Views: 1
ប្រែសម្រួល : កញ្ញាដាលីស (ដេល្លីម៉េល) ៖ យោធាអាម៉េរិកកាលពីថ្ងៃអង្គារទី១៦សីហាបាននិយាយថា ខ្លួនបានសាកល្បងមីស៊ីលផ្លោងឆ្លងទ្វីប Minuteman III ដែលត្រូវបានពន្យារពេលដើម្បីបញ្ចៀសភាពតានតឹងជាមួយទីក្រុងប៉េកាំងក្នុងអំឡុងការសម្ញែងកម្លាំងរបស់ចិននៅជិតកោះតៃវ៉ាន់កាលពីដើមខែនេះ។
ចិនបានបញ្ជូនយន្តហោះជាច្រើនគ្រឿងនិងបាញ់មីស៊ីលនៅច្រកសមុទ្រតៃវ៉ាន់ បន្ទាប់ពីប្រធានសភាអាម៉េរិកលោកស្រី ណាន់ស៊ី ផេឡូស៊ី បានធ្វើដំណើរទៅកាន់កោះដែលគ្រប់គ្រងដោយខ្លួនឯងនេះ។ ចិនចាត់ទុកតៃវ៉ាន់ជាផ្នែកនៃទឹកដីរបស់ខ្លួន ហើយមិនដែលបោះបង់ចោលការប្រើកម្លាំងដើម្បីនាំយកកោះនេះមកស្ថិតក្រោមការគ្រប់គ្រងរបស់ខ្លួននោះឡើយ។
សេចក្តីថ្លែងការណ៍របស់យោធាអាម៉េរិកបាននិយាយថា ការសាកល្បងនេះបានបង្ហាញពី “ការត្រៀមខ្លួនរបស់កងកម្លាំងនុយក្លេអ៊ែររបស់អាម៉េរិកនិងផ្តល់នូវទំនុកចិត្តលើភាពសាហាវនិងប្រសិទ្ធភាពនៃការទប់ទល់នឹងអាវុធនុយក្លេអ៊ែររបស់ប្រទេសនេះ”។
មីស៊ីលនេះបានធ្វើដំណើរប្រហែល ៦.៧៦០ គីឡូម៉ែត្រ ហើយត្រូវបានបាញ់ចេញពីមូលដ្ឋានកងកម្លាំងអវកាសវ៉ាន់ដេនបឺក (Vandenberg) ក្នុងរដ្ឋកាលីហ្វ័រញ៉ា។
យោធាបាននិយាយថា ការសាកល្បងបែបនេះប្រហែល ៣០០ ដងត្រូវបានធ្វើឡើងកាលពីមុន ហើយវាមិនមែនជាលទ្ធផលនៃព្រឹត្តិការណ៍សកលជាក់លាក់ណាមួយនោះទេ។
ការសាកល្បងនេះបង្ហាញថា ទីក្រុងវ៉ាស៊ីនតោនមិនសូវព្រួយបារម្ភអំពីស្ថានការណ៍តានតឹងជុំវិញកោះតៃវ៉ាន់យ៉ាងហោចណាស់ក្នុងរយៈពេលខ្លី។
រដ្ឋបាលរបស់លោកប្រធានាធិបតីចូ បៃដិនបាននិយាយថា ខ្លួននឹងបន្តអនុវត្តប្រតិបត្តិការផ្លូវអាកាសនិងផ្លូវទឹកជាប្រចាំនៅច្រកសមុទ្រតៃវ៉ាន់ក្នុងប៉ុន្មានសប្តាហ៍ខាងមុខនេះ។
យោធាចិនបាននិយាយថា ខ្លួនបានធ្វើសមយុទ្ធបន្ថែមទៀតនៅជិតកោះតៃវ៉ាន់កាលពីថ្ងៃចន្ទ ខណៈសមាជិកសភាអាម៉េរិកមួយក្រុមបានទៅកោះនេះ និងជួបជាមួយប្រធានាធិបតី សៃ អ៊ីងវិន ដែលនិយាយថា រដ្ឋាភិបាលរបស់លោកស្រីប្តេជ្ញាចិត្តក្នុងការរក្សាស្ថិរភាព។
យោធាអាម៉េរិកក៏បានលុបចោលការសាកល្បងមីស៊ីលឆ្លងទ្វីប Minuteman III កាលពីខែមេសាផងដែរ។ការពន្យារពេលនោះមានគោលបំណងកាត់បន្ថយភាពតានតឹងខាងនុយក្លេអ៊ែរជាមួយរុស្ស៊ីក្នុងអំឡុងសង្គ្រាមកំពុងបន្តនៅអ៊ុយក្រែន។
មីស៊ីល Minuteman III ដែលមានសមត្ថភាពនុយក្លេអ៊ែរផលិតដោយក្រុមហ៊ុន Boeing គឺជាគន្លឹះសម្រាប់ឃ្លាំងអាវុធយុទ្ធសាស្ត្ររបស់យោធាអាម៉េរិក។ មីស៊ីលនេះមានរយៈចម្ងាយជាង ៩.៦៦០ គីឡូម៉ែត្រ ហើយអាចធ្វើដំណើរក្នុងល្បឿនប្រហែល ២៤.០០០ គីឡូម៉ែត្រក្នុងមួយម៉ោង៕
មីស៊ីល Minuteman III ត្រូវបានបាញ់ចេញពីមូលដ្ឋានកងកម្លាំងអវកាសវ៉ាន់ដេនបឺកក្នុងរដ្ឋកាលីហ្វ័រញ៉ាកាលពីថ្ងៃអង្គារ