសំឡេងដ៏សំខាន់ក្នុងការបង្កើតអនាគតនោះ”។
សហរដ្ឋអាម៉េរិកបានក្លាយជាតួអង្គសំខាន់នៅតំបន់ប៉ាស៊ីហ្វិកខាងត្បូងចាប់តាំងពីជ័យជម្នះក្នុងសង្គ្រាមលោកលើកទីពីរ។ ប៉ុន្តែដោយរដ្ឋាភិបាលក្រុងវ៉ាស៊ីនតោនជារឿយៗត្រូវគេមើលឃើថាមិនខ្វាយខ្វល់នឹងតំបន់នេះ ចិនបានបញ្ចេញឥទ្ធិពលខ្លួនឯងកាន់ខ្លាំងឡើងតាមរយៈការវិនិយោគ ការបណ្តុះបណ្តាលប៉ូលិស និងកិច្ចព្រមព្រៀងសន្តិសុខជាមួយប្រជុំកោះសូឡូម៉ុនដ៏ចម្រូងចម្រាស។
ក្នុងចំណោមការសន្យាផ្តល់ជំនួយរបស់អាម៉េរិកនៅក្នុងកិច្ចប្រជុំកំពូលនេះគឺ ២០ លានដុល្លារសម្រាប់កោះសូឡូម៉ុនដើម្បីអភិវឌ្ឍទេសចរណ៍។ ផ្ទុយពីការទាញផលចំណេញដោយប្រយោលរបស់ចិន កម្មវិធីរបស់អាម៉េរិករយៈពេលបួនឆ្នាំនឹងផ្តោតលើការផ្តល់អំណាចដល់ស្ត្រីនិងការស្វែងរកជម្រើសផ្សេងទៀតចំពោះការកាប់ឈើ៕
ប្រធានាធិបតីអាម៉េរិក ចូ បៃដិន ស្វាគមន៍មេដឹកនាំកោះប៉ាស៊ីហ្វិកមកកាន់ក្រសួងការបរទេសជាមួយរដ្ឋមន្ត្រីការបរទេស អានថូនី ប្លីងកិន អង្គុយក្បែរគាត់
