Views: 9
ប្រែសម្រួល : កញ្ញាដាលីស (ដេល្លីម៉េល) ៖ អភិបាលក្រុងគៀវ គឺអតីតអ្នកប្រដាល់អាជីព វីតាលី គ្លីតស្កូ (Vitali Klitschko)បានផ្តោះផ្តងវោហាសាស្ត្រកាលពីថ្ងៃអាទិត្យទី២៧វិច្ឆិកាជាមួយប្រធានាធិបតីអ៊ុយក្រែននិងសម្ពន្ធមិត្តរបស់គាត់អំពីរបៀបជួយអ្នកស្រុកទប់ទល់នឹងការដាច់ចរន្តអគ្គិសនី ដោយចាត់ទុកជម្លោះរបស់ពួកគេថា “គ្មានន័យ” ចំពេលរុស្ស៊ីកំពុងធ្វើយុទ្ធនាការយោធា។
លោកគ្លីតស្កូបាននិយាយថា “មជ្ឈមណ្ឌលកម្តៅ” ចំនួន ៤៣០កំពុងជួយអ្នកស្រុកទប់ទល់នឹងឥទ្ធិពលនៃការវាយប្រហាររបស់រុស្ស៊ីទៅលើស្ថានីយថាមពល ហើយជាង ១០០កន្លែងទៀតត្រូវបានគ្រោងទុកក្នុងករណីមានស្ថានភាពធ្ងន់ធ្ងរ។ ប្រធានាធិបតី វ៉ូឡូឌីមៀ ហ្សេឡេនស្គី បានកត់សម្គាល់កាលពីសប្តាហ៍មុនថាមានពាក្យត្អូញត្អែរច្រើនអំពីវិធានការកំពុងអនុវត្តនៅក្នុងរដ្ឋធានី។
លោកគ្លីតស្កូបាននិយាយនៅក្នុងវីដេអូមួយដែលបានបង្ហោះនៅលើ Telegramថា “ខ្ញុំមិនចង់ចូលរួមក្នុងជម្លោះនយោបាយទេ ជាពិសេសនៅក្នុងស្ថានភាពបច្ចុប្បន្ន។ នោះគ្មានន័យទេ។ខ្ញុំមានកិច្ចការត្រូវធ្វើនៅក្នុងទីក្រុង”។
លោកគ្លីតស្កូ ដែលបានជាប់ក្នុងជម្លោះជាច្រើនជាមួយលោកហ្សេឡេនស្គីមុនពេលការលុកលុយរបស់រុស្ស៊ី បាននិយាយថា សម្ពន្ធមិត្តរបស់ប្រធានាធិបតីបានចូលរួមក្នុង “ឧបាយកល”អំពីកិច្ចខិតខំប្រឹងប្រែងរបស់ទីក្រុង រួមទាំង “រូបថតដែលមិនអាចយល់បាន” ដែលបានបង្ហោះតាមអនឡាញ។
លោកគ្លីតស្កូបាននិយាយថា “និយាយឱ្យស្រួលស្តាប់ វាមិនល្អទេ។ មិនល្អសម្រាប់ទាំងអ៊ុយក្រែននិងដៃគូបរទេសរបស់យើង។ ថ្ងៃនេះ ខុសពីពេលណាៗទាំងអស់ គ្រប់គ្នាត្រូវតែរួបរួមគ្នានិងធ្វើការជាមួយគ្នា។ ហើយនៅទីនេះយើងបែរជាមានល្បែងនយោបាយមួយចំនួន”។
ប៉ុន្តែសម្ពន្ធមិត្តកំពូលមួយរូបរបស់ប្រធានាធិបតីបានបង្កើនការវាយសំពងថ្មីមួយ ដោយនិយាយថា ការពន្យល់របស់គ្លីតស្កូ “មានភាពខុសគ្នាខ្លាំង” ពីអ្វីដែលអ្នកស្រុកកំពុងរាយការណ៍។ លោកបានទុកពេលឱ្យលោកអភិបាលក្រុងមួយសប្តាហ៍ដើម្បីដោះស្រាយបញ្ហានិងបញ្ជូនទៅផ្នែកអធិការកិច្ចមជ្ឈមណ្ឌលជំនួយ។
លោក ដេវីដ អារ៉ាខាមៀ (David Arakhamia) ប្រធានក្រុមអ្នកបម្រើប្រជាជននៅក្នុងសភា បាននិយាយនៅលើ Telegram ថា “ខ្ញុំមានសំណើមួយ។អាជ្ញាធរក្រុងមានពេលមួយសប្តាហ៍ដើម្បីកែកំហុស ហើយយើងនឹងធ្វើអធិការកិច្ចរួមគ្នាជាមួយអភិបាលក្រុង”។
លោកហ្សេឡេនស្គីកាលពីសប្តាហ៍មុនបានផ្សព្វផ្សាយអំពីកិច្ចខិតខំប្រឹងប្រែងនៃ “មជ្ឈមណ្ឌលឥតចេះដួលរលំ” រាប់ពាន់កន្លែង ដែលបង្កើតឡើងនៅទូទាំងប្រទេសអ៊ុយក្រែនដើម្បីផ្តល់បណ្តាញកម្តៅ ទឹក អ៊ីនធឺណិត និងទូរស័ព្ទចល័ត។
នៅក្នុងសុន្ទរកថាជាវីដេអូពេលយប់របស់គាត់កាលពីថ្ងៃសុក្រ លោកហ្សេឡេនស្គីបាននិយាយថាអភិបាលក្រុងគៀវមិនបានធ្វើគ្រប់គ្រាន់ដើម្បីជួយអ្នកស្រុកដែលរងទុក្ខលំបាកនោះទេ។”និយាយឱ្យស្រួលស្តាប់ ការងារបន្ថែមទៀតគឺត្រូវការធ្វើជាចាំបាច់”។
លោកហ្សេឡេនស្គីបានឈ្នះឆ្នោតប្រធានាធិបតីភ្លូកទឹកភ្លូកដីក្នុងឆ្នាំ ២០១៩ ប្រាំឆ្នាំបន្ទាប់ពីលោកគ្លីតស្កូចូលកាន់តំណែងអភិបាលក្រុងជាលើកដំបូង។ មុនពេលសង្គ្រាមមេដឹកនាំទាំងពីរបានប៉ះទង្គិចគ្នាអំពីរបៀប ដែលរដ្ឋធានីនិងសេវាកម្មរបស់ខ្លួនកំពុងដំណើរការ៕
អភិបាលក្រុងគៀវ លោក វីតាលី គ្លីតស្កូ តបទៅនឹងសម្តីរបស់ហ្សេឡេនស្គី
