Views: 12
ដោយ៖ វណ្ណៈ / ព្រះសីហនុ៖ កាលពីព្រឹកថ្ងៃទី២៧ ខែកញ្ញា ឆ្នាំ២០២២ លោក គួច ចំរើន អភិបាល នៃគណៈអភិបាលខេត្តព្រះសីហនុ បានអញ្ជើញផ្តល់ថវិកាលើកទឹកចិត្ត ដល់បងប្អូនប្រជានេសាទចំនួន បួននាក់ ដែលបានជួយសង្គ្រោះជនរងគ្រោះជនជាតិចិន លិចទូក បានចំនួនពីរនាក់ និងជួយដឹកសពជនរងគ្រោះ ពីរនាក់ផ្សេងទៀត ដែលស្រង់បានពីកណ្តាលសមុទ្រ មកដីគោក ប្រគល់ជូនអាជ្ញាធរមានសមត្ថកិច្ច នាពេលកន្លងមក។
លោកអភិបាលខេត្ត បានថ្លែងអំណរគុណ និងកោតសរសើរ ដល់បងប្អូនអ្នកនេសាទ ដែលបានខិតខំជួយរុករកជនរងគ្រោះ ជាជនជាតិចិន ដែលបានជួបគ្រោះថ្នាក់ ក្នុងហេតុការណ៍លិចទូក កាលពីវេលាម៉ោង ១០និង៣០ នាទីព្រឹក ថ្ងៃទី ២២ ខែកញ្ញា ឆ្នាំ២០២២ ស្ថិតនៅចំណុចនិយាមកា ១០.២៥N ១០៣.១៦E នៅចន្លោះពយសារឿង និងកោះតាង ក្នុងភូមិសាស្ត្រខេត្តព្រះសីហនុ។
ហេតុការណ៍ដ៏សោកសង្រេង នាពេលនោះ លោកអភិបាលខេត្ត បានដាក់ចេញនូវ បទបញ្ជាដល់អាជ្ញាធរ កម្លាំងមានសមត្ថកិច្ច ក្រុមជួយសង្គ្រោះ និងមានការចូលរួមពី ក្រុមហ៊ុនទូកទេសចរណ៍របស់លោក ឧកញ៉ា ទៀវិចិត្រ ចេញជួយសង្គ្រោះបន្ទាន់ និងបានប្រកាសជូនដំណឹង ដល់បងប្អូនប្រជានេសាទ និងក្រុមជួយសង្គ្រោះផ្សេងទៀត ក្នុងករណីសង្គ្រោះ បានជនរងគ្រោះ ចំនួនមួយនាក់ និងផ្តល់ជូនថវិកាលើកទឹកចិត្ត ចំនួន ពីរលានរៀល ផងដែរ។
គួរបញ្ជាក់ផងដែរថា ជនរងគ្រោះដោយករណីលិចទូក មានចំនួនសរុប ៤១ នាក់ និងត្រូវបានជួយសង្គ្រោះ និងស្វែងរកឃើញសរុប ៣៣ នាក់ (ស្លាប់ ៣នាក់) និងបាត់ខ្លួន ៨ នាក់ ដោយសមត្ថកិច្ច និងក្រុមជួយសង្គ្រោះ កំពុងស្វែងរកអ្នកបាត់ខ្លួន បន្តទៀត៕/V