Views: 10
ប្រែសម្រួលៈបំណង(ដេល្លីម៉េល)៖កូរ៉េខាងជើងនៅថ្ងៃព្រហស្បតិ៍ទី២កុម្ភៈនេះបានគំរាម«ចាត់វិធានការម៉ឺងម៉ាតបំផុត»ចំពោះការពង្រីកទំហំសមយុទ្ធយោធារវាងអាម៉េរិកនិងកូរ៉េខាងត្បូងដើម្បីទប់ទល់នឹងមហិច្ឆតានុយក្លេអ៊ែរកាន់តែធំឡើងរបស់ខ្លួន ដោយអះអាងថាប្រទេសជាសម្ពន្ធមិត្តទាំងពីរនេះកំពុងរុញភាពតានតឹងអោយដល់«បន្ទាត់ក្រហមខ្លាំង»មួយ។
សេចក្តីថ្លែងការណ៍ចេញដោយក្រសួងការបរទេសនេះជាការឆ្លើយតបទៅនឹងសម្តីរបស់រដ្ឋមន្ត្រីការពារជាតិអាម៉េរិកលោក ឡយ អូស្ទីន ដែលបាននិយាយនៅទីក្រុងសេអ៊ូលកាលពីថ្ងៃអង្គារថា សហរដ្ឋអាម៉េរិកនឹងបង្កើនការបញ្ជូនទ្រព្យយោធាទំនើបៗមកកាន់ឧបទ្វីបកូរ៉េ រួមមានយន្តហោះប្រយុទ្ធនិងនាវាដឹកយន្តហោះ ព្រមទាំងពង្រឹងការហ្វឹកហាត់រួមគ្នានិងការធ្វើផែនការប្រតិបត្តិការសឹកជាមួយកូរ៉េខាងត្បូង។
ក្រសួងការពារជាតិកូរ៉េខាងត្បូងបាននិយាយថា សហរដ្ឋអាម៉េរិកបានបញ្ជូនយន្តហោះB-1BនិងF-35មកធ្វើសមយុទ្ធរួមជាមួយយន្តហោះកូរ៉េខាងត្បូងនៅលើដែនទឹកកូរ៉េខាងត្បូងកាលពីថ្ងៃពុធទី១កុម្ភៈ ក្នុងបំណងបង្ហាញការប្តេជ្ញាចិត្តរបស់អាម៉េរិកក្នុងការការពារសម្ពន្ធមិត្តរបស់ខ្លួន ជាមួយនឹងសមត្ថភាពយោធាពេញលេញរបស់ខ្លួន។
សហរដ្ឋអាម៉េរិកនិងកូរ៉េខាងត្បូងនៅក្នុងខែនេះក៏មានផែនការធ្វើសមយុទ្ធត្រៀមសមត្ថភាពឆ្លើយតបស្ថានភាពគ្រាអាសន្នណាមួយ បើសិនជាកូរ៉េខាងជើងប្រើសព្វាវុធនុយក្លេអ៊ែរ។
ក្នុងសេចក្តីថ្លែងការណ៍ កូរ៉េខាងជើងបាននិយាយថាការពង្រីកសមយុទ្ធរបស់សម្ពន្ធមិត្តកំពុងគំរាមធ្វើអោយឧបទ្វីបកូរ៉េវិលទៅរកការក្លាយខ្លួនទៅជា«តំបន់ឃ្លាំងអាវុធដ៏ធំមួយនិងជាតំបន់សង្គ្រាមកាន់តែគ្រោះថ្នាក់មួយផងដែរ។កូរ៉េខាងជើងកំពុងត្រៀមទប់ទល់នឹងការប្រឈមផ្នែកយោធារយៈពេលខ្លីនិងវែង បង្កឡើងដោយសម្ពន្ធមិត្តជាមួយនឹងកងកម្លាំងនុយក្លេអ៊េរលើសលប់បំផុតរបស់គេ»។
«ស្ថានការណ៍យោធានិងនយោបាយនៅលើឧបទ្វីបកូរ៉េព្រមទាំងនៅក្នុងតំបន់បានបានឈានដល់ខ្សែបន្ទាត់ក្រហមខ្លាំងបំផុត ដោយសារតែសមយុទ្ធយោធាបែបបង្កការប្រឈមមុខគ្នាដោយធ្វេសប្រហែសនិងអំពើអរិភាពរបស់អាម៉េរិក និងកងកម្លាំងខ្ញុំកញ្ជះរបស់ខ្លួន»។
