Views: 10
ដោយ៖ រ៉ាម៉ន / ភ្នំពេញ៖ នៅថ្ងៃទី៩ ខែសីហា ឆ្នាំ២០២២ លោក កើត ឆែ អភិបាលរងរាជធានីភ្នំពេញ បានចូលរួមជាតំណាងលោក ឃួង ស្រេង អភិបាលរាជធានីភ្នំពេញ បានអញ្ជើញចូលរួម ជាអធិបតី នៅក្នុងកិច្ចប្រជុំគណៈកម្មការសម្របសម្រួលរួម (JCC) លើកទី៦ ស្តីពីគម្រោងធ្វើឱ្យប្រសើរឡើង នូវសេវាដឹកជញ្ជូនរថយន្តក្រុងសាធារណៈ នៅក្នុងរាជធានីភ្នំពេញ (ហៅកាត់ថា គម្រោង PiBO) ។ នេះបើយោងតាមទំព័រហ្វេសប៊ុកផ្លូវការរបស់លោក កើត ឆែ បានឱ្យដឹងនៅថ្ងៃនេះ។
នៅក្នុងឱកាសនោះ ក៏មានការចូលរួមពីលោក អ៊ូ ធនសាល តំណាងក្រសួងសាធារណការ និងដឹកជញ្ជូន, លោក Keisuke Tanaka នាយករង JICA Headquarter ប្រចាំប្រទេសជប៉ុន, អ្នកស្រី Miyahara Ai តំណាងជាន់ខ្ពស់ JICA ប្រចាំព្រះរាជាណាចក្រកម្ពុជា, អ្នកស្រី Iwai Mariko ទីប្រឹក្សាបង្កើតគម្រោង JICA ប្រចាំព្រះរាជាណាចក្រកម្ពុជា, លោក កូវ មុន្នីរតន៍ តំណាង ADB Cambodia, លោក Kiminari Takahasi ប្រធានទីប្រឹក្សាគម្រោង PiBO និងមន្ត្រីជំនាញពាក់ព័ន្ធ ចំណុះរដ្ឋបាលរាជធានីភ្នំពេញ។
នៅក្នុងកិច្ចប្រជុំនោះ លោល កើត ឆែ បានថ្លែងអំណរគុណ យ៉ាងជ្រាលជ្រៅ ដល់ប្រជាជនជប៉ុន រដ្ឋាភិបាលជប៉ុន និងទីភ្នាក់ងារសហប្រតិបត្តិការអន្តរជាតិជប៉ុន (JICA) ដែលតែងតែផ្តល់ការគាំទ្រ ជាពិសេសតាមរយៈ គម្រោងធ្វើឱ្យប្រសើរឡើង នូវសេវាដឹកជញ្ជូនរថយន្តក្រុងសាធារណៈ នៅក្នុងរាជធានីភ្នំពេញ (PiBO) បានផ្តល់ជំនួយឥតសំណង រថយន្តក្រុង ចំនួន ៨០ គ្រឿង និងជំនួយបច្ចេកទេស យ៉ាងច្រើន អស់រយៈពេល ៥ ឆ្នាំ គិតចាប់តាំងពីថ្ងៃទី១ ខែមករា ឆ្នាំ២០១៧ ដែលនឹងត្រូវបញ្ចប់ នៅថ្ងៃទី២២ ខែសីហា ឆ្នាំ២០២២ ខាងមុខនេះ។
សមិទ្ធផលដែលទទួលបានពី ” មិត្តជប៉ុន ” នឹងចូលរួមចំណែ ក្នុងវិស័យដឹកជញ្ជូន សាធារណៈ នៅរាជធានីភ្នំពេញ ជួយសម្រួលដល់ការធ្វើដំណើរ និងជីវភាពរបស់បងប្អូន ប្រជាពលរដ្ឋ នៅរាជធានីភ្នំពេញ និងជាមូលដ្ឋានគ្រឹះដ៏រឹងមាំ សម្រាប់រដ្ឋបាល រាជធានីភ្នំពេញ និងរដ្ឋាករស្វយ័តដឹកជញ្ជូនសាធារណៈ រថយន្តក្រុង បន្តអភិវឌ្ឍន៍សេវា រថយន្តក្រុងសាធារណៈ នៅរាជធានីភ្នំពេញ ឱ្យមានប្រសិទ្ធភាព ជូនបងប្អូនប្រជាពលរដ្ឋ៕/V