Views: 2
ប្រែសម្រួល : កញ្ញាដាលីស (ដេល្លីម៉េល) ៖ ប្រធានាធិបតីអាម៉េរិកលោក ចូ បៃដិន បានចុះហត្ថលេខាលើច្បាប់មួយ ដែលសន្យាបញ្ចេញប្រាក់២៨០ពាន់លានដុល្លារសំរាប់ផលិតកម្មបច្ចេកវិជ្ជាជាន់ខ្ពស់និងការស្រាវជ្រាវវិទ្យាសាស្ត្រចំពេលមានការបារម្ភថាប្រទេសនេះកំពុងបាត់បង់ភាពខ្លាំងខាងបច្ចេកវិជ្ជារបស់ខ្លួនទៅចិន។
ការវិនិយោគនេះរួមមានការកាត់បន្ថយពន្ធសម្រាប់ក្រុមហ៊ុនណាដែលបង្កើតរោងចក្រផលិតបន្ទះឈីបកុំព្យូទ័រនៅអាម៉េរិក។
ក្រុមធុរកិច្ចនានាបានជំរុញឱ្យមានការគាំទ្រពីរដ្ឋាភិបាលជាយូរយារណាស់មកហើយ ដោយលើកឡើងពីតម្រូវការកាត់បន្ថយការពឹងផ្អែកលើប្រទេសចិន។
កង្វះមីក្រូឈីបជាសកលបានបង្កើនភាពអាសន្ននៃការអំពាវនាវរបស់ពួកគេ។
លោក ឆាក់ ស៊ូមឺ (Chuck Schumer) ព្រឹទ្ធសមាជិកគណបក្សប្រជាធិបតេយ្យកំពូល បាននិយាយថា ច្បាប់វិនិយោគនេះគឺជា “អ្នកផ្លាស់ប្តូរស្ថានការណ៍”ដែលនឹងធានាបាននូវភាពជាអ្នកដឹកនាំនិងវិបុលភាពរបស់អាម៉េរិកនៅក្នុងសតវត្សរ៍ក្រោយ”។
លោកបាននិយាយថា “ពួកផ្តាច់ការបន់ឱ្យយើងចាញ់ ហើយសង្ឃឹមថាយើងនឹងមិនធ្វើសកម្មភាពអីសោះ។ តាមរយៈការអនុម័តច្បាប់ស្តីពីបន្ទះឈីបនិងវិទ្យាសាស្ត្រ យើងកំពុងធ្វើឱ្យច្បាស់ថាយើងជឿថា សតវត្សរ៍របស់អាម៉េរិកដ៏អស្ចារ្យមួយទៀតនឹងច្បាស់ជាកើតឡើងជាមិនខាន”។
បច្ចុប្បន្ននេះ សហរដ្ឋអាម៉េរិកផលិតបន្ទះឈីបផ្គត់ផ្គង់លើសកលលោកត្រឹមតែ ១០ ភាគរយប៉ុណ្ណោះ ដែលវាជាគន្លឹះសម្រាប់អ្វីៗគ្រប់យ៉ាងរាប់ចាប់ពីរថយន្តរហូតដល់ទូរស័ព្ទចល័ត ដោយការផលិតថយចុះពី ៤០ ភាគរយក្នុងឆ្នាំ ១៩៩០។
ប្រទេសនេះមិនមែនមានតែម្នាក់ឯងទេដែលវិនិយោគក្នុងឧស្សាហកម្មបន្ទះឈីប។
សហភាពអឺរ៉ុបនៅនិទាឃរដូវនេះបាននិយាយថា ខ្លួននឹងប្តេជ្ញាចិត្តផ្តល់ប្រាក់ ៤០ ពាន់លានអឺរ៉ូ ដើម្បីជំរុញការផលិតបន្ទះឈីបកុំព្យូទ័រខណៈចិនក៏កំពុងជំរុញការវិនិយោគរបស់ខ្លួនក្នុងវិស័យវិទ្យាសាស្ត្រនិងបច្ចេកវិជ្ជាផងដែរ។
ស្ថានទូតចិនក្នុងទីក្រុងវ៉ាស៊ីនតោនបានជំទាស់នឹងច្បាប់ស្តីពីបន្ទះឈីប ដោយហៅវាថាជាការរំលឹកដល់ “ផ្នត់គំនិតសង្គ្រាមត្រជាក់”៕
លោកបៃដិនហៅច្បាប់ស្តីពីបន្ទះឈីបនិងវិទ្យាសាស្ត្រថាជាការវិនិយោគ “មានតែម្តងក្នុងមួយជីវិត”
