Views: 8
ប្រែសម្រួល : កញ្ញាដាលីស (ដេល្លីម៉េល) ៖ ក្រុមហ៊ុន Twitter បានបញ្ជាក់ថា លោក អេឡុន ម៉ាស បានសុំទិញក្រុមហ៊ុនជាលើកទីពីរក្នុងឆ្នាំនេះ។
ក្រុមហ៊ុន បាននិយាយនៅក្នុងសេចក្តីថ្លែងការណ៍មួយថា ខ្លួនគ្រោងនឹងយល់ព្រមលើការផ្តល់ជូននេះក្នុងតម្លៃ ៥៤,២០ ដុល្លារក្នុងមួយហ៊ុន ជាតម្លៃដូចគ្នាដែលលោកម៉ាសបានដាក់ចេញពីមុន។
តម្លៃសរុបនៃកិច្ចព្រមព្រៀងនឹងមានចំនួន ៤៤ ពាន់លានដុល្លារ។
អ្នកនាំពាក្យរបស់ Twitter បាននិយាយថា “យើងបានទទួលសំបុត្រពីភាគីលោកម៉ាស ដែលពួកគេបានដាក់ទៅ SEC ។ គោលបំណងរបស់ក្រុមហ៊ុនគឺបិទប្រតិបត្តិការក្នុងតម្លៃ ៥៤,២០ ដុល្លារក្នុងមួយហ៊ុន”។
ភាគហ៊ុនរបស់ Twitter បានកើនឡើង ២២,២ ភាគរយ ស្មើនឹង ៥២ ដុល្លារ បន្ទាប់ពីការប្រកាសនេះ។
កាលពីដើមឆ្នាំនេះ ស្ថាបនិកក្រុមហ៊ុន SpaceX បានស្នើទិញក្រុមហ៊ុននេះ ប៉ុន្តែបានដកខ្លួនចេញវិញនៅខែកក្កដា។
មេធាវីរបស់លោកម៉ាសបាននិយាយថា វាគឺដោយសារតែវេទិកាមួយនេះ “មិនគោរពតាមកាតព្វកិច្ចកិច្ចសន្យារបស់ខ្លួន” ជុំវិញកិច្ចព្រមព្រៀងនេះ ពោលគឺការផ្តល់ឱ្យគាត់នូវព័ត៌មានគ្រប់គ្រាន់ដើម្បី “ធ្វើការវាយតម្លៃដោយឯករាជ្យអំពីអត្រាប្រេវ៉ាឡង់នៃគណនីក្លែងក្លាយ ឬសារឥតបានការនៅលើវេទិការបស់ Twitter”។
Twitter បាននិយាយក្នុងការឆ្លើយតបមួយថា ខ្លួនបានប្ដេជ្ញាបិទប្រតិបត្តិការនេះឱ្យបាន (លក់ចេញឱ្យបាន) ហើយបានចាប់ផ្តើមចំណាត់ការផ្លូវច្បាប់។ លោកម៉ាសក្រោយមកប្តឹងបកវិញ។បណ្តឹងជាប់គាំងរបស់ភាគីទាំងពីរគ្រោងនឹងត្រូវប្រកាសសាលក្រមនៅចុងខែនេះ៕
លោកម៉ាសសុំទិញ Twitter សាជាថ្មី