រាប់ទសវត្សរ៍មកហើយ កូរ៉េខាងជើងបានហៅសមយុទ្ធរបស់អាម៉េរិកជាមួយកូរ៉េខាងត្បូងថាជាការហាត់សមដើម្បីចូលឈ្លានពានខ្លួន តែប្រទេសសម្ពន្ធមិត្តលោកសេរីទាំងពីរអះអាងថាវាដើម្បីគ្រាន់តែការពារខ្លួនប៉ុណ្ណោះ។
រូបបញ្ចេញដោយក្រសួងការពារជាតិកូរ៉េខាងត្បូងបង្ហាញយន្តហោះទម្លាក់គ្រាប់B-1Bនិង F-22 របស់អាម៉េរិកនិងយន្តហោះ F-35របស់កងទ័ពអាកាសកូរ៉េខាងត្បូងហោះលើឧបទ្វីបកូរ៉េក្នុងពេលហ្វឹកហាត់រួមគ្នាកាលពីថ្ងៃ១មករា ឆ្នាំ២០២៣។អាម៉េរិកកាលពីថ្ងៃពុធទី១កុម្ភៈក៏បានបញ្ជូនយន្តហោះB-1BនិងF-35មកធ្វើសមយុទ្ធរួមជាមួយយន្តហោះកូរ៉េខាងត្បូងនៅលើដែនទឹកកូរ៉េខាងត្បូងផងដែរ
រដ្ឋមន្ត្រីការបរទេសអាម៉េរិកលោកឡយ អូស្ទីន បានជួបពិភាក្សាជាមួយសមភាគីកូរ៉េខាងត្បូងរបស់លោកនៅទីក្រុងសេអ៊ូលកាលពីថ្ងៃអង្គារ ដោយប្រមុខយោធាទាំងពីរបានប្តេជ្ញាថានឹងបង្កើនការធ្វើសមយុទ្ធរួមគ្នានិងកិច្ចសហការសន្តិសុខនៅពេលកូរ៉េខាងត្បូងស្វះស្វែងរកការធានាឡើងវិញអំពីការការពារពីការវាយប្រហារដោយសព្វាវុធនុយក្លេអ៊ែរមកពីកូរ៉េខាងជើង។
កាលពីថ្ងៃពុធរដ្ឋមន្ត្រីការពារជាតិអាម៉េរិកលោកអូស្ទីន បាននិយាយថា«យើងបានបញ្ជូនយន្តហោះជំនាន់ទីប្រាំ F-22s និង F-35s ក្រុមនាវាដឹកយន្តហោះមួយទៅកាន់ឧបទ្វីបកូរ៉េ។យើងអាចពិនិត្យមើលនិងរៀបចំសកម្មភាពដូច្នជជាច្រើនទៀត»។
លោកអូស្ទីនក្នុងពេលធ្វើទស្សនកិច្ចកូរ៉េខាងត្បូង និងរដ្ឋមន្ត្រីការពារជាតិកូរ៉េខាងត្បូងលោក លី ចុង-ស៊ុប(Lee Jong-sup)កាលពីថ្ងៃអង្គារបានយល់ព្រម«ពង្រីកនិងជំរុញកំរិតនិងទំហំ»នៃសមយុទ្ធយោធារួមគ្នា ក្រោយមានការបង្ករឿងពីរដ្ឋាភិបាលទីក្រុងព្យុងយ៉ាង រួមមានការបញ្ជូនដ្រូនចូលដែនអាកាសកូរ៉េខាងត្បូងកាលពីពេលថ្មីៗ នេះបើតាមសេចក្តីថ្លែងការណ៍មួយ។
កូរ៉េខាងត្បូង និងអាម៉េរិកក៏បាននិងកំពុងពង្រឹងកិច្ចសហប្រតិបត្តិការសន្តិសុខជាមួយជប៉ុន ដែលរួមមានសមយុទ្ធប្រឆាំងនាវាមុជទឹកនិងកាំជ្រួចនៅប៉ុន្មានខែកន្លងទៅ៕
