Views: 2
ប្រែសម្រួល : កញ្ញាដាលីស (ដេល្លីម៉េល) ៖ អធិការបតីអាល្លឺម៉ង់លោក អូឡាហ្វ ស្កូល បាននិយាយនៅក្នុងបទសម្ភាសន៍មួយចេញផ្សាយកាលពីថ្ងៃព្រហស្បតិ៍ទី៨ធ្នូថា ហានិភ័យនៃប្រធានាធិបតីរុស្ស៊ី វ្ល៉ាឌីមៀ ពូទីន ប្រើប្រាស់អាវុធនុយក្លេអ៊ែរជាផ្នែកនៃសង្គ្រាមរបស់គាត់នៅអ៊ុយក្រែនបានថយចុះហើយក្នុងការឆ្លើយតបទៅនឹងសម្ពាធអន្តរជាតិ។
លោកស្កូលបានប្រាប់កាសែតហ្វ៊ុនកេ( Funke) នៅក្នុងបទសម្ភាសន៍មួយដើម្បីប្រារព្ធឆ្នាំដំបូងរបស់គាត់នៅក្នុងតំណែងយ៉ាងដូច្នេះថា សង្គ្រាមកំពុងបន្តជាមួយនឹង “ភាពឃោរឃៅមិនចេះរីងស្ងួត” តែទោះយ៉ាងណាពេលនេះមានរឿងមួយបានផ្លាស់ប្តូរ។”រុស្ស៊ីបានឈប់គំរាមប្រើអាវុធនុយក្លេអ៊ែរហើយ។ ជាប្រតិកម្មចំពោះសហគមន៍អន្តរជាតិដែលបានគូសបន្ទាត់ក្រហម”។
មេដឹកនាំអាល្លឺម៉ង់បានបន្ថែមថា ត្បិតមានការបែកបាក់គ្នាយ៉ាងជ្រាលជ្រៅ វាជារឿងសំខាន់ដែលការសន្ទនាជាមួយវិមានក្រឹមឡាំងនៅតែបន្ត។
លោកពូទីនបាននិយាយកាលពីថ្ងៃពុធថា ហានិភ័យនៃសង្គ្រាមនុយក្លេអ៊ែរធ្លាប់បានកើនឡើងមែន ប៉ុន្តែទទូចថារុស្ស៊ីមិនបាន “ឆ្កួតទេ”ហើយថាខ្លួនមើលឃើញអាវុធនុយក្លេអ៊ែររបស់ខ្លួនជាអាវុធដើម្បីការពារខ្លួនសុទ្ធសាធ។
កាសែត Funke បាននិយាយថា បទសម្ភាសន៍ជាមួយលោកសូលត្រូវបានធ្វើឡើងកាលពីថ្ងៃចន្ទ ហើយសម្រង់សម្តីត្រូវបានអនុញ្ញាតនៅរសៀលថ្ងៃពុធ។
លោកស្កូលបាននិយាយថា ពូទីនត្រូវតែបញ្ឈប់សង្គ្រាម ប៉ុន្តែក្រោយមក គាត់នឹងត្រៀមខ្លួនដើម្បីនិយាយជាមួយរុស្ស៊ីអំពីការគ្រប់គ្រងអាវុធនៅអឺរ៉ុប ដោយបន្ថែមថារឿងនេះក៏ត្រូវបានផ្តល់ជូនមុនសង្គ្រាមផងដែរ។
ដោយការពារអំពីការគាំទ្ររបស់អាល្លឺម៉ង់ដល់អ៊ុយក្រែន រួមទាំងការផ្គត់ផ្គង់អាវុធ ដែលអ្នករិះគន់នៅទីក្រុងគៀវនិងកន្លែងផ្សេងទៀតនៅក្នុងទ្វីបអឺរ៉ុបនិយាយថាមានភាពខ្សត់ខ្សោយជាងគេនោះ លោកស្កូលនិយាយថា បន្ទាប់ពីសហរដ្ឋអាម៉េរិក អាល្លឺម៉ង់គឺជាអ្នកគាំទ្រធំបំផុតមួយរបស់អ៊ុយក្រែន រួមទាំងការផ្គត់ផ្គង់សព្វាវុធ។
លោកបាននិយាយថា “យើងកំពុងធ្វើអ្វីគ្រប់យ៉ាងដែលយើងអាចធ្វើបានដើម្បីទប់ស្កាត់សង្គ្រាមដោយផ្ទាល់រវាងរុស្ស៊ីនិងអង្គការណាតូ។ ជម្លោះបែបនេះនឹងមានតែអ្នកចាញ់ប៉ុណ្ណោះនៅទូទាំងពិភពលោក”។
លោករំពឹងថាសេដ្ឋកិច្ចធំបំផុតរបស់អឺរ៉ុបមួយនេះនឹងឆ្លងកាត់រដូវរងាបានយ៉ាងល្អ ហើយនៅតែជាប្រទេសឧស្សាហកម្មដ៏រឹងមាំ និងជោគជ័យខណៈប្រទេសនេះកាត់បន្ថយការពឹងផ្អែកលើថាមពលរបស់រុស្ស៊ី។
លោកនិយាយថា “ឥឡូវនេះយើងកំពុងធ្វើការសម្រេចចិត្តចាំបាច់ដើម្បីមានឯករាជ្យក្នុងរយៈពេលវែង។ ចាប់ពីឆ្នាំ ២០៤៥ តទៅ យើងចង់ឱ្យមានអព្យាក្រឹតអាកាសធាតុទាំងស្រុងនិងបង្កើតថាមពលរបស់យើងទាំងស្រុងដោយគ្មានឧស្ម័នធម្មជាតិ ធ្យូងថ្ម ឬប្រេង”។
នៅពេលសួរថាតើលោកនឹងឈរឈ្មោះជាអធិការបតីក្នុងការបោះឆ្នោតលើកក្រោយទៀតឬយ៉ាងណា លោកបាននិយាយថា “ពិតណាស់”៕
អធិការបតីអាល្លឺម៉ង់លោក អូឡាហ្វ ស្កូល
