Views: 2
ប្រែសម្រួលៈបំណង(ដេល្លីម៉េល)៖អាម៉េរិកនឹងបញ្ជូនជំនួយយោធាចំនួន២៧៥លានដុល្លារទៀតដល់អ៊ុយក្រែន រួមមានគ្រាប់រំសេវមួយចំនួនធំនិងប្រព័ន្ធបច្ចេកវិទ្យាជាន់ខ្ពស់ដែលអាចចាប់សញ្ញានិងបំផ្លាញដ្រូនក្នុងសង្គ្រាមរបស់អ៊ុយក្រែនជាមួយរុស្ស៊ី។
ជំនួយមួយកញ្ចប់នេះតិចជាងជំនួយមុនៗដែលអាម៉េរិកផ្តល់អោយអ៊ុយក្រែន និងវាកើតឡើងនៅពេលមន្ត្រីនិងអ្នកជំនាញការយោធាជាច្រើនព្យាករណ៍ថាការវាយប្រយុទ្ធគ្នានឹងថយចុះនៅរដូវរងារនេះ។អគ្គលេខាអង្គការណាតូលោក ជេនស៍ ស្តូលថិនប៊ឺក បាននិយាយថារុស្ស៊ីទំនងជាបន្ថយសកម្មភាពយោធារបស់ខ្លួននិងងាកមករៀបចំផ្តុំកងកម្លាំងឡើងវិញមុននឹងបើកការវាយប្រហារខ្លាំងឡើងជាថ្មីនៅពេលសីតុណ្ហភាពឡើងក្តៅវិញ។
ពួកមន្ត្រីបាននិយាយថា ជំនួយមួយកញ្ចប់ថ្មីនេះរួមមានគ្រាប់កាំភ្លើងធំ៨០.០០០គ្រាប់និងគ្រាប់រ៉ុក្កែតសំរាប់ប្រព័ន្ធរ៉ុក្កែតចល័តខ្ពស់HIMARS។វាក៏រួមមានប្រព័ន្ធប្រឆាំងដ្រូននិងប្រព័ន្ធការពារដែនអាកាស រថយន្តយោធាHUMVEES ម៉ាស៊ីនភ្លើងនិងគ្រឿងបរិក្ខារប្រយុទ្ធដទៃទៀត។
សូមបញ្ជាក់ថា ការវាយប្រហារដោយដ្រូនពីសំណាក់ភាគីទាំងពីរក្នុងសង្គ្រាមបាននិងកំពុងកើនឡើង ដោយធ្វើអោយការស្ទាក់កំទេចគ្រឿងផ្ទុះក្នុងអាកាសសំខាន់សំរាប់កងកម្លាំងអ៊ុយក្រែន។រុស្ស៊ីបានទិញដ្រូនយោធារាប់រយគ្រឿងពីអ៊ីរ៉ង់កាលពីរដូវក្តៅ និងរដ្ឋាភិបាលទីក្រុងមូស្គូកំពុងសម្លឹងរកការបញ្ជាទិញថែម។
កងកម្លាំងរុស្ស៊ីបានបង្កើនការវាយប្រហារដោយកាំជ្រួចនិងដ្រូនលើហេដ្ឋារចនាសម្ពន្ធអ៊ុយក្រែន រួមមានរោងចក្រអគ្គិសនីដែលផ្តាច់ភ្លើងសំរាប់មនុស្សរាប់លាននាក់។រុស្ស៊ីក៏រងការវាយប្រហារដ៏ភ្ញាក់ផ្អើលដោយមូលដ្ឋានទ័ពអាកាសរបស់ខ្លួននៅចម្ងាយជាង៥០០គីឡូម៉ែត្រពីព្រំដែនអ៊ុយក្រែនក៏ផ្ទុះឆេះ ដោយគេដាក់ការសង្ស័យខ្លាំងលើដ្រូនរបស់អ៊ុយក្រែន៕
ជំនួយមួយកញ្ចប់ថ្មីនេះរួមមានគ្រាប់កាំភ្លើងធំ៨០.០០០គ្រាប់និងគ្រាប់រ៉ុក្កែតសំរាប់ប្រព័ន្ធរ៉ុក្កែតចល័តខ្ពស់HIMARS។ប្រព័ត៌មានសុំមិនបញ្ចេញឈ្មោះបានទម្លាយថា អាម៉េរិកបានកែប្រព័ន្ធកាំជ្រួចHIMARSមុនបញ្ជូនអោយអ៊ុយក្រែនជាថ្មីដើម្បីកុំអោយទាហានអ៊ុយក្រែនអាចបាញ់ចូលជ្រៅក្នុងទឹកដីរុស្ស៊ី ដែលវានឹងនាំអោយសង្គ្រាមកាន់តែរីកធំក្រោយពីមានការព្រមានពីរុស្ស៊ី
