Views: 1
ដោយ៖ រ៉ាម៉ន / ភ្នំពេញ៖ នៅព្រលឹមថ្ងៃទី២៣ កញ្ញា នេះ រដ្ឋបាលរាជធានីភ្នំពេញ បានបញ្ចេញរថយន្តក្រុងចំនួន ១៧៥ គ្រឿង សំរាប់ដឹកជញ្ជូនប្រជាពលរដ្ឋ ទៅលេងស្រុកកំណើត ក្នុងឱកាសបុណ្យភ្ជុំបិណ្ឌ ដោយមិនយកប្រាក់។
រដ្ឋបាលរាជធានីភ្នំពេញ សូមស្វាគមន៍ដោយក្តីញញឹម ក្នុងការបំរើបងប្អូនប្រជាពលរដ្ឋ ធ្វើដំណើរទៅស្រុកកំណើត ជួបជុំបងប្អូន ក្រុមគ្រួសារ ក្នុងឱកាសបុណ្យភ្ជុំបិណ្ឌ ដោយគោរព តាមអនុសាសន៏ដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នាព្រឹកព្រលឹម ថ្ងៃទី២៣ កញ្ញា នេះ លោក ឃួង ស្រេង អភិបាលរាជធានីភ្នំពេញ បានអញ្ជើញទៅពិនិត្យមើលសកម្មភាពការដឹកជញ្ជូនបងប្អូន ប្រជាពលរដ្ឋ ជាមន្ត្រីរាជការ កងកំលាំងប្រដាប់អាវុធ កម្មករ កម្មការនី សិស្ស និស្សិត ទាំងអស់ ដែលកំពុងធ្វើដំណើរទៅស្រុកកំណើត ជួបជុំបងប្អូន ក្រុមគ្រួសារ ប្រកបដោយសេចក្តីសប្បាយរីករាយ ក្នុងឱកាសពិធីបុណ្យភ្ជុំបិណ្ឌ ខាងមុខនេះ។
រដ្ឋបាលរាជធានីភ្នំពេញ បានរៀបចំរថយន្តក្រុង ចំនួន ១៧៥ គ្រឿង សំរាប់បំរើសេវា ដឹកជញ្ជូនបងប្អូន រយៈពេល ៥ថ្ងៃ គឺចាប់ពីថ្ងៃទី២៣ ដល់ថ្ងៃទី២៧ ខែកញ្ញា ឆ្នាំ២០២២ ដោយមិនបង់ប្រាក់ ដើម្បីអបអរសាទរក្នុងឱកាសពិធីបុណ្យភ្ជុំបិណ្ឌនេះ។ រថយន្តក្រុង ទាំង ១៧៥ គ្រឿង របស់រដ្ឋបាលរាជធានីភ្នំពេញ ត្រូវបានបែងចែកសំរាប់ដឹកជញ្ជូនប្រជាពលរដ្ឋ ចេញពីរាជធានីភ្នំពេញ តាមច្រកចេញចូលរាជធានីភ្នំពេញ គឺតាមតម្រាយផ្លូវជាតិទាំង៦ ចេញទៅបណ្តាខេត្តក្រុងនានា ចំនួន ១២០ គ្រឿង។
សូមបញ្ជាក់ថា សម្រាប់ប្រជាពលរដ្ឋ នៅរាជធានីភ្នំពេញ រដ្ឋបាលរាជធានីភ្នំពេញ បានប្រើប្រាស់រថយន្ត ចំនួន ៥៥ គ្រឿង។ ការចេញដំណើរចាប់ពីម៉ោង ៥និង៣០នាទីព្រឹក ថ្ងៃទី២៣ កញ្ញានេះ។
លោកអភិបាលរាជធានីភ្នំពេញ ដែលបានអញ្ជើញជូនដំណើរបងប្អូនប្រជាពលរដ្ឋ ទៅលេង ស្រុក នាព្រឹកថ្ងៃទី២៣ កញ្ញា នេះ បានថ្លែងថាៈ អនុវត្តតាមអនុសាសន៏របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា រដ្ឋបាលរាជធានីភ្នំពេញ បានបញ្ជូនរថយន្តចំនួន ១៧៥ គ្រឿង ទៅ ១៨០ គ្រឿង ចាំដឹក បងប្អូនប្រជាពលរដ្ឋ ទៅស្រុកកំណើត តាមបណ្តាខេត្ត ក្រុងនានា ក្នុងឱកាសបុណ្យភ្ជុំបិណ្ឌ នេះ ដោយមិនយកប្រាក់ ទាំងទៅ ទាំងមក។ នេះជាការគិតគូរបស់សម្តេចតេជោ ហ៊ុន សែន ក្នុងការសម្រាលការចំណាយរបស់បងប្អូនប្រជាពលរដ្ឋយើង ក្នុងពេលទៅលេងស្រុកកំណើត នាឱកាសនេះ។
លោក អភិបាលរាជធានីភ្នំពេញ បានបន្តថាៈ ការអនុវត្តការដឹកជញ្ជូនបងប្អូនប្រជាពលរដ្ឋ ដោយរថយន្តក្រុង ដោយមិនយកប្រាក់ ក៏ជាការរួមចំណែកកាត់បន្ថយការតម្លើងថ្លៃ រថយន្តដឹកជញ្ជូនអ្នកដំណើររបស់ ក្រុមហ៊ុនដឹកអ្នកដំណើរមួយចំនួន ដែលតែងតម្លើងថ្លៃ ធ្វើដំណើរ នៅពេលមានបុណ្យទានម្តងៗ។
លោកបានបន្ថែមទៀតថាៈ ភ្ជុំបិណ្ឌឆ្នាំនេះ យើងឃើញបងប្អូនប្រជាពលរដ្ឋ បានសំរុកទៅ លេងស្រុកកំណើត តាមរយៈរថយន្តក្រុងដឹកអ្នកដំណើរ របស់រដ្ឋបាលរាជធានីភ្នំពេញ មានសន្ទុះកើនឡើង ដោយបងប្អូន បានយល់ឃើញថា រថយន្តក្រុងដឹកអ្នកដំណើររបស់យើង ងាយស្រួលជិះ, មានផាសុកភាព , មានសុវត្ថិភាព និងជិះមិនបង់ប្រាក់ថែមទៀត។ តាមរយ់ លោក ឃួង ស្រេង បងប្អូនប្រជាពលរដ្ឋ បានថ្លែងអំណរគុណយ៉ាងជ្រាលជ្រៅ ដល់សម្តេចអគ្គមហាសេនាបតីតេជោ ហ៊ុន សែន ដែលជានិច្ចកាល តែងបានគិតគូរពីសុខទុក្ខ ប្រជាពលរដ្ឋ គ្រប់កាលៈទេសៈ ពិសេសនៅពេលប្រជាពលរដ្ឋជួបការលំបាក គឺមានសម្តេច នៅក្បែរបងប្អូនជានិច្ច៕ V / N